Марԛос 10

Пьрса жьнбәрʼдане

(Мәтта 19:1-12; Луԛа 16:18)

1Иса жь ԝьр рʼабу чу синоре Щьһустане у дәрбази ԝи алийе чʼәме Урдӧне бу. Диса әʼлаләте ль дора Ԝи гьрт у чаԝа әʼдәте Ԝи бу, Әԝи диса әԝ һин кьрьн. 2Жь ферьсийа һьнәк незики Ԝи бун у же пьрсин, ԝәки Ԝи бьщерʼьбиньн: «Гәло ль гора Ԛануне рʼаст ә, кӧ мер жьна хԝә бәрʼдә?» 3Иса щаба ԝан да у гот: «Муса чь тʼәми да ԝә?» 4Ԝана гот: «Муса изьн да, кӧ мер кʼахаза жьнбәрʼдане бьньвисә у жьне бәрʼдә»#10:4 Ԛануна Дӧщари 24:1-3. . 5Ле Иса ԝанрʼа гот: «Жь дәст сәрһʼьшкийа ԝә Муса әв тʼәми ԝәрʼа ньвиси. 6Ле сәре серида, ԝәхте әʼфьрандьне Хԝәде әԝ ‹ԛьсьме мер у жьнеда хӧльԛандьн›#10:6 Дәстпебун 1:27; 5:2. . 7‹Бона ве йәке мере де у баве хԝә бьһелә, хԝә ль жьна хԝә бьгьрә 8у һәр дӧ ԝе бьбьнә бәдәнәк›#10:8 Дәстпебун 2:24. . Аԝа иди әԝ нә дӧдӧ нә, ле бәдәнәк ьн. 9Бона ве йәке әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә». 10Гава әԝ диса малда бун, шагьрта бона ве мәсәле жь Ԝи пьрсин. 11Иса ԝанрʼа гот: «Кʼи кӧ жьна хԝә бәрʼдә у йәкә дьн бьстинә, һьндава ԝеда зьнекʼарийе дькә 12у һәгәр жьн жи мере хԝә бәрʼдә у йәки дьн бьстинә, зьнекʼарийе дькә».

Иса дӧа зарʼока дькә

(Мәтта 19:13-15; Луԛа 18:15-17)

13Аԝа зарʼок данинә щәм Иса, кӧ дәсте Хԝә дайнә сәр ԝан, ле шагьрт ль йед данин һьлатьн. 14Гава кӧ Иса әв йәк дит, һерс кʼәт у ԝанрʼа гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Хԝәде пʼара йед аһа йә. 15Әз рʼаст ԝәрʼа дьбежьм, кʼи Пʼадшатийа Хԝәде мина зарʼокәке ԛәбул нәкә, әԝ тʼӧ щар накʼәвә нава ԝе». 16Паше әԝ зарʼ данә һʼәмеза Хԝә, дәсте Хԝә дани сәр ԝан у дӧа ль ԝан кьр.

Йәки дәԝләти ль жийина һʼәта-һʼәтайе дьгәрʼә

(Мәтта 19:16-30; Луԛа 18:18-30)

17Гава Иса рʼийа Хԝәда дьчу, йәк бәрбь Ԝи бәзи, чу ль бәр Ԝи чок да у же пьрси: «Дәрсдаре ԛәнщ, әз чь бькьм, ԝәки жийина һʼәта-һʼәтайе ԝар бьм?» 18Иса ԝирʼа гот: «Тӧ чьма Мьнрʼа дьбежи ԛәнщ? Ԛәнщ тʼәне Хԝәде йә, пештьри Ԝи кәсәки дьн тʼӧнә. 19Тӧ тʼәмийа зани: ‹Нәкӧжә, зьнекʼарийе нәкә, нәдьзә, шәʼдәтийа дәрәԝ нәдә, худана хәлԛе нәхԝә, ԛәдьре де у баве хԝә бьгьрә›#10:19 Дәркʼәтьн 20:12-16; Ԛануна Дӧщари 5:16-20. ».

