JOHANESE 13
13
Jesu o hlapiša barutiwa ba gagwe maoto
1Pele ga ge Monyanya wa Paseka o lewa ke ge Jesu a šetše a tseba gore nako ya gore a tloge mo lefaseng a ye go Tatagwe e fihlile. Ka mehla o be a be a rata ba gagwe ba mo lefaseng, gomme o ile a fela a ba rata go fihlela mafelelong.
2Ge ba le dijong tša go lalela ke ge Sathane a šetše a thetsitše Judase, morwa wa Simone Iskariote, gore a eke Jesu. 3Jesu yena o be a tseba gore Tatagwe o gafetše dilo ka moka diatleng tša gagwe; o be a tseba le gore o tšwa go Modimo gomme bjale o boela go yena. 4A emelela ba le dijong, a apola seaparo sa gagwe, a tšea lešela a ipofa letheka ka lona. 5A tšhela meetse ka lešapelong, a thoma go hlapiša barutiwa ba gagwe maoto, a a phumola ka lešela lela a ipofilego letheka ka lona. 6Ge a fihla go Simone Petrose, Simone Petrose a mmotšiša a re: “Morena, na nna nka nama ka hlapišwa ke wena maoto?”
7Jesu a mo fetola a re: “Gonabjale se ke dirago ga o se kwešiše, o tla se lemoga ka morago.”
8Petrose a re: “Nna o ka se tsoge o ntlhapišitše maoto le ka mohla!”
Jesu a mo fetola a re: “Ge ke sa go hlapiše maoto, o ka se sa ba morutiwa wa ka.”
9Simone Petrose a mo fetola a re: “Morena, gona se ntlhapiše maoto fela; ntlhapiše le diatla le hlogo!”
10Jesu a re: “Yo a hlapilego mmele o hlwekile hlwekihlweki, gomme ga go nyakege gore a hlape gape a sa tšo hlapa, ge e se maoto. Lena le hlwekile, fela e sego ka moka.” 11Ge a realo e be e le ge a tseba gore ke mang yo a tlilogo mo eka. Ke ka lebaka leo a rilego: “Ga se la hlweka ka moka.”
12 Ge a seno ba hlapiša maoto, a buša a apara seaparo sela sa gagwe, a boela madulong a gagwe dijong, gomme a ba botšiša a re: “Na se ke sa tšogo le dira sona le a se kwešiša? 13Etse le mpitša Moruti le Morena. Gomme ge le realo le a rereša, ka gobane ke nnaena. 14Bjale ge nna ke lego Morena le Moruti wa lena ke le hlapišitše maoto, le lena go a swanela gore le hlapišane maoto. 15Gape ke napile ke le bontšhitše tsela gore le lena le tle le dire se ke le dirilego sona. 16 Ruri, ruri, ke le botša gore ga go mohlanka yo a fetago mong wa gagwe, le moromiwa ga a gona yo a fetago moromi wa gagwe. 17Bjale ka gore šemo taba tše le a di tseba, ge le ka di phetha le tla be le le ba lehlogonolo.
18 “Ga ke re lena ka moka; gape ba ke ba kgethilego ke a ba tseba. Fela Mangwalo a Makgethwa a a rego: ‘Yo a jago le nna dijo o ntlhanametše,’ a swanetše go phethega. 19Taba ye ke le botša yona gonabjale e sešo ya direga, gore mohla e direga le dumele gore ke ‘KE NNA’. 20 Ruri, ruri, ke le botša gore yo a amogelago yo ke mo romilego, le nna o a nkamogela; le yo a amogelago nna, o amogela le yo a nthomilego.”
Jesu o bega go ekwa ga gagwe
(Mat. 26:20-25; Mar. 14:17-21; Luk. 22:21-23)
21Jesu ge a seno realo a ikwa a huduegile moyeng, gomme a bolela phaa a re: “Ruri, ruri, ke le botša gore yo mongwe mo go lena o tlilo nkeka.”
22Barutiwa ba gagwe ba lebelelana, ba tlabilwe ke gore na o ra mang. 23Yo mongwe wa bona, yo Jesu a bego a mo rata kudu, o be a dutše kgauswi le yena. 24Simone Petrose a mo kgwatša, a re a botšiše Jesu gore na o ra mang.
25Morutiwa yoo ke ge a sekamela go Jesu, a mmotšiša a re: “E ka ba ke mang, Morena?”
26Jesu a mo fetola a re: “Ke yo ke tla rego go hlosa ka nthathana ya senkgwa ka mo nea.” Ka gona a tšea nthathana ya senkgwa, a hlosa morong ka yona, a e nea Judase, morwa wa Simone Iskariote. 27Judase ge a seno tšea nthathana yeo, Sathane ke ge a mo tsena. Jesu a re go yena: “Se o se dirago itlhaganele o se dire!” 28Ga go le o tee wa bao ba bego ba le moo dijong yo a ilego a kwešiša gore Jesu o mmoletšang bjalo. 29Ka ge Judase e be e le yena a ba swarelago tšhelete, barutiwa ba bangwe ba Jesu ba ile ba hloma nke Jesu o mmoditše gore a ye go reka tše ba tlago di nyaka monyanyeng, goba a fe bahloki se sengwenyana.
30Judase o rile go tšea nthathana yeo ya senkgwa a tšwela ka ntle. E be e le bošego.
Molao wo mofsa
31Ge Judase a seno tšwa, Jesu a re: “Bjale ke gona batho ba tlilogo utollelwa letago la Morwamotho; ba tlilo utollelwa le letago la Modimo ka yena Morwamotho. 32Gomme ge letago la Modimo le utollwa ka yena, gona Modimo o tla utollela batho letago la yena Morwamotho ka yena mong, a ba utollela lona gonabjale. 33 Bana ba ka, nka se sa ba le lena go iša kae. Le tla nnyaka, gomme gonabjale ke le botša se ke se boditšego baetapele ba Bajuda ka re: ‘Mo ke yago gona lena le ka se kgone go fihla.’ 34 Ke le fa molao wo mofsa, wa gore le ratane. Bjalo ka ge ke le ratile, le lena le rataneng. 35Ge le ratana ke mo batho ba tlago tseba gore le barutiwa ba ka.”
Jesu o bega gore Petrose o tlilo mo latola
(Mat. 26:31-35; Mar. 14:27-31; Luk. 22:31-34)
36Simone Petrose a mmotšiša a re: “Morena, o ya kae?”
Jesu a mo fetola a re: “Ga bjale mo ke yago gona o ka se ntatele, o tla ntatela ka moso.”
37Petrose a mmotšiša a re: “Morena, gonabjale ke tla be ke šitišwa ke eng go go latela? Nna ke ikemišeditše le go go hwela.”
38Jesu a re: “O ra gore ka nnete o ikemišeditše go nkhwela? Ruri, ruri, ke go botša gore pele ga ge mokoko o lla o tla be o ntatotše gararo.”
Currently Selected:
JOHANESE 13: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.
