LUKA 9

1Go e soso saisai ki tea rualima sikai tamate dua, po dua ra nakasuaana go naveinawotaana dap̃au dimon maga mamau puti, go naga euga mari lua nasasanaana maga. 2Go e dip̃aki lua ra naga euga rogorogo ki namarakiana ki Sup̃e, go naga euga mari pauri tea sasana maga. 3Go e noa ki da, e naga, Kuga ta dape te navatuna raki napua mau, tiko, kite nala ni navinaga, kite navinaga, kite m̃ane mau; go kuga ta dape sugoro dua mau. 4Go nasum̃a waina kuga wo paki ekopu asa, kuga toko asa doko, po m̃elu asa pano. 5Go tea maga waina euga wo da piragi mu mau, ragi waina kuga wo m̃elu dua ki natokoana wanogoe, kuga meseura ki nam̃otam̃ota m̃elu dua ki nam̃elemu maga naga ega vei nanoasokisokiana sikai dip̃a ra. 6Go eu pano, po surata duaduru natokoana kiki maga, eu do dogorogo ki narogorogoana wia, po do mari pauri sara tokora.

7Go Herod tetrarke e dogo tea maga mamau puti waina eu pei tea mariana: go e dodoputuaki p̃arua, nalakena e pei tea noaana pae te seara naga Yoane e duleana m̃elu dua ki tea mate maga; 8go pae te seara, naga Eliyah e pakilina, go pae tea p̃ota seara, naga profeta tuai maga sikai kakada e moro duleana. 9Go Herod e naga, Kinau a daekotovi nap̃au ni Yoane: ma tea waia e pei sei waina a dogo tea tapala nogoe maga nalo kakana? Go e masauna naga ega vunusi a.

10Go apostolo maga, ragi waina eu liliu, eu dogorogo paki nia ki tea maga waina eu mari ra. Go e piragi lua ra, po pano panako pano, eu pei nara mau, paki natokoana sikai waina e pei tea sosoana ki Bethsaida. 11Ma taua maga ni naatam̃oli maga eu atae a po dausi a: go e piragi parati ki da, po pasa ki da nalo ni namarakiana ki Sup̃e, go tea maga waina eu sasana e mari pauri ra. 12Go naaleatia e m̃aladigi nopu; go tea rualima sikai tamate dua eu rumai, po noa ki nia, eu naga, P̃a tapera ki taua ni naatam̃oli maga, naga euga vaki natokoana kiki maga go navanua maga daliviri, po m̃enaki, po dape navinaga: nalakena tu doko nea e pei maso maladi sikai. 13Ma e noa ki da, e Naga, Nimu kuga tua ra euga kanikani. Go eu naga, Au da peani tea waina e p̃arua liu bred lima go naika dua; waina au pe ta pano po magi narei mamau waia pakotovi navinaga. 14Nalakena eu alagoro pei naanoai manu lima. Go e noa ki tea vasapiseikiana aneana maga, e naga, Kuga mari ra euga kere one euga vei tagona maga, rualima lima go rualima lima. 15Go eu mari dapala nogoe, po mari ra eu mamau puti kere one. 16Go e dape bred lima go naika dua wanogoe, go e leo sake paki nakoroatelagi, po pasa p̃ia ki da, po dova p̃oraworae, po do dua tea vasapiseikiana maga naga euga toropusi narae ni taua ni naatam̃oli maga. 17Go eu ganikani, po puka puti: go tea waina e madeada du pele ni matele maga waina e pei tea vilaeana, e pei nala rualima sikai tamate dua.

