YOANE 13

1Go pea ki nasaisaiana ni navakalauana, Yesu e atae naga aura aneana e po umai waina ega m̃elu dua ki maramana waia asa, po pa punusi Tamana, e dodomi tea aneana maga waina eu doko maramana, e dodomi ra pa pa paki ragi edaku mau. 2Go ragi waina eu do ganikani nakaniana ni ragi melu, diabolo e nadi ki sua paki nap̃op̃o ni Yuda Iskariote, natu ni Simon, 3naga ega vitua ki nia, Yesu, waina e atae naga Tamana e dua sua e naleo maga mamau puti paki nam̃elearuna maga, go naga e m̃elu Sup̃e dave umai, go naga ega vano punusi Sup̃e, 4e duleana pa dua ki nakaniana, po doropusi sugoro aneana maga eu doko; go e dape tauel sikai, po dum̃ana dasoki a asa. 5E edaku da ki noai paki tea vavano, po atulake naga ega sarue nam̃ele ni tea vasapiseikiana maga, go naga ega kasi ra ki tauel waina e pei tea tasokiana asa. 6Nalakena tea wanogoe e umai punusi Simon Petero. Nae e noa ki nia, e naga, Nawota, nigo ku naga p̃a sarue nam̃elegu maga kite? 7Yesu e pasa dara po noa ki nia, e naga, Tea waina kinau a mari a, nigo ku da atae a mau ragi waia; ma p̃a wo midoaki atae a edaku ki tea waia. 8Petero e noa ki nia, e naga, P̃a wo da sarue nam̃elegu maga mau pa pa ega tu mau du. Yesu e pasa dara e, e naga, A pe ta sarue ko mau, ku pe ta peani te matele sikai sikoti au mau. 9Simon Petero e noa ki nia, e naga, Nawota, nam̃elegu maga eroga ta sikida mau, ma nam̃elearugu maga go nap̃augu euga mamau. 10Yesu e noa ki nia, e naga, Tea waina e loloso sua e pe sarue nam̃elena maga sikida, e pe tautau usuraki: go nimu ku dautau, ma ku da mamau puti dautau mau. 11Nalakena e atae tea waina e naga ega vitua ki nia; nalakena tea wanogoe e naga, Ku da mamau puti dautau mau.

12Go ragi waina e sarue sua nam̃eleda maga, po dape sugoro aneana maga, po moro kere one, e noa ki da, e naga, Ku atae tea waina a po manimu mari a kite? 13Nimu ku soso au ki Tea Vasapiseiki, go ki Nawota: go ku noa p̃ia; nalakena a pei tea wanogoe. 14Ma kinau, Nawota go Tea Vasapiseiki, a pe sarue nam̃elemu maga, e pe one mu one naga nimu ma kuga tum̃amu manimu sarue nam̃elemu maga. 15Nalakena a po dua mu naviseikiana sikai, naga nimu ma kuga mari ega tapala waina kinau a po manimu mari a. 16Lomau, lomau, a noa ki mu, naga, Tea suasua sikai e da dap̃au nawota aneana mau: go tea tip̃akiluaana sikai e da dap̃au tea waina e dip̃aki lua e mau. 17Ku pe atae tea maga wanogoe, go ku pe mari ra, ku pe maropa. 18A da noa e nalo ni nimu mamau puti mau: kinau a atae tea maga waina a matadoa ra: ma naga navasaana midiriana ega lolomana, waina e naga, Tea waina e gani navinaga aginau e sike nam̃ago ni nam̃elena kup̃e au. 19Pae ragi waia pa pa a noa ki mu asa pea ki ega vakilina, naga, ragi waina ega wo pakilina, kuga saralomau naga kinau a pei nae. 20Lomau, lomau, a noa ki mu, naga Tea waina e piragi naata waina a pe wo dip̃aki luae epiragi au; go tea waina e piragi au e piragi tea waina e dip̃aki lua au umai.

21Ragi waina Yesu e noa sua tea wanogoe e dogo kite sa pae naatana, po noa sokisoki, po naga, Lomau, lomau, a noa ki mu, naga sikai kakamu ega wo pitua ki nau. 22Tea vasapiseikiana maga eu dum̃ada leopunusi ra, eu midoaki putuaki nalo ni naata waina e noa e. 23Tea vasapiseikiana aneana maga sikai kakada, waina Yesu e dodomi a, e ovi narum̃a ni Yesu. 24Nalakena tea wanogoe Simon Petero e ligivasu paki nia, po noa ki nia, e naga, P̃a noa naata waina e noa e nalo kakana e pei sei? 25Nae waina e ovi one dapala nogoe narum̃a ni Yesu, e noa ki nia, e naga, Nawota, e pe sei? 26Nalakena tea wanogoe Yesu e pasadara, e naga, Tea waina kinau aga wo maneana pupugi matele po dua e asa, e pei nae. Go ragi waina e pupugi sua matele, e dape a po dua Yuda asa, natu ni Simon Iskariote. 27Go edaku ki matele, ragi wanogoe Satan e sili paki asa. Nalakena tea wanogoe Yesu e noa ki nia, e naga, Tea waina ku naga p̃a mari a, p̃a mari a m̃araverave. 28Ma tea maga waina eu kere one ganikani sikai kakada e da atae tea waina e pei nalakena e noa ki nia tea wanogoe mau. 29Nalakena te seara eu midoaki nia, nalakena Yuda e dape nala ni m̃ane, naga Yesu e noa ki nia, naga P̃a vakotovi naleo maga waina tu dika ara go waina e p̃ia naga tuga veani ra ragi ni nasaisaiana; kite naga ega tua tea tika maga te navatuna. 30Nalakena tea wanogoe ragi waina nae e dape sua matele e dave pano m̃araverave: go e pei p̃ogi.

31Nalakena tea wanogoe ragi waina e dave sua pano, Yesu e naga, Ragi waia naatam̃oli Natuna e pei tea samasamaniana, go Sup̃e e pei tea samasamaniana asa; 32go Sup̃e ega wo samasamani a ega sikoti a, go ega wo samasamani a m̃araverave. 33Piakirikiri ragi kiki aga ko sikoti mu doko. Kuga wo laaga au: go dapala waina a noa ki navarapule maga ni Yudea, naga, Tokora waina kinau aga vaki asa, nimu ku da mari atae umai paki asa mau; a moro noa ki mu asa ragi waia. 34Natip̃akiana vau a dua mu asa, naga kuga tum̃amu dodomi mu; dapala waina a dodomi mu, naga nimu ma kuga tum̃amu dodomi mu. 35Ku pe veani nadodomiana dum̃amu paki mu, naatam̃oli maga mamau puti eu pe wo atae pae tea wanogoe naga ku pei tea vasapiseikiana aginau maga.

36Simon Petero e noa ki nia, e naga, Nawota, ku naga p̃a vaki esava? Yesu e pasa dara, e naga, Tokora waina aga vaki asa pano, ku da mari atae dausi au paki asa ragi waia mau, ma p̃a wo dausi au ragi edaku. 37Petero e noa ki nia, e naga, Nawota, ekasana a da mari atae dausi ko ragi waia mau? Aga wo manigo doropusi namauriana aginau ega madoko. 38Yesu e pasa dara, e naga, P̃a wo maginau doropusi namauriana anigo ega madoko kite? Lomau, lomau, a noa ki‐go, naga Toa ega wo da dare mau pa pa p̃a wo paka tolu pasa goro au.

Currently Selected:

YOANE 13: NTB

Highlight

Copy