20Әԝи гот: «Дәрсдар, әв һʼәму жи мьн жь щаһьлтийа хԝәда хԝәй кьрьнә». 21Иса ле ньһерʼи, әԝ һʼьз кьр у готе: «Һе кемасикә тә һәйә. Һәрʼә чи тә һәйә бьфьрошә, бәлайи фәԛира кә, һьнге хьзна тә ԝе ль әʼзмен һәбә. У пәй Мьн ԝәрә#10:21 Нав һьнәк дәстньвисарада аһа йә: «У хаче хԝә һьлдә, пәй Мьн ԝәрә». ». 22Ль сәр ве готьне әԝи рʼәнг авит, мәʼдәкьри чу, чьмки гәләк һәбука ԝи һәбу.

23Иса ль дора Хԝә ньһерʼи у шагьртед Хԝәрʼа гот: «Дәԝләтийарʼа чьԛас зәʼмәт ә, кӧ бькʼәвьнә Пʼадшатийа Хԝәде!» 24Шагьрт сәр ван готьнед Ԝи әʼщебмайи ман, ле Иса диса думайи кьр у гот: «Лаԝно! Ԝанрʼа чьԛас зәʼмәт ә, бькʼәвьнә Пʼадшатийа Хԝәде, йед кӧ гӧмана хԝә датиньнә сәр дәԝләта хԝә!#10:24 Нав һьнәк дәстньвисарада «йед кӧ гӧмана хԝә данинә сәр дәԝләта хԝә» тʼӧнә. 25Дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде». 26Шагьрт гәләки әʼщебмайи ман у һәврʼа готьн: «Иди кʼи дькарә хьлаз бә?» 27Иса ль ԝан ньһерʼи у гот: «Әԝ тьшт жь дәсте мерьв найе, ле жь дәсте Хԝәде те, чьмки Хԝәде дькарә һәр тьшти бькә». 28Һьнге Пәтрус дәстпекьр жерʼа гот: «Аԝа мә һʼәму тьшт һьштийә у пәй Тә һатьнә». 29Иса ԝанрʼа гот: «Әз рʼаст ԝәрʼа дьбежьм, тʼӧ кәс тʼӧнә кӧ бона Мьн у Мьзгинийе мал, йан бьра, йан хушк, йан де, йан бав, йан зарʼ, йан әʼрдед хԝә һьштьбьн, 30у ль ве дьне сәд ԛат мала, бьра, хушка, дийа, зарʼа у әʼрда тʼәви зерандьна нәстинә у дьнйа дьнда жи жийина һʼәта-һʼәтайе. 31Ле гәләкед пеш ԝе бьбьнә йед паш у йед паш ԝе бьбьнә йед пеш».

Иса щара сьсийа дәрһәԛа мьрьна Хԝәда дьбежә

(Мәтта 20:17-19; Луԛа 18:31-34)

32Аԝа әԝ ль сәр рʼе бун у һәвраз дьчунә Оршәлиме, Иса ль пешийа ԝан дьчу, шагьрт әʼщебмайи дьман у әԝед ль пәй дьһатьн дьтьрсийан. Әԝи диса һәр донздәһ данә алики у дәстпекьр әԝ тьштед кӧ ԝе сәре Ԝи бьԛәԝьмийана ԝанрʼа гот: 33«Бьбьһен! Әм һәвраз дьчьнә Оршәлиме. Кӧрʼе Мерьв ԝе бькʼәвә дәсте сәрәкед кʼаһина у ԛанунзана. Әԝе жерʼа кӧштьне дәрхьн у Ԝи бьдьнә дәсте нәщьһуйа 34у әԝе ԛәрфе хԝә ль Ԝи бькьн, тʼукьне, бьдьнә бәр ԛамчийа, Ԝи бькӧжьн. У рʼожа сьсийа ԝе жь мьрьне рʼабә».

