Кʼаред Шандийа 15

Шеԝьра щьвина Оршәлимеда

1Һьнәк жь Щьһустане бәржери Әнтакйайе бьбун у бьра һин дькьрьн дьготьн: «Һәгәр һун ль гора әʼдәте Муса нәйенә сьнәткьрьне, һун хьлаз набьн»#15:1 Ԛануна Кʼаһинтийе 12:3. . 2Нава ԝан у Паԝлос, Барнабасда гәләк дәʼԝ-доз пешда һат, һьнге бьра ԛьрар кьр кӧ бона ве пьрсе Паԝлос у Барнабас, ӧса жи жь ԝан чәнд кәс һәвраз һәрʼьнә Оршәлиме, щәм шанди у бәрпьрсийара. 3Щьвине кӧ әԝ вәрʼекьрьн, әԝана Финикйе у Самәрйайева дәрбаз бун у һʼәму баԝәрмәндарʼа бона вәгәрʼандьна нәщьһуйа гьли дькьрьн, бь ве йәке әԝ гәләки ша кьрьн. 4Гава гьһиштьнә Оршәлиме, щьвине, шандийа у бәрпьрсийара әԝ ԛәбул кьрьн у чь кӧ Хԝәде тʼәви ԝан кьрьбу ԝанрʼа гьли кьрьн. 5Ле һьнәк баԝәрмәндед жь кʼомәла ферьсийа рʼабун готьн: «Гәрәке ван сьнәт кьн у ԝанарʼа бежьн, кӧ Ԛануна Муса хԝәй кьн».

6Шанди у бәрпьрсийар щьвийан, кӧ бона ве йәке бьшеԝьрьн. 7Пәй гәләк дәʼԝ-дозерʼа Пәтрус рʼабу сәр пʼийа у ԝанрʼа гот: «Гәли бьра! Һун хԝәха заньн кӧ Хԝәде рʼожед пешьнда әз нав ԝәда бьжартьм, кӧ нәщьһу хәбәра Мьзгинийе жь дәве мьн бьбьһен у баԝәр бькьн#15:7 Кʼаред Шандийа 10. . 8Хԝәдейе кӧ дьла занә да избаткьрьне, кӧ нәщьһу жи Ԝива ԛәбул ьн, гава Рʼӧһʼе Пироз да ԝан жи, чаԝа да мә#15:8 Кʼаред Шандийа 10:44; 2:4. . 9Нава мә у ԝанда тʼӧ фьрԛи данәни, бь баԝәрийе дьле ԝан паԛьж кьр. 10Иди чьма һун Хԝәде дьщерʼьбиньн, нирәки ӧса датиньнә сәр стуйе шагьрта, кӧ нә кал-бавед мә карьбунә бьбьн, нә жи мә? 11Әв йәк аһа набә, ле әм баԝәр дькьн, кӧ чаԝа әм бь кʼәрәма Хӧдан Иса хьлаз дьбьн, ӧса жи әԝ».

12Һьнге тʼәмамийа щьвате дәнге хԝә бьрʼи у гӧһе хԝә данә сәр готьнед Барнабас у Паԝлос кӧ Хԝәде бь дәстед ԝан чьԛас нишан у кʼәрәмәт нава нәщьһуйада кьрьбун. 13Гава әԝана кәрʼ бун, Аԛуб дәнг һьлда у гот: «Гәли бьра! Гӧһ бьдьнә мьн. 14Шьмһʼун гьли кьр, кӧ чаԝа пешийе Хԝәде рʼәʼма Хԝә ль нәщьһуйа кьрьбу, кӧ жь нава ԝан щьмәʼтәке дәрхә, ԝәки наве Ԝи һьлдьнә сәр хԝә. 15Ве йәкерʼа готьнед пʼехәмбәра жи ль һәв дьгьрьн, чаԝа ньвисар ә:

16‹Жь вьр шунда Әзе вәгәрʼьм,

коне Даԝьди кʼәти диса вәгьрьм,

чи ԝи жи кӧ хьраб буйә Әзе чекьм

у ԝи диса бьдьмә рʼагьртьне,

17ԝәки һʼәрче мәрьвед майин

у һʼәму нәщьһуйед кӧ наве Мьн сәр ԝан ә,

ль Хӧдан бьгәрʼьн.

18Әԝ Хӧдане кӧ ван тьшта һе жь дәԝред бәреда әʼйан кьрийә дьбежә›#15:18 Амос 9:11-12 у Ишайа 45:21. .

19Бона ве йәке жи әз аһа рʼе терʼа дьбиньм кӧ әм зәʼмәте нәдьнә әԝед кӧ жь нәщьһуйа бәрбь Хԝәде тен, 20ле әм нәʼмәке ԝанрʼа бьньвисьн, кӧ һʼәвза хԝә жь ԝан ԛӧрбанед кӧ пʼутарʼа тенә дайине бькьн, ӧса жи жь бенамусийе, гоште мьрар у хуне#15:20 Дәркʼәтьн 34:15-17; Ԛануна Кʼаһинтийе 18:6-23; 17:10-16. . 21Фәʼмдари йә кӧ һе ԛӧрʼнед дәрбазбуйида Ԛануна Муса һәр бажарида те һинкьрьне у һʼәму рʼожед шәмийа кʼьништада ԝе дьхуньн».

