Jɔɔŋ 9
9
Yesu vaarɛ baal-la ba sɩ lʋla dɩ ʋ nyʋlɩma
1Yesu sɩ joŋ wombiiŋ vɩvɛŋ, ʋ na baal kʋbala, ba lʋlʋ dɩ ʋ nyʋlɩma nɛ. 2Ŋɩɩ nɛ Yesu harɩ-tooroo pɩɛsʋ, “Kʋhɩaŋ, kʋbɛɛ wʋbɔŋŋɔɔ nɛ ŋaa baala deeŋ nyʋlɩmɛ? Baal-la wʋbɔŋŋɔɔ nɛ koo ʋ nyɩmma arɩ ʋ naaŋ wʋbɔŋŋɔɔ nɛ?” 3Ŋɩɩ nɛ Yesu bʋla pɩba, “Baal-la nyʋlʋmʋŋ bɩ ʋ tɩtɩa lɛ koo ʋ nyɩmma arɩ ʋ naaŋ wʋbɔŋŋɔɔ lɛ lɩa. Ʋ nyʋlɩma dɩ nɩaa wuo na ŋɩɩ Wɩa dol-la sɩ wuo tɩŋ tɩntɩŋŋaa ʋ lɛ nɛ. 4La sɩ na wombiiŋ, má leŋ dɩ la tɩŋ tɩntɩmɩɩ-la nɩɩ-la sɩ tɩmmɛ dɩ mɩ tɩŋ. Bʋa kʋbala jaŋ yi nʋʋkala bɩra bɩ jaŋ wuo tɩŋ tɩntɩmɩɩ-la. 5Mɩ ha sɩ hɛ dʋnɩa lɛ ŋɩɩ, mɩ nɛ ŋaa dʋnɩa nɩaa pʋlʋmʋŋ.” 6Yesu sɩ bʋl ŋɩɩ, ʋ tʋ nantʋɔrʋŋ bil tinteeŋ a kaa buu tɩarɩŋ, a paa taa baal-la sɩaa, aŋ bʋla pʋ, 7“Sii tuu fuo kʋbala baa yɩrɛ Sɩlʋam (yɩrɩŋ deeŋ bʋbʋɔŋ nɛ ŋaa ‘mɩ tɩmʋ nɛ’) a sɔŋ ŋ sɩaa.” Ŋɩɩ nɛ baal-la sii tuu sɔŋ ʋ sɩaa fuo-la lɛ. Ʋ sɩaa suri, ʋ mɩɩra mʋ dɩa.
8Ŋɩɩ nɛ ʋ pɛ-jʋʋraa arɩ nɩalɩŋ kala fa sɩ naʋ dɩ ʋʋ sʋl kɩaa, ba pɩpɩɛsɛ dɔŋɔ, “Baala deeŋ dee fa bɩ hɔnɔ sʋsʋl kɩaa ŋɩɩ?” 9Dɔnsʋŋ sɩ ʋ nɛ, dɔnsʋŋ ma sɩ dɩ ʋ dee, ama ʋ ta nagʋ nɛ. Ŋɩɩ nɛ baal-la tɩtɩa bʋl, “Mɩ nɛ ŋɩɩ.”
10Ba pɩɛsʋ, “Ɛɛ nɛ ŋ ŋaa ŋ sɩaa suri?”
11Ŋɩɩ nɛ baal-la bʋl, “Baal-la ba sɩɩ yɩrɛ Yesu nɛ buu tɩarɩŋ, a paa taa mɩ sɩaa lɛ, aŋ bʋla pɩmɛ dɩ mɩ tuu Sɩlʋam fuo-la a sɔŋ. Mɩ tuu sɔŋ, mɩ sɩaa suri.”
12Ŋɩɩ nɛ ba pɩɛsʋ, “Nɩɩ lɛ nɛ ʋ hɛ?”
Baal-la bʋl, “Mɩ bɩ jɩŋ.”
Farisii tɩŋŋaa pɩɛsɛ nyʋlʋŋ-la ʋ vaarɩŋ wɩaa
13Ŋɩɩ nɛ ba kɛŋ baal-la fa sɩ nyʋlɩma a kaa mʋ Farisii tɩŋŋaa teeŋ. 14Tapʋlɩɩ-la Yesu sɩ buu tɩarɩŋ a taa baal-la sɩaa ba suri, ʋ ŋaa chɛ-wiesii-la chɛɛŋ nɛ. 15Ŋɩɩ nɛ Farisii tɩmma-la pɩɛsɛ baal-la ŋɩɩ ʋ sɩ ŋaa ʋ sɩaa suri. Baal-la bʋla pɩba, “Ʋ ŋaa tɩarɩŋ nɛ taa mɩ sɩaa, mɩ sɔŋ, mɩ sɩaa suri.”
