İoan 6
6
Beş bin adam doyurulêr
1Bundan sora İisus gitti Galileya (Tiveriada) gölünün öbür tarafına.
2Çok insan gidärdi Onun ardına, zerä görärdilär nışannarı, ne yapardı hastalarlan.
3İisus pindi bayır üstünä da otururdu orada üürenicilerinnän barabar.
4Paskellä, iudeylerin yortusu, yaklaşardı.
5İisus baktı da gördü çok insan, ani gelärdi Ona. Ozaman dedi Filipä: «Näändan satın alacez okadar ekmek, ki bu insanı doyuralım?»
6Söledi bölä, ki denesin onu, zerä Kendisi bilärdi, ne yapacek.
7Filip cuvap etti: «İkiüz dinarlık ekmek dä etişmäz onnara, ki herkezi birär parça alabilsin».
8Öbür üürenici, Andrey, Simon Petrinin kardaşı, dedi:
9«Burada var bir çocuk, angısında var beş ekmek arpadan hem iki balık, ama nedir onnar bukadar insana?»
10İisus dedi: «Söleyin, insan otursun». Orada vardı çok çimen. İnsan oturdu erä. Hepsi vardılar bir beş bin adamın dolayında.
11İisus aldı ekmekleri, şükür etti Allaha, sora payetti /üürenicilerinä, üürenicileri da payettilär/ insana. Hep ölä payetti balıkları, herkezinä, kim nekadar istedi.
12Onnar doyunduktan sora, İisus dedi üürenicilerinä: «Toplayın imäk parçalarını, ki bişey zän olmasın».
13Topladılar da doldurdular oniki sepet ekmek parçasınnan, ani kaldıydı o inilmiş beş arpa ekmeendän.
14İnsan, açan gördü bu nışanı, ani yaptı İisus, dedi: «Budur hakına prorok, angısı lääzım gelsin dünneyä».
15İisus bilärdi, ani neetlenärdilär gelsinnär da zorlayıp yapsınnar Onu padişah. Onuştan O sauştu oradan da yalnız genä pindi bir bayır üstünä.
İisus gezer su üstündä
16Açan avşam oldu, Onun üürenicileri gittilär göl boyuna.
17Girdilär kayık içinä da gidärdilär gölün öbür tarafına, Kapernaum kasabasına. Karannık olduydu, ama İisus hep okadar gelmärdi onnara.
18Bir sert lüzgär esärdi, göl dä dalgalıydı.
19Açan üzdülär bir irmi beş-otuz stadi#6:19 25-30 stadi – 4,6–5,6 kilometra., gördülär ani İisus gezer su üstündä da kayaa yaklaşêr. Onnar korktular.
20«Bu Bänim, korkmayın!» – dedi İisus.
21Ozaman onnar istärdilär alsınnar Onu kayık içinä. Bundan sora birdän kayık etişti o erä, nereyi onnar gidärdilär.
Ömür ekmää
22Ertesi günü insannar, ani kaldılar gölün öbür tarafında, gördülär, ani orada vardı salt bir kayık. Annadılar, ani İisus girmedi üürenicilerinnän kayık içinä, ama üürenicilär Onsuz gittilär.
23Geldi başka birkaç kayık Tiveriada kasabasından yakın o erä, neredä idiydilär ekmek Saabinin iisözlemesindän sora.
24Ölä ki, insan, görüp, ani orada yok ne İisus, ne dä üürenicilär, pindi kayıklara da gitti Kapernaum kasabasına İisusu aaramaa.
25Açan buldular Onu gölün öbür tarafında, dedilär Ona: «Üüredici, nezaman Sän burayı geldin?»
26İisus cuvap etti onnara: «Dooru, dooru söleerim sizä: aarêêrsınız Beni, diil ani gördünüz nışannarı, ama ani idiniz ekmek da doyundunuz.
27Çalışın diil geçär imäk için, ama geçmäz imäk için, ani diveç yaşamaya götürer. Bunu sizä Adam Oolu verecek. Zerä Adam Oolunu Allah Boba nışannadı Kendi mühürünnän».
28Onnar dedilär: «Ne lääzım yapalım, Allahın işini deyni tamannayalım?»
29İisus cuvap etti: «Budur Allahın işi, ki inanasınız Ona, Kimi O yolladı».
30Buna onnar cuvap ettilär: «Ne nışan gösteräbilirsin bizä, ki görelim da inanalım Seni? Ne iş Sän yapêrsın?
31Bizim bobalar idilär manna#6:31 Manna – imäk, angısını Allah minuniyalı şekildä yollarmış çıfıtlara, açan onnar gezärmişlär çolda. çolda, nicä var yazılı: „Verdi onnara ekmek göktän“».
32İisus dedi: «Dooru, dooru söleerim sizä, ani Moisey vermedi ekmek göktän sizä, ama Benim Bobam verer hakına ekmek göktän.
33Zerä Allahın ekmää Odur, Kim göktän iner da yaşamak dünneyä verer».
34«Saabi, ver bizä herzaman bu ekmektän», – dedilär onnar.
