APOSTOLO MAGA 1

1A mari tusi vea waina, Theofilo, nalo ni tea maga mamau puti waina Yesu e atulake mari ra po pasapisei ki ara, 2pa pa paki naaleatia waina e pei tea tapeana sake asa, ragi waina e dip̃aki sua pae Naatana Tapu apostolo maga waina e matadoa ra: 3e moro lawodu naraeda e mauri edaku ki e sua navitinumateana aneana, navaivaiana kakana eu laapa, e do pakilina ki da naaleatia rualima pati, po do noa ki da naleo maga nalo ni namarakiana ki Sup̃e: 4go ragi waina nae ma nara eu mamau saisai, e pasa parati ki da naga euga ta m̃elu dua ki Yerusalem pano mau, ma naga euga toko raki nasaiana ki Tamana, waina, e noa e, ku dogo e kiagu: 5nalakena Yoane e bapetiso lomau ki noai; ma naaleatia eu da laapa mau eu ko puoli go nimu kuga wo pei tea bapetisoana ki Naatana Tapu.

6Nalakena tea wanogoe ragi waina eu saisai doko, eu pusuusu paki nia, eu naga, Nawota, p̃a wo magi Israel dape namarakiana liliu ragi waia kite? 7Go e noa ki da, E da pei tea animu mau naga kuga atae ragi maga kite sala maga waina Tamagu e lawo ki da eu doko naveinawotaana aneana. 8Ma kuga wo dape nakasuaana ragi waina Naatana Tapu ega wo umai doko mu: go kuga wo pei tea noasokisoki aginau maga Yerusalem, go Yudea mamau, go Samaria, go pa pa paki namatap̃ago ni maramana. 9Go ragi waina e noa sua tea maga wanogoe, go nara eu do leo punusi, e pei tea tapeana sake; go napopouru sikai e dape lua e ki namatada. 10Go ragi waina eu do leo sokisoki paki nakoroatelagi, go nae e do pano, kuga leo, naatam̃oli dua ero lawodu pisari ra waina ero suni sugoro tare maga; 11go waina ero naga, Naatam̃oli ni Calilea maga, ekasana ku lawodu po do leo paki nakoroatelagi? Yesu waia, waina e pei tea tapeana sake m̃elu dua ki mu paki nakoroatelagi pano, ega wo umai dapala waina ku punusi a e paki nakoroatelagi pano.

12Ragi wanogoe eu liliu paki Yerusalem pae tava waina e pei tea sosoana ki Oliva, waina e pei m̃aladigi ki Yerusalem, nasurataana ni sabbath sikai. 13Go ragi waina eu rumai sili asa, eu sake paki ekopu ni em̃ago ni tagona ni elagi, waina eu doko asa doko; Petero go Yoane go Yakobo go Anderea, Filipo go Toma, Bartolomaio go Mataio, Yakobo natu ni Alefaio, go Simon Selote, go Yuda natu ni Yakobo. 14Tea maga mamau puti wanogoe eu do dapasavasa pitip̃atip̃a, nap̃op̃oda sikai maau asa, nara ma nagoroi seara, go Maria Yesu p̃ilana, go taina maga.

15Go Petero e duleana naaleatia maga wanogoe m̃aleop̃uto ni taigida maga, (go taua sikai ni naatam̃oli maga eu saisai doko, eu alagoro pei p̃onotia sikai rualima takuna dua), 16e naga, Taigu maga, e one navasaana midiriana one naga ega lolomana, waina Naatana Tapu e pea noa e pae nawoka ni David nalo ni Yuda, waina e maraki pae napua tea maga waina eu pua soki Yesu. 17Nalakena e pei tea veveana e pei sikai kakagida, po dape namagovai ni nasuasuaana waia. 18(Go nae e pakotovi vanua sikai ki namoriana ni namarinaleotageleana; po dowo dap̃olosiwo, go nap̃alauna e lotu po mapua, go namaritana eu pevera puti. 19Go tea wanogoe e pei tea ataeana paki tea maga mamau puti waina eu doko Yerusalem doko; dapala waina vanua wanogoe e pei tea sosoana pae navasaana adeada ki Akeldama, waina e pei, Vanua ni nada.) 20Nalakena e pei tea midiriana tusi ni Salamo maga,

Nasum̃a aneana ega vei tea mariana ega vei maso maladi,

Go te naata ega ta doko asa mau: go,

Navei‐tea‐leo‐parati‐kiana aneana tea p̃ota sikai ega tape a.

21Nalakena tea wanogoe naatam̃oli maga waina eu sikoti gida doko ragi mamau waina Nawota Yesu e paki ekopu po paki katama m̃aleoputo kakagida, 22e atulake pae nabapetisoana ki Yoane, pa pa paki naaleatia waina e pei tea tapeana sake m̃elu dua ki gida asa, tea maga wanogoe sikai kakada e one asa one naga ega vei tea noasokisoki sikoti gida ni namoroduleanaana aneana. 23Go eu mari edua ero lawodu, Yosef tea sosoana ki Barsabba, waina e pei tea salagisana ki Yusto, go Mattia. 24Go eu dapasavasa, po naga, Nigo, Nawota, waina ku atae nap̃op̃o ni naatam̃oli maga mamau puti, p̃a visei ki gami naatam̃oli dua waia ku po matadoa, 25seve tea kakada, naga ega tape tokora ni nasuasuaana waia go ni navei‐apostolo‐ana, waina Yuda e dawasi pa dua ki nia pano, naga ega vaki tokora aneana pano. 26Go eu madeada pitua ki gole maga; go gole e dowo Mattia; go e pei tea veveana sikoti apostolo rualima sikai tamate sikai.

Currently Selected:

APOSTOLO MAGA 1: NTB

Highlight

Copy