16Ŋɩɩ nɛ Farisii tɩŋŋaa dɔnsʋŋ bʋl, “Wɩa dee bɩ baala deeŋ tɩma, bɛɛ wɩaa ʋ bɩ la chɛ-wiesii-la kɩsɩŋ lɛ ka to.” Ŋɩɩ nɛ dɔnsʋŋ ma sɩ, “Ɛɛ nɛ nʋʋ sɩ ŋaa wʋbɔŋ ŋaarʋ jaŋ wuo ŋaa wʋmagɩlaa deemba?” Ŋɩɩ nɛ ba kpaa balɩa. 17Farisii tɩmma-la bɩra pɩɛsɛ baal-la, “Ʋ sɩ suri ŋ sɩaa ŋɩɩ, nɩbɛɛ nɛ ŋ bɩɩnɛ arɩ ʋ ŋaa?” Ŋɩɩ nɛ baal-la sɩ, “Ʋ ŋaa Wɩa wʋlaabʋllʋ nɛ.”
18Ama Juu tɩŋŋaa kʋhɩasɩ-la sɩ, ba-na bɩ laa dii arɩ baal-la fa nyʋlɩma nɛ aŋ lɛɛlɛ nɩna ŋɩɩ, see dɩ ba yɩrɛ ʋ nyɩmma arɩ ʋ naaŋ. 19Ŋɩɩ nɛ ba yɩrɛ baal-la nyɩmma arɩ ʋ naaŋ a pɩɛsɛba, “Ma bie nɛ ŋ-laa? Ma sɩ, ma lʋlʋ dɩ ʋ nyʋlɩma nɛɛ? Ɛɛ nɛ ʋ ŋaa a nɩna lɛɛlɛ?” 20Ŋɩɩ nɛ baal-la nyɩmma arɩ ʋ naaŋ bʋl, “La jɩma arɩ la bie nɛ ŋ-la. La jɩma la lʋlʋ ma dɩ ʋ nyʋlɩma nɛ. 21Ama la bɩ jɩŋ ʋ sɩ ŋaa ŋɩɩ ʋ sɩaa suri, la bɩra bɩ jɩŋ nɩɩ-la ma sɩ ŋaa ʋ sɩaa suri. Má pɩɛsʋ, ʋ waa nɛ. Ʋ tɩtɩa jaŋ wuo bʋla pɩma.” 22Baal-la nyɩmma arɩ ʋ naaŋ faa fá Juu tɩmma-la nɛ. Ŋɩɩ nɛ tɩɩ ba bʋl ŋɩɩ. Juu tɩmma-la fa sɩ dɩ nɩɩ-la kala sɩ bʋla arɩ Yesu nɛ ŋaa Kirisito, Nɩɩ-la Wɩa sɩ lɩɩsa, ba jaŋ kiru ba Wɩɩchʋɔlɛ dɩa lɛ. 23Ŋɩɩ nɛ tɩɩ ʋ naaŋ arɩ ʋ nyɩmma bʋl dɩ ʋ waa nɛ, dɩ ba pɩɛsʋ.
24Ŋɩɩ nɛ Farisii tɩmma-la bɩra yɩrɛ baal-la ba sɩ lʋla dɩ ʋ nyʋlɩma a bʋl, “La jɩma arɩ baala deeŋ ŋaa wʋbɔŋ ŋaarʋ nɛ. Wɩa sɩpaaŋ bʋl wʋtɩtɩɩ pɩla.” 25Baal-la sɩ, “Mɩ-na bɩ jɩŋ dɩ baal-la ŋaa wʋbɔŋ ŋaarʋ koo ʋ bɩ wʋbɔŋ ŋaarʋ ŋaa. Ama wɩɩ-la mɩ-na sɩ jɩma nɛ ŋ-la: Mɩ fa nyʋlɩma nɛ, ama lɛɛlɛ mɩ sɩaa suro nɛ.”
26Ŋɩɩ nɛ ba pɩɛsʋ, “Wʋbɛɛ nɛ ʋ ŋaa ŋ lɛ? Ɛɛ nɛ ʋ ŋaa a suri ŋ sɩaa?”
