AMOS 5
5
1Kuga rogo navasaana waia waina a dape dakati a e pei nalalagaarovaana sikai nalo kakam̃a, nasum̃a ni Israel O. 2Nagoroi atara ni Israel e dowo sua; ega wo da moro duleana mau: e pei tea toropusiana e doko navanua aneana; tea waina ega sike a ega moro duleana, e dika. 3Nalakena Yehovah Sup̃e e noa dapala nea paki nasum̃a ni Israel, e naga, Natokoana waina e dave pano pei naatam̃oli manu sikai sala vea, ega wo peani naatam̃oli p̃onotia sikai maau euga wo pei tea toropusiana doko, go tea waina e dave pano pei naatam̃oli p̃onotia sikai sala vea, ega wo peani naatam̃oli rualima sikai maau euga wo pei tea toropusiana doko. 4Nalakena Yehovah e noa dapala nea paki nasum̃a ni Israel e naga, Kuga laaga au, go kuga wo mauri: 5Ma kuga ta laaga Beth‐el, kite sili paki Cilcal mau, go kuga ta duagoto paki Beerheba mau; nalakena Cilcal ega wo pei tea viragi‐lua‐pavakotoana pano, go Beth‐el ega wo pei tea m̃oli. 6Kuga laaga Yehovah, go kuga wo mauri; mase e pe soro dakiusi nakapu nasum̃a ni Yosef, po gani puoli ki nia, go tea waina ega vuepunue a Beth‐el, ega wo dika: 7Ai ki tea maga waina eu doa naleanaana e pei nakokonae, po nadi ki namarinaleoleanaana paki natano! 8Kuga laaga tea waina e dawona ki Pleiades go Orion, waina e do mari namaligo wono e pei aleati, po do mari aleati e pei p̃ogi; waina e do soso noai maga ni natasi, po do daki lua ra narae ni maramana; Yehovah e pei nagisana. 9Waina e do mari namatepuoliana e pilavila dip̃a tea kasua, dapala waina namarisakiana e pa parata ki nasum̃a p̃aakagoroana. 10Eu pilosi tea waina e do pasa kasua doko namata‐pua, go eu mamarago ki tea waina e do pasa nalomauana. 11Nalakena ku pasi puludoa tea tika, po dape lua kiana nasautoga maga ni whiit; nalakena tea wanogoe nasum̃a maga waina ku davagi ra ki vatu taeana, kuga wo da doko ara mau; roara masauniana maga ni vaine waina ku lawo ara, kuga wo da munu waine kakada mau. 12Nalakena kinau a atae natapiriana visarasara animu maga, go namarinaleosaana animu maga waina eu p̃arua p̃arua liu; nimu waina ku do mari pavakoto tea leana, waina ku do dape ruku, go waina ku do pua daki tea tika maga pa dua ki navasap̃otaeana adeada. 13Nalakena tea wanogoe naatam̃oli waina e manumatua ega wo punuta doko naaleatia maga wanogoe; nalakena e pei ragi sa sikai. 14Kuga laaga tea wia, go kuga ta laaga tea sa mau, naga kuga mauri: go dapala nogoe Yehovah, Sup̃e ki taua maga, ega wo sikoti mu, dapala waina ku noa e. 15Kuga vilosi tea sa, po dodomi tea wia, po lawo‐ki‐laketoko naleanaana namata‐pua: mase Yehovah, Sup̃e ki taua maga, e pe wo saup̃ia ki namagovai ni Yosef waina eu pei tea toropusiana doko. 16Nalakena tea wanogoe Yehovah, Sup̃e ki taua maga, Yehovah e noa dapala nea, e naga, Nalalagaarovaana ega wo doko napua welewelea maga mamau puti; go doko sara napua maga ni natokoana euga wo naga, Awi! Awi! Go euga wo soso tea kili natano paki nasusueana, go tea maga waina eu atae m̃ata ki nalalagaarovaana paki natagiana. 17Go natagiana ega wo doko sara roara maga ni vaine: nalakena kinau aga wo pa duaduru m̃aleoputo kakamu, Yehovah e noa e. 18Ai ki tea maga waina eu masau p̃arua ki naaleatia ki Yehovah! Ekasana ku masau naaleatia ki Yehovah? E pei namaligo, e da pei namarama mau. 19E dakiusi waina naatam̃oli sikai e sava dua ki laion sikai, go bear sikai e soka darup̃a e; go dakiusi waina e paki ekopu ni nasum̃a sikai po dovi dip̃a ki nam̃elearuna, go m̃aata sikai e kati a. 20Naaleatia ki Yehovah ega wo pei namaligo, po da pei namarama mau, kite? Ega wo pei namaligoligo, nalagaana ega wo dika asa. 21Kinau a pilosi nasaisaiana animu maga, a midoa ki p̃alo ki da, go aga wo da maro nasoso‐saisai‐kiana animu maga mau. 22Ku pe vitua ki navituaana tap̃arakiana animu maga go navituaana maga ni navinaga paki nau, ma aga wo da dape ra mau: go aga wo da leo punusi navituaana maga ni natam̃ateana ni nalo tuavati m̃anopunopu animu maga mau. 23P̃a tape lua nadaleo ni nalegaana anigo maga m̃elu dua ki nau pano; nalakena a karai dogo roroaleo ni harp anigo maga. 24Ma naleanaana ega to sara siwo dapala noai maga, go namarinaleoleanaana dapala nap̃ap̃a noaisara sikai waina e da dap̃a mau. 25Ku pitua ki naviriana maga go navituaana maga paki nau natau rualima pati masop̃alo, nasum̃a ni Israel O, kite? 26Kuga tape dakati Sikut nawota animu, go Kaiwan sup̃e ni m̃asoe animu, nasup̃e animu maga, waina ku dum̃amu manimu mari ra; 27Nalakena aga wo mari mu kuga vei tea viragi‐lua‐pavakotoana pano paki taleva kerua ni Damaseko, Yehovah waina nagisana e pei Sup̃e ki taua maga, e noa e.
Currently Selected:
AMOS 5: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