Хԝәстьна Аԛуб у Йуһʼәнна

(Мәтта 20:20-28)

35Һьнге кӧрʼед Зәбәди, Аԛуб у Йуһʼәнна незики Иса бун у готьне: «Дәрсдар, әм дьхԝазьн ԝәки әм жь Тә чь һиви кьн, Тӧ бона мә бьки». 36Әԝи жи жь ԝан пьрси: «Һун чь дьхԝазьн кӧ Әз бона ԝә бькьм?» 37Ԝан жерʼа гот: «Изьне бьдә кӧ рʼумәта Тәда жь мә йәк ль мьле Тәйи рʼасте, йе дьн жи ль мьле Тәйи чʼәпе рʼуне». 38Иса ԝанрʼа гот: «Һун ньзаньн чь дьхԝазьн. Гәло һун дькарьн жь ԝе кʼасе вәхԝьн, йа кӧ Әзе вәхԝьм? Йан жи бь ԝе ньхӧмандьне бенә ньхӧмандьне бь кʼижане Әзе бемә ньхӧмандьне?» 39Ԝана жерʼа гот: «Әм дькарьн». Иса ԝанрʼа гот: «Бәле һуне вәхԝьн жь ԝе кʼаса кӧ Әзе вәхԝьм у бенә ньхӧмандьне бь ԝе ньхӧмандьна кӧ Әзе пе бемә ньхӧмандьне, 40ле изьна ль мьле Мьни чʼәп у рʼасте рʼуньштьне нә дәсте Мьнда йә. Әԝ щи бона ԝан ьн, кʼижанарʼа һатьнә һазьркьрьне». 41Гава һәр дәһә шагьртед дьн әв йәк бьһист, дьле ԝан жь Аԛуб у Йуһʼәнна ма. 42Ле Иса әԝ гази щәм Хԝә кьрьн у гот: «Һун заньн йед кӧ нав мьләтада сәрԝер тенә һʼәсабе, сәрдәстийе ль ԝан дькьн у гьрәгьред ԝан жи һʼӧкӧми сәр ԝан дькьн. 43Ле нава ԝәда бьра ӧса нибә. Кʼи кӧ нава ԝәда дьхԝазә бьбә йе мәзьн, гәрәке бьбә бәрдәстийе ԝә. 44У кʼи кӧ нава ԝәда дьхԝазә бьбә пеш, гәрәке бьбә хӧламе һʼәмуйа. 45Чьмки Кӧрʼе Мерьв жи нәһатийә кӧ жерʼа бәрдәстийе бькьн, ле ԝәки Әԝ Хԝәха бәрдәстийе бькә у әʼмьре Хԝә бьдә кӧ гәләка бькʼьрʼә».

Иса пʼарскьрәки кор бажаре Әриһайеда ԛәнщ дькә

(Мәтта 20:29-34; Луԛа 18:35-43)

46Паше әԝ һатьнә Әриһайе. Гава Иса тʼәви шагьртед Хԝә у әʼлаләтәкә гьранва жь бажер дәркʼәт, Кӧрʼе Тимәйо, Бартимәйойе кор#10:46 Аһа жи те фәʼмкьрьне: «Бар-Тимәйо», аԝа готи «Кӧрʼе-Тимәйо». «Бар» бь зьмане арами «кӧрʼ» ә. ль сәр рʼе рʼуньштьбу пʼарс дькьр. 47Гава бьһист кӧ Исайе Ньсрәте дәрбаз дьбә, дәстпекьр кьрә ԛирʼин у гот: «Исайе Кӧрʼе Даԝьд, ль мьн ԝәрә рʼәʼме!» 48Гәләка ль ԝи һьлат, ԝәки дәнге хԝә бьбьрʼә, ле әԝи һе дькьрә ԛирʼин у дьгот: «Кӧрʼе Даԝьд, ль мьн ԝәрә рʼәʼме!» 49Иса сәкьни у гот: «Гази ԝи кьн». Гази йе кор кьрьн у ԝирʼа готьн: «Чʼәʼве тә рʼоньк! Рʼабә сәр хԝә, гази тә дькә». 50Әԝи жи пʼоте хԝә авит, банзда сәр хԝә у һатә щәм Иса. 51Иса же пьрси: «Тӧ чь жь Мьн дьхԝази кӧ Әз бона тә бькьм?» Йе кор жерʼа гот: «Дәрсдар, дьхԝазьм чʼәʼвед мьн бьбиньн». 52У Иса жерʼа гот: «Һәрʼә, баԝәрийа тә тӧ ԛәнщ кьри». У ԝи чахи чʼәʼвед ԝи дитьн, да пәй Иса чу.

Currently Selected:

Марԛос 10: KmrNTC

Highlight

Copy