27Ŋɩɩ nɛ baal-la bʋla pɩba, “Mɩ laa sɩpaaŋ bʋla pɩma nɛ, ka ma bɩ jegile. Bɛɛ nɛ tɩɩ ma bɩra chɩchɛ dɩ ma nɩɩ? Maa chɛ dɩ ma ma ŋaa ʋ harɩ-tooroo nɛɛ?”
28Ŋɩɩ nɛ ba tʋʋsʋ woruŋ aŋ bʋl, “Ŋ nɛ ŋaa ʋ harɩ-tooro, ama la-na ŋaa Mosis harɩ-tooroo nɛ. 29La jɩma arɩ Wɩa fa bʋl wɩaa pɩ Mosis nɛ, ama baala deeŋ-na, la bɩ jɩŋ ʋ sɩ lɩɩ lee-la kala.”
30Ŋɩɩ nɛ baal-la bʋl, “Wʋkpuŋkpere nɛ ŋ-la. Ma bɩ jɩŋ lee-la ʋ sɩ lɩa, ama ʋ nɛ suri mɩ sɩaa. 31La jɩma arɩ Wɩa bɩ wʋbɔŋ ŋaaraa wʋbʋlʋŋ ka jegili. Ʋʋ jegili nɩalɩŋ sɩɩ zilu nɛ aŋ pɛ ŋɩŋaa wɩalɩŋ ʋ sɩ cho. 32Dʋnɩa sɩ suomo a kaa kɔ jɩnɩŋ, ma ha nɩa arɩ nʋʋ ba sɩ lʋla dɩ ʋ nyʋlɩma, dɩ nʋʋ suri ʋ sɩaa? 33Dɩ baala deeŋ nɛ bɩ Wɩa teeŋ lɩa, ʋ bɩ wɩɩŋ deeŋ wuo ŋaa.”
34Ŋɩɩ nɛ ba bʋla pɩ baal-la, “Ba paala lʋlʋŋ dɩ ŋ ŋaa wʋbɔŋ ŋaarʋ nɛ, ka ŋ ma saa chɩchɛ dɩ ŋ dagɛla koo?” Ŋɩɩ nɛ ba kiru ta ʋ lɩɩ Wɩɩchʋɔlɛ dɩa-la lɛ.
Nɩɩ-la sɩ bɩ Wɩa Dɩŋ-zɔmʋŋ kɛnɛ, ʋ nyʋlɩma nɛ
35Yesu sɩ nɩa dɩ ba kiri baal-la ta ʋ lɩɩ Wɩɩchʋɔlɛ dɩa-la tʋɔŋ, ʋ mʋ chɛ naʋ a pɩɛsʋ, “Ŋ laa Nuhuobiine Bie wɩaa dii nɛɛ?” 36Ŋɩɩ nɛ baal-la pɩɛsʋ, “Kʋbɛɛ nɛ ŋɩɩ? Dagɛmɛ tɩɩna dɩ mɩ laa ʋ wɩaa dii.”
37Ŋɩɩ nɛ Yesu bʋla pʋ, “Ŋ paala naʋ nɛ. Ʋ nɛ nɩɩ-la sɩɩ bʋl wɩaa ŋ teeŋ ŋɩɩ.”
38Ŋɩɩ nɛ baal-la tuu kpirimi Yesu sɩpaaŋ a chʋɔlʋ aŋ bʋl, “Mɩ Tɩɩna, mɩ laa ŋ wɩaa dii nɛ.”
39Ŋɩɩ nɛ Yesu bʋl, “Mɩ kɔ dʋnɩa dɩ mɩ ŋaa dɩ nɩalɩŋ sɩ nyʋlɩma sɩaa suri nɛ, ka dɩ mɩ ŋaa dɩ nɩalɩŋ sɩɩ na nyʋlɩmɛ.”
40Farisii tɩmma-la sɩ chɩŋ nɩmɛ a nɩɩ Yesu sɩ bʋl ŋɩɩ, ba pɩɛsʋ, “Ŋ bɩɩna la ma nyʋlɩma nɛɛ?”
41Ŋɩɩ nɛ Yesu bʋla pɩba, “Dɩ ma nɛ fa nyʋlɩma a bɩ wʋtɩtɩɩ jɩŋ, ma fa bɩ wɩɩkala cheye. Ama lɛɛlɛ ma sɩ folo bʋl dɩ maa na nɛ a jɩŋ wʋtɩtɩɩ ŋ-la, ŋɩɩ-na ma cheeriŋ ha hɛ ma lɛ nɛ.”
Currently Selected:
Jɔɔŋ 9: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