Щабдайина щьвина Оршәлиме

22Һьнге ль шандийа, бәрпьрсийара у тʼәмамийа щьвине хԝәш һат, кӧ жь нава хԝәда чәнд мәрьва бьбьжерьн у тʼәви Паԝлос у Барнабас бьшиньнә Әнтакйайе. Әв бун йед кӧ һатьнә шандьне: Щьһудайе кӧ жерʼа дьготьн Барсабо у Силас. Нава баԝәрмәндада әвана әʼйан бун. 23Бь дәсте ԝан әв нәʼмә шандьн аһа ньвисар:

«Әм бьрайед ԝәйә шанди у бәрпьрсийар сьлава ль ԝә бьрайед жь нәщьһуйайә Әнтакйайе, Сурйайе у Киликйайе дькьн.

24Мә бьһистийә кӧ жь нава мә һьнәк дәркʼәтьнә, кӧ мә хԝәха тʼәми нәданә ԝан, ле ԝан бь хәбәред хԝә зәʼмәт данә ԝә у фькьред ԝә тʼәвиһәв кьрьнә#15:24 Нав һьнәк дәстньвисарада әв жи һәйә: «Дьбежьн: ‹Гәрәке һун бенә сьнәткьрьне у Ԛануна Муса хԝәй кьн›». . 25Бона ве йәке ль тʼәмамийа шеԝьра щьвина мә хԝәш һат, кӧ әм мәрьва бьбьжерьн тʼәви бьрайед мәйә дәлал Барнабас у Паԝлос бьшиньнә щәм ԝә, 26йед кӧ әʼмьре хԝә данә наве Хӧдане мә Иса Мәсиһ. 27Аԝа әм Щьһуда у Силас дьшиньн, ԝәки әԝ жи ван тьшта бь дәве хԝә ԝәрʼа бежьн. 28Ль Рʼӧһʼе Пироз хԝәш һат, ӧса жи ль мә, кӧ тʼӧ бари нәдьнә сәр мьле ԝә, пештьри ван тьштед һʼәԝщә: 29Дури ԛӧрбанед пʼута, хуне, мьрарийе у бенамусийе бьн. Һәгәр һун хԝә жь ван тьшта хԝәй кьн, ԛәнщ ә. Һун хԝәш бьн, дә ма хатьре ԝә».

30Һьнге әԝ вәрʼекьрьн, бәржер чунә Әнтакйайе щьмәʼт щьвандьн, нәʼмә данә ԝан. 31Гава хԝәндьн, бона ԝе дьлдайине пʼьрʼ ша бун. 32Щьһуда у Силас жи кӧ пʼехәмбәр бун, бь гәләк хәбәра дьл данә баԝәрмәнда у әԝ шьдандьн. 33-34Гәләк ԝәхт ль ԝьр ман, паше баԝәрмәнда әԝ бь хер у сьламәт пашда шандьнә щәм ԝан, йед кӧ әԝ шандьбун.#15:33-34 Нав һьнәк дәстньвисар у ԝәлгәрʼандьнед кәвьнда әв жи һәйә: «Ле ль Силас хԝәш һат, ль ԝьр бьминә». 35Паԝлос у Барнабас жи Әнтакйайеда дьман, тʼәви гәләкед майин хәбәра Хӧдан һин дькьрьн у даннасин дькьрьн.

Рʼеԝитийа Паԝлосә дӧда (15:36–18:22)

Паԝлос у Барнабас жь һәвдӧ дьԛәтьн

36Чәнд рʼожа шунда Паԝлос готә Барнабас: «Ԝәрә әм вәгәрʼьн сәрики бьдьнә ԝан хушк-бьра, кʼижанарʼа мә һʼәму бажарада хәбәра Хӧдан даннасин кьрийә, дина хԝә бьдьне кʼа һʼале ԝан чаԝа йә». 37Барнабас дьхԝәст Йуһʼәннайе кӧ жерʼа Марԛос дьготьн жи тʼәви хԝә бьбьрана, 38ле Паԝлос рʼе терʼа нәдьдит, йе Памфилйайеда жь ԝан ԛәтийа у тʼәви ԝан шьхӧл нәкьр тʼәви хԝә бьбьрана#15:38 Кʼаред Шандийа 13:13. . 39Һьнге йа ԝан ль һәв нәгьрт, әв бу мәʼни жь һәв ԛәтийан. Барнабас Марԛос һьлда бь гәмийе чу Ԛӧбрьсе, 40Паԝлос жи Силас бьжарт у жь бьра спарти кʼәрәма Хӧдан бун, рʼекʼәтьн чун. 41Ль Сурйайе у Киликйайе дьгәрʼийан, щьвин дьшьдандьн.

Currently Selected:

Кʼаред Шандийа 15: KmrNTC

Highlight

Copy