GENESE 13
13
Abramo le Lote ba a tlogelana
1Abramo o ile go tšwa Egepeta a ya leboa thokong ya borwa bja Kanana le mosadi wa gagwe le tšohle tše e bego e le tša gagwe, gomme Lote a ya naye. 2Abramo e be e le monna wa mohumi kudu a na le diruiwa, gotee le silibera le gauta. 3O ile a tloga moo gomme a aga mo le mola, a eya Bethele. A fihla kgathe ga Bethele le Ai, felo mola a ilego a hloma mešaša pele 4a ba a aga aletare gona. Moo o ile a khunamela Morena.
5Lote le yena o be a na le diruiwa le la gagwe lapa le bahlanka. 6Naga e be e sa lekane gore bobedi ba ka dula mmogo, ka gore ba be ba na le leruo le lentši kudu. 7Ka gona go ile gwa tsoga diphapano gare ga badiši ba diruiwa tša Abramo le badiši ba diruiwa tša Lote. Ka nako yeo Bakanana le Baperise ba be ba sa dula nageng yeo.
8Ke moo Abramo a itšego go Lote: “A nna le wena re se lwe, badiši ba ka le ba gago le bona ba se lwe, ka gobane re bana ba motho. 9Ka gona a re arogane. Kgetha karolo ye o e nyakago ya naga. O ye go yona mme nna ke tla ya thoko ye nngwe.”
10 Ke moo Lote a ilego a lealea, gomme a bona gore moedi ka moka wa Jordane go fihlela Tsoare o na le meetse a mantši, go swana le serapa sa Morena, goba go swana le naga ya Egepeta. E be e le pele ga ge Morena a fediša motse wa Sodoma le wa Gomora. 11Lote a ikgethela moedi wa Jordane ka moka mme a leba thoko ya bohlabela. Ke ka moo banna ba babedi bao ba aroganego ka gona. 12Abramo o ile a dula nageng ya Kanana, Lote yena a dula metseng ya ka moeding, mme a hloma mešaša kgauswi le Sodoma. 13Badudi ba Sodoma e be e le ba babe, mme ba fošetša Morena kudu.
Abramo o hudugela Hebrone
14Ka morago ga ge Lote a sepetše, Morena o ile a re go Abramo: “Nke o iše mahlo ka gohle o le moo o lego gona. 15 Naga ka moka ye o e bonago ke tla e fa wena le ditlogolo tša gago, gomme e tla ba ya gago go ya go ile. 16Ke tla dira gore ditlogolo tša gago di lekane le lerole la lefase ka bontši; ge eba go na le motho yo a kago bala lerole la lefase, le ditlogolo tša gago a ka di bala. 17Eya o sepele le naga yohle, ka gobane ke tlile go go fa yona.” 18Ka fao Abramo a hlahlamolla mešaša ya gagwe a yo dula kgauswi le mehlare ye mekgethwa ya Mamre kua Hebrone, gomme moo a agela Morena aletare.
Currently Selected:
GENESE 13: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.