35İisus dedi onnara: «Bänim yaşamak ekmää. Kim Bana geler, hiç acıkmaz, kim Bana inanêr, bir sıra bilä susuz kalmaz.
36Nicä söledim sizä, gördünüz Beni da hep okadar inanmadınız.
37Hepsi, ne Boba Bana verer, Bana geler. Kim dä Bana geler, onu hiç birzaman uuratmayacam dışarı.
38Zerä göktän indim, diil ani Kendi istediimi yapayım, ama Beni yollayan Bobanın istediini tamannayım.
39Beni Yollayanın istedii budur: birini bilä onnardan, ani Bana verdi, kaybetmeyim, ama bitki gündä hepsinä yaşamak vereyim.
40Budur Bobanın istedii: herkezin diveç yaşaması olsun, kim görer Oolu da inanêr, bitki gündä onu dirildecäm».
41İudeylär mırıldanardılar Ona karşı, zerä dedi: «Bänim göktän inmä ekmek».
42Deyärdilär: «Diil mi O – İisus, İosifin oolu, Angısının bobasını hem anasını biz tanıyêrız? Şindi neçin O deer: „Bän göktän indim?“»
43İisus cuvap etti: «Mırıldanmayın biri-birinizin aranızda.
44Kimsey yok nasıl Bana gelsin, eer Beni yollayan Boba onu çekmärseydi. Ona bitki gündä Bän ömür verecäm.
45Prorokların kiyatlarında yazılı: „Hepsi Allahtan üüredilmiş olaceklar“. Hepsi, kim Bobadan işitti hem üürendi, o Bana geler.
46Zerä kimsey Bobayı görmedi, Ondan kaarä, Kim Allahtan geldi. O Bobayı gördü.
47Dooru, dooru söleerim sizä: kim inanêr /Bana/, onun var diveç yaşaması.
48Bänim yaşamak ekmää.
49Sizin bobalarınız idilär manna çolda da öldülär.
50Göktän inän ölädir bir ekmek, ani kim onu iyer, hiç ölmeer.
51Bänim yaşamak ekmää göktän inmä. Kim bu ekmektän iyer, diveç yaşayacek. Ekmek, ani Bän vererim dünneyin yaşaması için, Kendi güüdäm».
52Açan iudeylär bu lafları işittilär, başladılar çekişmää biri-birinnän. Onnar deyärdilär: «Nesoy var nasıl bu Adam versin güüdesini, iyelim?»
53İisus dedi: «Dooru, dooru söleerim sizä, ani eer imärseydiniz Adam Oolunun güüdesini hem içmärseydiniz Onun kanını, siz yaşamak edenmeyeceniz.
54Kim iyer Benim güüdemi hem içer benim kanımı, onun var diveç yaşaması. Onu dirildecäm bitki gündä.
55Zerä Benim güüdäm – hakına imäk hem Benim kanım – hakına içmäk.
56Kim iyer Benim güüdemi hem içer Benim kanımı, o kalêr Bendä, Bän dä onda.
57Nicä diri Boba yolladı Beni, da yaşêêrım Bobanın kuvedinnän, hep ölä Beni dä iyän yaşayacek Benim kuvedimnän.
58Budur göktän inmä ekmek, diil nicä manna, ani bobalarınız idilär da öldülär. Kim iyer bu ekmää, diveç yaşayacek».
59İisus söledi bunnarı sinagoga içindä, açan üüredärdi insanı Kapernaum kasabasında.
Üürenicilär brakêrlar İisusu
60Bu laflardan sora çoyu üürenicilerindän dedilär: «Ne fasıl laflar, kim var nasıl kabletsin bu lafları?»
61Ama İisus bilärdi, ani Onun üürenicileri mırıldanêrlar, onuştan dedi: «Bu laflar sizä köstek mi?
62Ne deyeceniz, açan göreceniz Adam Oolunu kalkarak enidän orayı, neredä O baştan bulunardı?
63Yaşamak verän duhtur. Güüdä bişeyä yardım etmeer. Bu laflar, ani sizä söledim, duhtur hem ömürdür.
64Ama var sizdän kimisi inansız». İisus baştan bilärdi, kim inanmêêr hem kim Onu satacek.
65Da dedi: «Bunun için söledim, ani kimsey yok nasıl gelsin Bana, eer bu ona diilseydi verilmiş Bobamdan».
66Bu beterä çoyu Onun üürenicilerindän döndülär geeri da ondan sora Onunnan gezmedilär.
67Ozaman İisus, danışıp onikisinä, dedi: «Beki siz dä isteersiniz gitmää?»
68«Saabi, kimä gidelim? – dedi Simon Petri. – Sendä diveç yaşamak sözleri.
69Biz inandık da tanıdık, ani Sänsin Allahın Ayozu#6:69 Sänsin Allahın Ayozu: kimi tekstlerdä var yazılı «Sänsin Hristos, diri Allahın Oolu».».
70İisus cuvap etti: «Ayırmadım mı Bän sizi onikinizi? Ama sizdän birisi diavol».
71Bunu dedi onikisindän birisi için, Simon İskariotun oolu İuda için, angısı sonda sattı Onu.
Currently Selected:
İoan 6: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
