YOANE 18

1Ragi waina Yesu e noa sua navasaana maga wanogoe, e dave pano sikoti tea vasapiseikiana aneana maga paki taleva kerua ni noaisara ni Kidron, paki tokora waina roara sikai e doko asa, go e sili paki asa, nae go tea vasapiseikiana maga eu mamau. 2Go Yuda ma, waina e pitua ki nia, e atae tokora wanogoe: nalakena Yesu go tea vasapiseikiana aneana maga eu paka laapa saisai tokora wanogoe. 3Nalakena tea wanogoe Yuda, waina e piragi sua tagona sikai ni naatam̃oli maga ni navakalo, go tasiga maga waina eu m̃elu tea viri warua maga go Farisi maga, e umai paki tokora wanogoe, eu puati lantern maga go nasulu maga go nalikau maga. 4Nalakena tea wanogoe, Yesu, waina e atae naleo maga mamau puti waina euga vakilina ki nia, e dua sai, po noa ki da, e naga, Ku laaga sei? 5Eu pasa dara e, eu naga, Yesu ni Nasareth. Yesu e noa ki da, e naga, Kinau e pei nae. Go Yuda ma, waina e pitua ki nia, e lawodu sikoti ra. 6Go ragi waina e noa ki da, Kinau a pei nae, eu sukasuka pano, po dowo paki natano. 7Nalakena tea wanogoe e moro pusuusu paki da, e naga, Ku laaga sei? Go eu naga, Yesu ni Nasareth. 8Yesu e pasa dara, e naga, A noa ki sua mu, naga Kinau a pei nae: go ku pe laaga au, kuga suasua ki tea maga waia naga euga vano: 9naga navasaana waina e noa e ega lolomana, e naga, Tea maga waina ku dua au ara, a da dape puoli ki sikai kakada mau. 10Ragi wanogoe Simon Petero waina e peani lova sikai e sai lua e, po dae tea suasua ki tea viri warua liu, po dae lua nadaligana ni matua. Go nagisa ni tea suasua wanogoe e pei Malko. 11Nalakena tea wanogoe Yesu e noa ki Petero, e naga, P̃a sai ki lova liliu paki nala: lasa munu waina Tamagu e dua au asa, aga ta munugi a kite?

12Nalakena tea wanogoe tagona go tea waina e maraki ra, go tasiga maga ki navarapule maga ni Yudea eu puasoki Yesu po soli a, po piragi a pano punusi Annas pea; 13nalakena e pei Kaiafas m̃ona, waina e pei tea viri warua liu natau wanogoe. 14Go Kaiafas e pei tea waina e pusum̃aki paki navarapule maga ni Yudea, naga e p̃ia naga naatam̃oli sikai ega magi narei mate.

15Go Simon Petero e dausi Yesu, go tea vasapiseikiana p̃ota sikai. Go tea vasapiseikiana wanogoe e pei tea ataeana paki tea viri warua liu, go e sikoti Yesu paki ekopu, paki namasopa ni nasum̃a ki tea viri warua liu; 16ma Petero e lawodu pisari namata katama. Nalakena tea wanogoe tea vasapiseikiana p̃ota wanogoe, waina e pei tea ataeana paki tea viri warua liu, e dave pano po pasa ki nagoroi waina e doko raki namata, po piragi Petero umai paki namasopa. 17Nalakena tea wanogoe nagoroi atara wanogoe waina e doko raki namata e noa ki Petero, e naga, Nigo ma ku pei sikai ni tea vasapiseikiana maga ki naatam̃oli waia kite? Nae e naga, A da pei sikai mau. 18Go tea suasua maga go tasiga maga eu lawodu tokora wanogoe, eu mari nakapu sikai ni nam̃elevara; nalakena e maladi; go eu do datalai: go Petero ma e sikoti ra doko, e lawodu po datalai.