18Go e pakilina, ragi waina e sikina doko do dapasavasa, tea vasapiseikiana maga eu sikoti a doko: go e pusuusu paki da, po naga, Taua maga ni naatam̃oli maga eu noa naga kinau a pei sei? 19Go eu pasa dara po naga, Yoane tea Bapetiso; ma tea p̃ota seara eu naga, Eliyah; go tea p̃ota seara, naga profeta tuai maga sikai kakada e moro duleana. 20Go e noa ki da, e naga, Ma nimu ku noa naga kinau a pei sei? Go Petero e pasa dara po naga, Kristo ki Sup̃e. 21Ma e pasa parati ki da, po dip̃agoro ra naga euga ta noa ki te naata sikai tea wanogoe mau; 22e naga, E one naatam̃oli Natuna one naga ega sua narogo‐kite‐saana laapa, po pei tea tip̃adoaana pae tea matua maga go tea viri maga go tea midiri maga, po pei tea maripunueana, po pei tea sikeana duleana naaleatia ketolu. 23Go e noa ki tea maga mamau puti, e naga, Te naata e pe masauna naga ega edakugoro au umai, ega tum̃ana pasagoro e, po dape dakati tea valadagoto aneana sara naaleatia, po dausi au. 24Nalakena naata waina e pe masauna naga ega mauti pauri namauriana aneana ega wo dape puoli ki nia; ma naata waina e pe wo dape puoli ki namauriana aneana nalakena kinau, nae ega wo mauti pauri a. 25Nalakena naatam̃oli sikai e pe talua maramana mamau, ma e pe tum̃ana dape puoli ki nia, kite e pe tum̃ana dape pele asa, e pe wo p̃ia asa dapale sava? 26Nalakena naata waina e pe wo maliere ki nau go ki navasaana aginau maga, naatam̃oli Natuna e pe wo maliere ki naata wanogoe, ragi waina ega wo umai nasamasamaana aneana, go nasamasamaana ki Tamana, go ki agelo tautau maga. 27Ma a noa ki mu tea waina e pei lomau, naga Tea maga waina eu lawodu nea seara kakada eu doko, waina euga wo da katidogo namateana mau, pa pa euga wo punusi namarakiana ki Sup̃e.

28Go e pakilina ragi edaku ki navasaana maga wanogoe, e alagoro pei m̃ogi latolu ki nia, e piragi lua Petero go Yoane go Yakobo, po sake paki tava pano naga ega tapasavasa. 29Go ragi waina e do dapasavasa, navunusiana ni naraena e pano p̃ota, go sugoro aneana maga eu dare po pilavila. 30Go kuga leo, naatam̃oli dua ero pasa sikoti a, waina ero pei Moses go Eliyah; 31waina ero pakilina nasamasamaana, po noa nam̃eluana aneana waina e pei m̃aladigi naga ega vakavuro e Yerusalem. 32Ma Petero go tea waina ero sikoti a doko eu madaga ki namaturuana: ma eu do leleo doko, po punusi nasamasamaana aneana, go naatam̃oli dua wanogoe waina ero lawodu sikoti a. 33Go e pakilina, ragi waina nara ero do pa dua ki nia pano, Petero e noa ki Yesu, e naga, Nawota, e p̃ia naga nigida tuga toko nea: go auga mari tap̃aup̃au ega tolu; anigo sikai, go agi Moses sikai, go agi Eliyah sikai: e da atae tea waina e noa e mau. 34Go ragi waina e ko do noa tea maga wanogoe, napopouru sikai e umai, po melugoro ra: go eu mataku ragi waina eu do sili napopouru wanogoe. 35Go nadaleo sikai e dave pae napopouru wanogoe umai, po naga, Tea waia e pei Natugu, tea matadoaana aginau: kuga to dogo e. 36Go ragi waina nadaleo wanogoe e umai, Yesu e pei tea vap̃aiana e sikina doko. Go eu punuta doko, po da dogorogo paki te naata sikai naaleatia maga wanogoe ki te navatuna sikai ni tea maga waina eu punusi ra.

37Go e pakilina matamai ki nia, ragi waina eu siwo sua pae tava umai, taua warua sikai ni naatam̃oli maga eu sua e. 38Go kuga leo, naatam̃oli sikai waina e pae taua ni naatam̃oli maga umai e pioso, po naga, Tea Vasapiseiki, a pavarani ko naga p̃a leo punusi natugu naanoai; 39nalakena e pei natugu sikedau go p̃a leo, naatana sikai e do puati a, go e do pioso m̃araverave; go e do puap̃orae a dapala e do lotalota, go e m̃aladigi marisa m̃elu dua ki nia pano, e mari a e pei wola p̃arua. 40Go a pavarani tea vasapiseikiana anigo maga naga euga mari a ega tave pano; go eu mari sap̃ona. 41Go Yesu e pasa dara po naga, Ko tagona waina ku da saralomau mau go waina ku do mari lolo p̃ota, aga wo sikoti mu doko, po do soki mu pa pa paki nagasa? Pa viragi natum̃a umai. 42Go ragi waina e ko do umai, dimon wanogoe e nadi ki nia pakitano, po pua p̃orae p̃arua ki nia. Ma Yesu e pasa kasua ki naatana loa wanogoe, po mari pauri piakiki naanoai wanogoe, po dua tamana asa liliu. 43Go eu mamau puti saram̃akoto nalakena natatap̃auana ki Sup̃e.

