YONAH 1
1
1Go navasaana ki Yehovah e umai paki Yonah natu ni Amittai, e noa, 2Pa tuleana, p̃a vaki Nineveh pano, natokoana warua waina, go p̃a vioso dip̃a e; nalakena nasigisigileoana adeada e sake umai paki naraegu. 3Ma Yonah e duleana naga ega sava paki Tarshish m̃elu dua ki narae ni Yehovah pano; go e siwo paki Yoppa, po pap̃ai shipe sikai waina e naga ega vaki Tarshish: go e pitua ki namoriana kakana, po siwo paki asa, naga ega sikoti ra pano paki Tarshish m̃elu dua ki narae ni Yehovah pano. 4Ma Yehovah e nadi ki nalagi warua sikai paki natasi, go navuka warua sikai e doko natasi, go shipe e dapala naga ega mawora. 5Go naatam̃oli maga ni natasi eu mataku, po pioso sara naatam̃oli sikasikai paki sup̃e adeada maga; go eu nadi ki naloriki maga waina eu doko shipe paki natasi, naga euga mari a ega masalesale paki da. Ma Yonah e siwo paki luku tukituki maga ni shipe; go e one, po maturu daratara. 6Go nawota ni shipe e paki m̃aladigi ki nia, po noa ki nia, P̃a tum̃am̃a kasa ki‐go, tea maturu? P̃a tuleana, p̃a vioso paki Sup̃e anigo, mase Sup̃e e pe wo midoa ki gida naga tuga ta puoli mau. Go eu dum̃ada noa ki da, Kuga umai, go tuga nadi ki gole, naga tuga atae sei e pei nalakena nasaana waia e doko gida. 7Go eu nadi ki gole, go gole e dowo paki Yonah. 8Go eu noa ki nia, P̃a noakisai gami, au pavara ni ko asa, sei e pei nalakena nasaana waia e doko gida; nasava e pei nawosiana anigo? Go ku pae esava umai? Navanua anigo e pei esava? Go nigo ku pei nawora ni sei? 9Go e noa ki da, Kinau a pei nawora ni Heberu; go kinau a matau ki Yehovah, Sup̃e ni nakoroatelagi, waina e mari natasi go navanua garagara. 10Go naatam̃oli maga wanogoe eu mataku ki namatakuana warua sikai, po noa ki nia, Nasava waia waina ku po mari a? Nalakena naatam̃oli maga wanogoe eu atae naga nae e do sava m̃elu dua ki narae ni Yehovah pano, nalakena e noakisai ra asa. 11Go eu noa ki nia, Auga mari nasava paki‐go, naga natasi ega tam̃ate paki gami? Nalakena natasi e do pano po puka p̃arua. 12Go e noa ki da, Kuga tape dakati au, po nadi ki nau paki natasi; go natasi ega wo dam̃ate paki mu: nalakena kinau a atae naga natasi warua waia e doko mu nalakena kinau. 13Ma naatam̃oli maga wanogoe eu paluse kasua naga euga mari a euga liliu paki navanua garagara; ma eu marisa mari a: nalakena natasi e do pano po puka p̃arua dip̃a ra. 14Go eu pioso paki Yehovah, po noa, Ako Yehovah O, au pavarani ko asa, auga ta mate mau nalakena namauriana ki naatam̃oli waia, go p̃a ta pitua ki nada tautau paki gami mau: nalakena nigo Yehovah O, ku po mari dapala waina ku masauna. 15Go eu dape dakati Yonah po nadi ki nia paki natasi: go natasi e makoto ki namaetoana aneana. 16Go naatam̃oli maga wanogoe eu matau ki Yehovah ki namatakuana warua sikai; go eu pitua ki naviriana sikai paki Yehovah, po sai nasaiana maga. 17Go Yehovah e dawona ki naika warua sikai naga ega tinomi Yonah; go Yonah e doko nap̃ele ni naika wanogoe naaleatia dolu go nap̃ogiana dolu.
Currently Selected:
YONAH 1: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