19Nalakena tea wanogoe tea viri warua liu e pusuusu paki Yesu nalo ni tea vasapiseikiana aneana maga, go nalo ni navasapiseikiana aneana. 20Yesu e pasa dara e, e naga, Kinau a pasa ki maramana lina; kinau a pasa piseiki sara ragi ekopu ni nasum̃a ni nasaisaiana maga, go ni nasum̃a tapu, waina navarapule maga ni Yudea eu saisai puti ara; go a da pasa panako te navatuna mau. 21Ekasana ku pusuusu paki nau? P̃a vusuusu paki tea maga waina eu dogo au ki tea waina a pasa ki da asa: p̃a leo, tea maga waia eu atae tea waina kinau a noa e. 22Go ragi waina e noa sua tea wanogoe, tasiga maga sikai kakada waina e lawodu pisari a, e dapagi Yesu po naga, Ku pasa dara tea viri warua liu dapala nogoe kite? 23Yesu e pasa dara e, e naga, A pe vasa sa, p̃a noa sokisoki nalo ni tea sa wanogoe: ma a pe vasa p̃ia, ekasana ku p̃okati au? 24Nalakena tea wanogoe Annas e dip̃aki luae epei tea soliana pa punusi Kaiafas tea viri warua liu.

25Go Simon Petero e lawodu po do datalai. Nalakena tea wanogoe eu noa ki nia, eu naga, Nigo ma ku pei sikai ni tea vasapiseikiana aneana maga kite? Nae e pasagoro, po naga, A da pei sikai kakada mau. 26Tea sikai ni tea suasua maga ki tea viri warua liu, waina Petero e dae lua nadaligana, e naga, Kinau a da punusi ko ku sikoti a roara kite? 27Nalakena tea wanogoe Petero e moro pasagoro: go m̃araverave toa e dare.

28Ragi wanogoe eu piragi lua Yesu m̃elu dua ki Kaiafas paki Pretorio: go e pei malip̃ogi; go nara eu da dum̃ada paki ekopu ni Pretorio mau, naga euga ta pei tea mariana euga loa mau, ma naga euga kani navakalauana. 29Nalakena tea wanogoe Pilato e paki katama punusi ra, po naga, Seve navasadip̃aana ku dape a umai dip̃a naatam̃oli waia? 30Eu pasa dara po noa ki nia, eu naga, Nae e pe ta pei tea mari naleo sa mau, au pe ta pitua ki nia paki‐go mau. 31Nalakena tea wanogoe Pilato e noa ki da, e naga, Nimu kuga vuati a, po pasa p̃otae a pataka ni nawotaeana animu. Navarapule maga ni Yudea eu noa ki nia, eu naga, E da pae nawotaeana mau naga kinami auga mari punue te naata: 32naga navasaana ki Yesu ega lolomana, waina e noa e, e paivai ki namateana waina ega wo mate asa.

33Nalakena tea wanogoe Pilato e moro paki ekopu ni Pretorio, po soso Yesu, po noa ki nia, e naga, Nigo ku pei Nawota ki naka ni Yudea kite? 34Yesu e pasa dara, e naga, Nigo ku dum̃am̃a noa tea wanogoe kite? Kite tea p̃ota maga eu noa ki‐go asa nalo kakagu? 35Pilato e pasa dara, e naga, Kinau e pei naatam̃oli ni Yudea sikai kite? Nalauna anigo go tea viri warua maga eu pitua ki‐go paki nau: ku mari nasava? 36Yesu e pasa dara, e naga, Namarakiana aginau e da pei tea ni maramana waia mau: namarakiana aginau e pe vei tea ni maramana waia, tea suasua aginau maga eu pe marimari, naga aga ta pei tea vituakiana paki navarapule maga ni Yudea mau: ma ragi waia namarakiana aginau e da pae tokora wanogoe umai mau. 37Nalakena tea wanogoe Pilato e noa ki nia, e naga, Go nigo ku pei nawota sikai kite? Yesu e pasa dara, e naga, Nigo ku noa naga kinau a pei nawota sikai. Kinau a pakilina nalakena tea wanogoe, go a umai paki maramana nalakena tea wanogoe, naga aga magi nalomauana noasokisoki. Sara naatam̃oli waina eu pei tea ni nalomauana eu dogo nadaleogu. 38Pilato e noa ki nia, e naga, Nasava e pei nalomauana?

Go ragi waina e noa sua tea wanogoe, e moro paki katama punusi navarapule maga ni Yudea, po noa ki da, e naga, Kinau a da pap̃ai te namariana sa asa mau. 39Ma nimu ku peani natomariana sikai, naga aga manimu peresi tea sikai ragi ni navakalauana: nalakena tea wanogoe ku masauna naga aga manimu peresi Nawota ki naka ni Yudea kite? 40Nalakena tea wanogoe eu moro pioso, po naga, P̃a ta peresi naatam̃oli waia mau, ma p̃a veresi Barabba. Go Barabba e pei tea tape pavakoto sikai.

Currently Selected:

YOANE 18: NTB

Highlight

Copy