Ma ragi waina tea maga mamau puti eu do maga nalakena naleo maga mamau puti waina e mari ra, e noa ki tea vasapiseikiana aneana maga, 44e naga, Navasaana maga waia euga sili paki nadaligamu maga: nalakena naatam̃oli Natuna ega wo pei tea vituakiana paki nam̃elearu ni naatam̃oli maga. 45Ma eu midoaki sap̃o navasaana wanogoe, go e pei tea surukiana paki da, naga euga ta midoaki atae a mau: go eu mataku pusuusu paki nia nalo ni navasaana wanogoe.

46Go navululuana sikai e pakilina m̃aleoputo kakada, nara sei kakada ega wo p̃arua liu. 47Ma ragi waina Yesu e punusi navululuana ni nap̃op̃oda, e puati piakiki kiki sikai, po lawo ki nia pisari a, po noa ki da, 48e naga, Naata waina e pe wo piragi piakiki kiki waia pae nagisagu e pe viragi au: go naata waina e pe wo piragi au e pe viragi tea waina e dip̃aki lua au umai: nalakena tea waina e pei tea kiki sa m̃aleoputo kakamu mamau puti, nae e pei tea warua.

49Go Yoane e pasa dara po naga, Nawota, au punusi naata sikai e mari dimon maga eu dave pano pae nagisam̃a; go au dip̃agoro e, nalakena e da dausi sikoti gida mau. 50Ma Yesu e noa ki nia, e naga, Kuga ta dip̃agoro e mau: nalakena naata waina e da dip̃a gida, e sikoti gida.

51Go e pakilina, ragi waina naaleatia maga eu pei m̃aladigi waina ega vei tea tapeana sake asa, nae e lawo ki naraena naga ega vaki Yerusalem pano; 52go e dip̃aki lua tea tautauana seara eu pea ki naraena: go eu pano, po sili paki natokoana kiki sikai ki naka ni Samaria, naga euga maneana mari m̃ataki. 53Go eu da piragi a mau, nalakena naraena e dapala e naga ega vaki Yerusalem pano. 54Go ragi waina tea vasapiseikiana aneana Yakobo go Yoane ero punusi a, ero naga, Nawota, ku suasua naga auga noa naga nakapu ega vae nakoroatelagi siwo umai, po mari puoli ki da kite? 55Ma e dum̃ana doa e, po pasa kasua ki da. 56Go eu paki natokoana kiki p̃ota sikai pano.

57Go ragi waina eu do pae napua pano, naata sikai e noa ki nia, e naga, Aga wo dausi ko paki tokora waina ku pe wo paki asa pano. 58Go Yesu e noa ki nia, e naga, Foks maga eu peani m̃oru maga, go manu maga ni nakoroatelagi eu peani vete maga; ma naatam̃oli Natuna e da peani te tokora mau waina ega lesi nap̃auna asa. 59Go e noa ki tea p̃ota sikai, e naga, P̃a rausi au. Ma e naga, Nawota, p̃a suasua ki nau naga aga vano po ova ki tamagu ega vea. 60Ma e noa ki nia, e naga, P̃a toropusi tea mate maga naga euga ova ki tea mate adeada maga; ma nigo p̃a vano po dogorogo ki namarakiana ki Sup̃e. 61Go tea p̃ota sikai ma e naga, Aga wo dausi ko, Nawota; ma p̃a suasua ki nau naga aga vea pasa dule ki tea maga waina eu doko nasum̃a aginau. 62Ma Yesu e noa ki nia, e naga, Naata waina e doropusi nam̃elearuna tea sisi natano, go waina e leo kitaku, e da p̃ia ki namarakiana ki Sup̃e mau.

Currently Selected:

LUKA 9: NTB

Highlight

Copy