Луԛа 10

Шандьна һʼәфте дӧ шагьрта

1Пәй ве йәкерʼа Хӧдан һʼәфте дӧ#10:1 Нав һьнәк дәстньвисарада аһа йә: «Һʼәфте». шагьртед дьн жи кʼьфш кьрьн у әԝана дӧдӧ-дӧдӧ пешийа Хԝәва шандьнә ԝан щи у бажара, кʼидәре Хԝәха ԝе бьчуйайе 2у ԝанарʼа гот: «Нандьрун гәләк ә, ле пʼалә һьндьк ьн. Аԝа һиви жь Хԝәйе нандьруне бькьн, ԝәки пʼала нандьруна Хԝәрʼа бьшинә. 3Һәрʼьн, Әз ва ԝә мина бәрха дьшиньмә нава гӧра. 4Хԝәрʼа нә кʼиськ һьлдьн, нә турьк, нә жи чарьха. У рʼева сьлаве#10:4 Аһа те фәʼмкьрьне: «Рʼева нәсәкьньн, ԝәки бь сьлавдайине ԝәхте хԝә ӧнда нәкьн». нәдьнә тʼӧ кәси, 5чь мала кӧ һун һәрʼьне, пешийе бежьн: ‹Әʼдьлайи ве малерʼа›. 6У һәгәр ль ԝьр мәрьвәки һежайи әʼдьлайийе һәбә, әʼдьлайийа ԝәйе ль сәр ԝи бьминә. Ле һәгәр тʼӧнәбә, ԝе ль ԝә вәгәрʼә. 7У ԝе маледа бьминьн, чь хԝарьне жи бьдьнә ԝә, әԝе жи бьхԝьн у вәхԝьн, чьмки пʼалә һежайи һәԛе хԝә йә. У мал бь мал нәгәрʼьн. 8Кʼижан бажаре кӧ һун һәрʼьне у ԝә ԛәбул кьн, чь дайньнә бәр ԝә, бьхԝьн. 9Нәхԝәшед навда ԛәнщ кьн у ԝанрʼа бежьн: ‹Пʼадшатийа Хԝәде незики ԝә буйә›. 10Ле әԝ бажаре кӧ һун һәрʼьне у ԝә ԛәбул нәкьн, дәренә мәйдана у бежьн: 11‹Әм ԝе тʼоза кӧ жь бажаре ԝә ньгед мәва гьртийә жи ль сәр ԝәда даԝдьшиньн. Ле ве йәке бьзаньбьн кӧ Пʼадшатийа Хԝәде незики ԝә буйә›. 12Әз жь ԝәрʼа дьбежьм, Рʼожа Ахрәте һʼале Содоме ԝе жь йа ԝи бажари четьр бә#10:12 Дәстпебун 19. .

Бажаред нәбаԝәр

(Мәтта 11:20-24)

13Ԝәй ль тә Хоразин! Ԝәй ль тә Бәйтсайда! Һәгәр әԝ кʼәрәмәтед кӧ нава ԝәда бун, Сур у Сайдайеда#10:13 Хоразин у Бәйтсайда бажаред щьһуйа бун, ле Сур у Сайда әԝ бажаред нәщьһуйа бун, аԝа готи пʼутпʼарьст бун. бьбуна, әԝанайе зува бь кʼӧрх нав кʼозийеда рʼуньшти тʼобә бькьрана. 14Ле Рʼожа Ахрәте һʼале Сур у Сайдайе ԝе жь һʼале ԝә четьр бә. 15У тӧ Кәфәрнаһум, тә тʼьре те һʼәта әʼзмен бьльнд би? Ле те һʼәта дийаре мьрийа һәрʼи хԝаре!

16Әԝе гӧһдарийа ԝә дькә, гӧһдарийа Мьн дькә у әԝе ԝә тʼәхсир дькә, Мьн тʼәхсир дькә, ле әԝе Мьн тʼәхсир дькә, йе кӧ Әз шандьмә тʼәхсир дькә».

Вәгәрʼандьна һʼәфте дӧда

17Әԝ һʼәфте дӧ шагьрт бь әшԛ у ша вәгәрʼийан у готьн: «Хӧдан, щьн жи сайа наве Тә ельми мә дьбун». 18Әԝи ԝанарʼа гот: «Мьн мирещьн дит, чаԝа бьруска жь әʼзмен жорда кʼәти. 19Аԝа Мьн һʼӧкӧм дайә ԝә, кӧ һун мәʼр у дупʼьшка у тʼәмамийа ԛәԝата дьжмьн пʼепәскьн у ԛәт тʼӧ тьште зьраре нәдә ԝә. 20Ле бь ԝе йәке ша нәбьн кӧ щьн ельми ԝә дьбьн, ле ша бьн, кӧ навед ԝә ль әʼзмана ньвисар ә».

