Matfey 25
25
On kız
1Ozaman Gök Padişahlıı on kıza benzär olacek, angıları aldılar kandillerini da karşı etmää güveeyi çıktılar.
2Onnarın beşi aarifti, ama beşi diildi aarif.
3Diil aariflär, alıp kandillerini, almadılar kendilerinnän zeytin yaayı.
4Ama aarif olannar kandillerinnän aldılar zeytin yaayı da kaplar içindä.
5Çünkü güvää geç kaldı, onnar hepsi uyuklamaa başladılar da uyudular.
6Gecä yarısı işidildi bir büük ses: „Tä güvää geler, çıkın ona karşı!“
7Ozaman hepsi kızlar uyandılar da hazırladılar kandillerini.
8Diil aariflär dedilär aariflerä: „Verin bizä dä sizin zeytin yaayınızdan, zerä bizim kandillär süüner“.
9Ama aarif kızlar cuvap ettilär: „Yok nasıl verelim, zerä sora etişmäz hem bizä, hem sizä. Taa islää gidin satıcılara da satın alın kendinizä“.
10Açan gittilär satın alsınnar, geldi güvää. Hazır olannar onunnan girdilär düün erinä da kapuyu kitledilär.
11Ondan sora geldilär kalan kızlar da yalvardılar: „Çorbacı, çorbacı, aç bizä kapuyu!“
12Ama o cuvap etti onnara: „Dooru söleerim, ani tanımêêrım sizi!“
13Ölä ki, kuşku olun, zerä bilmeersiniz, ne günü hem ne saatta Adam Oolu gelecek.
Talantlar için örnek
14Bu olacek, nicä bir adam, gideceykän bir yabancı erä, çaardı çıraklarını da payetti onnara kendi varlıını.
15Birisinä verdi beş talant, ikincisinä verdi iki talant, üçüncüsünä verdi bir talant, herkezinä becerikliinä görä, sora gitti.
16O, angısı kabletti beş talant, gidip koydu onnarı alış-verişä da kazandı taa beş talant.
17Hep ölä yaptı ikincisi dä, ani kabletti iki talant. O da kazandı taa iki talant.
18Ama üçüncüsü, angısı kabletti bir talant, gidip kazdı bir kuyu er içindä da orayı sakladı çorbacısının talantını.
19Çok vakıttan sora bu çorbacı döndü geeri da istedi esap onnardan.
20O, angısı kablettiydi beş talant, geldi da getirdi taa beş talant, deyip: „Çorbacı, sän verdin bana beş talant, bän kazandım taa beş talant“.
21Çorbacı dedi ona: „Helal, sän ii hem inanç çıraksın, oldun inanç az işlerdä, koyacam seni çok işlerin üstünä. Katıl çorbacının şenniinä!“
22O, angısı kablettiydi iki talant, geldi da dedi: „Çorbacı, sän verdin bana iki talant. Bän onnarlan kazandım taa iki talant“.
23Çorbacı dedi: „Helal, sän ii hem inanç çıraksın, oldun inanç az işlerdä, koyacam seni çok işlerin üstünä. Katıl çorbacının şenniinä!“
24O, angısı kablettiydi salt bir talant, geldi da dedi: „Çorbacı, bilärdim seni, ani keskin adamsın, biçersin, neredä ekmedin hem toplêêrsın, neredä harman düümedin.
25Bän korktum, onuştan, gidip, gömdüm bu talantı er içinä. Şindi al, ne senin“.
26Çorbacı dedi ona: „Yaramaz hem haylaz çırak! Bilärdin, ani biçerim, neredä ekmedim hem toplêêrım, neredä harman düümedim.
27Onuştan sän lääzımdı koyasın paramı bankacılara#25:27 Bankacılar – bezirgännär, ani insandan paraylan alış-veriş yapêrlar da geeri gelirlän çevirerlär.. Şindi, açan döndüm geeri, alaceydım paramı gelirlän.
28Alın ondan bu talantı da verin ona, kimdä var on talant.
29Zerä kimdä var, ona taa verilecek, ama kimdä yok, ondan alınacek, neyi dä var.
30Ama bu yaramaz çıraamı atın dışankı karannaa. Orada olacek aalamak hem diş gıcırdatması“. /Söleyip bunu, dedi: „Kimin var kulaa işitmää deyni, ko işitsin!“/
Milletlerä daava
31Açan Adam Oolu Kendi metinniindä gelecek, hem hepsi ayoz angillär Onunnan, ozaman oturacek Kendi metinni çorbacılık skemnesindä.
32Hepsi milletlär toplanacek Onun önünä. Da ayıracek onnarı biri-birindän, nicä ayırêr güdücü koyunnarı tekelerdän.
33Koyunnarı ayıracek saa tarafına, ama tekeleri – sol tarafına.
34Ozaman Padişah deyecek saa tarafında olannara: „Gelin, Bobamın iisözlenmişleri, da elä alın Padişahlıı, ani hazırlanmış sizä dünneyin kurulmasından.
35Zerä aaçtım, da siz doyurdunuz Beni. Susuzdum, da verdiniz su, içeyim. Yabancıydım, kablettiniz Beni.
36Çıplaktım, giidirdiniz Beni. Hastaydım, geldiniz Bana. Kapanda kapalıydım, dolaştınız Beni“.
37Ozaman dooru olannar cuvap edeceklär: „Saabi, nezaman aaç Seni gördük da doyurduk? Eki nezaman susuzdun, da su verdik, içäsin?
38Nezaman yabancı Seni gördük da kablettik? Eki çıplak, da giidirdik?
39Nezaman hasta Seni gördük eki kapanda da Sana geldik?“
40Padişah cuvap edecek onnara: „Dooru söleerim sizä, kaç sıra bunnarı yaptınız bu en küçük kardaşlarımdan birisinä, Bana Kendimä yaptınız“.
41Sora deyecek sol tarafında olannara: „Gidin Bendän, siz betvalılar, diveç ateşä, ani hazırlanmış diavola hem onun angillerinä!
42Zerä aaçtım, da doyurmadınız Beni. Susuzdum, da su içeyim, vermediniz.
43Yabancıydım, kabletmediniz Beni. Hastaydım, kapanda bulundum, da gelmediniz Bana“.
44Ozaman onnar deyeceklär: „Saabi, nezaman gördük Seni aaç, susuz, yabancı, çıplak, hasta, kapanda da yardım etmedik Sana?“
45Ozaman O cuvap edecek: „Dooru söleerim sizä, ani kaç sıra bunu yapmadınız bu en küçük kardaşlarımdan birisinä, Bana yapmadınız“.
46Bunnar gideceklär diveç cezaya, ama dooru olannar – diveç yaşamaya».
Currently Selected:
Matfey 25: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