Шабуна Иса

(Мәтта 11:25-27; 13:16-17)

21Ԝи чахи Әԝ бь Рʼӧһʼе Пироз ша бу у гот: «Шькьр наве Тә бә Баво, Хӧдане әʼрд у әʼзман, кӧ Тә әв тьшт жь зана у билана вәшартьн у ль бәр зарʼа вәкьр. Бәле Баво, чьмки аһа ль Тә хԝәш һат. 22Һәр тьшт жь Баве Мьн Мьнрʼа һатийә дайине. Кәсәк ньзанә Кӧрʼ кʼи йә, пештьри Баве у кәсәк ньзанә Бав кʼи йә, пештьри Кӧрʼ у йед кӧ Кӧрʼ бьхԝазә ԝанва Баве бьдә наскьрьне». 23У ԝе гаве сәр шагьртед Хԝәда вәгәрʼийа у ԝанарʼа башԛә гот: «Хԝәзи ль ԝан чʼәʼва, чь кӧ һун дьбиньн әԝ жи дьбиньн. 24Чьмки Әз ԝәрʼа дьбежьм, кӧ гәләк пʼехәмбәр у пʼадша хԝәстьн әԝ тьштед кӧ һун дьбиньн бьдитана, ле нәдитьн у әԝ тьштед кӧ һун дьбьһен бьбьһистана, ле нәбьһистьн».

Мәсәла самәрийе ԛәнщ

25Һьнге ԛанунзанәк рʼабу Әԝ щерʼьбанд у гот: «Дәрсдар, әз чь бькьм, ԝәки жийина һʼәта-һʼәтайе бьстиньм?» 26Әԝи жи ԝирʼа гот: «Ԛанунеда чь ньвисар ә? Тӧ чаԝа дьхуни?» 27Әԝи ле вәгәрʼанд у гот: «‹Хӧдан Хԝәдейе хԝә һʼьз бькә, бь тʼәмамийа дьле хԝә, бь тʼәмамийа щанийа хԝә, бь тʼәмамийа ԛәԝата хԝә у бь тʼәмамийа һʼьше хԝә›#10:27 Ԛануна Дӧщари 6:5. , ‹һәвале хԝә жи ԝәкә хԝә һʼьз бькә›#10:27 Ԛануна Кʼаһинтийе 19:18. ». 28У Иса ԝирʼа гот: «Тә рʼаст гот. Ӧса бькә у те бьжийи». 29Ле әԝи хԝәст хԝә рʼаст дәрхә, Исарʼа гот: «Һәвале мьн кʼи йә?» 30Иса ле вәгәрʼанд у гот: «Мәрьвәк һәбу, әԝ жь Оршәлиме бәржери Әриһайе дьбу. Әԝ кʼәтә дәсте ԛачаха у ԝана әԝ тәʼзи кьр, кʼӧтан у нивкӧшти һьштьн чун. 31Ӧса ԛәԝьми кӧ кʼаһинәк ԝе рʼеда дьһат. Гава әԝ дит, бәррʼа дәрбаз бу чу. 32Ӧса жи йәки леԝи һат, гьһиштә ԝи щийи, ль ԝи ньһерʼи, бәррʼа дәрбаз бу чу. 33Паше рʼеԝики самәри һат. Гава әԝ дит, гӧне ԝи ле һат. 34Әԝ незики ԝи бу, бьзьр у шәрав ль бьринед ԝи хьстьн, пʼечʼа у әԝ дани сәр кʼәркʼәдане хԝә бьрә меванхане у бона ԝи хәм кьр. 35Рʼожа дьне дӧ зив дәрхьстьн данә хԝәйе меванхане у гот: ‹Хԝәйитийе ль ви бькә, тӧ чь жи сәр ԝи зедә хәрщ ки, гава әз вәгәрʼийам, әзе ль тә вәгәрʼиньм›.

36Ньһа тʼәхмина тә, жь ԝан һәрсека кʼижан бу һәвале ԝи мәрьве кӧ кʼәтә дәсте ԛачаха?» 37Әԝи жи гот: «Әԝе кӧ гӧнә ле ани». Иса ԝирʼа гот: «Һәрʼә тӧ жи ӧса бькә».

Иса мала Мәртʼа у Мәрйәмеда

38Чахе рʼекʼәтьн чун, Иса кʼәтә гӧндәки. Кʼӧлфәтәк кӧ наве ԝе Мәртʼа бу Әԝ бьрә мала хԝә. 39Хушкәкә ԝе жи һәбу, наве ԝе Мәрйәм. Әԝа бәр ньгед Хӧдан рʼуньштьбу у гӧһдарийа хәбәред Ԝи дькьр. 40Мәртʼа жи кӧ гәләк тʼьвдарәкдитьнева гиро бу, һат сәкьни у Исарʼа гот: «Хӧдан, ԛәт хәма Тә нинә кӧ хушка мьн нава ве тʼьвдарәкдитьнеда әз тʼәне һьштьмә? Бежә ԝе кӧ али мьн бькә». 41Хӧдан ле вәгәрʼанд у готе: «Мәртʼа, Мәртʼа, тӧ бона гәләк тьшта хәма дьки у тʼәвиһәв дьби. 42Ле тʼәне тьштәк лазьм ә, әԝ пʼара ԛәнщ жи Мәрйәме хԝәрʼа бьжарт у жь ԝе найе стандьне».

Currently Selected:

Луԛа 10: KmrNTC

Highlight

Copy