WƖAA DƖ-SUOMUŊ 48

Manasɛ arɩ Efirem wɩaa

1Bʋa kʋbala lɛ ba bʋla pɩ Josɛf arɩ ʋ nyɩmma wɩɩlʋ nɛ. Ŋɩɩ nɛ ʋ kɛŋ ʋ hambolibiisiŋ balɩa, Manasɛ arɩ Efirem a to ʋ harɩŋ mʋ dɩ ʋ na ʋ nyɩmma Jekɔb. 2Ba sɩ bʋla pɩ Jekɔb arɩ ʋ bie Josɛf kɔ dɩ ʋ naʋ nɛ, ʋ nyaga sii a hɔŋ bɔsɔ nyuŋ.

3Ŋɩɩ nɛ Jekɔb bʋla pɩ Josɛf a bʋl, “Wɩɩjarɩbakɔ kɛŋ ʋ tɩtɩa kʋ dagɛmɛ nɛ duosoo tʋɔŋ Bɛtɛl lɛ Kɛnaŋ tinteeŋ a bʋl dɩ ʋ jaŋ pɛ mɩ lɛ. 4Ʋ sɩ ʋ jaŋ ŋaa dɩ mɩ dʋa dɩ mɩ doho pʋŋ a ŋaa tintee daŋ. Ʋ sɩ ʋ jaŋ joŋ tinteeŋ deeŋ pɩ mɩ doho nɩaa kala a kaa mʋ wuu.

5Efirem arɩ Manasɛ, ŋ hambolibiisi-la balɩa ŋ sɩ lʋla Ijipiti tinteeŋ lɛ ka mɩ-na kɔ daha jaŋ ŋaa mɩ kɩaa arɩ mɩ sɩ tɩɩ Rubiŋ arɩ Simioŋ ŋɩɩ. 6Biiri-la ŋ sɩ jaŋ lʋl ba harɩŋ, ŋ ma kɩaa nɛ ŋɩɩ, ba malɩmaba sɩ tɩɩ lere-la kala, ba nɛ ba ma jaŋ tɩɩ. 7Mɩ sɩ lɩɩ Mesopotemia lɛ aa kɔ, ŋ naaŋ Rakɛl sʋʋ Kɛnaŋ tinteeŋ lɛ dɩ mɩ ka mʋa, ka dɩ mɩ yi Ɛfɩrata. Mɩ joŋu hugi Ɛfɩrata wombiiŋ lɛ (ʋ nɛ ha Bɛtɩlɛhɛm). Ŋɩɩ leŋ mɩ tʋɔŋ chei woruŋ lee-la.”

8Jekɔb sɩ na Josɛf hambolibiisiŋ, ŋɩɩ nɛ ʋ pɩɛsɛ, “Kʋbɛɛba nɛ ŋ-la?”

9Ŋɩɩ nɛ Josɛf bʋla pɩ ʋ nyɩmma, “Hambolibiisi-la Wɩa sɩ joŋo pɩmɛ Ijipiti tinteeŋ lɛ nɛ ŋɩɩ.” Ŋɩɩ nɛ Iziral bʋl, “Kɛmba kaa kɔ dɩ mɩ sʋl Wɩa pɩba.”

10Bʋa-la lɛ dɩ Iziral hɩɛsa, ʋ sɩaa bɩra bɩ na woruŋ. Ŋɩɩ nɛ Josɛf kɛŋ ʋ hambolibiisi-la kaa mʋ yi ʋ nyɩmma, ʋ guoriba.

11Iziral bʋla pɩ Josɛf, “Mɩ fa bɩ bɩɩna arɩ mɩ jaŋ bɩra naŋ, aŋ ka Wɩa leŋ mɩ naŋ, ŋ dɩ ŋ biiriŋ kala.”

12Ŋɩɩ nɛ Josɛf kɛŋ ʋ biiri-la paa Jekɔb naasɩŋ lɛ aŋ tuu kpirimi a kɛŋ ʋ nyuŋ chugili. 13Ŋɩɩ nɛ Josɛf kɛŋ hambolibiisi-la kɔ ba chɩŋ ʋ nyɩmma sɛmɛ. Efirem chɩŋ Josɛf nadiiŋ aŋ hɛ Iziral nagʋa, ka Manasɛ ma hɛ Josɛf nagʋa aŋ chɩŋ Iziral ma nadiiŋ. Josɛf kɛmba mʋ kpagɛ Iziral. 14Ŋɩɩ nɛ Iziral kɛŋ ʋ nɩsaa gɩrɛ a joŋ ʋ nadiiŋ daŋ Efirem nyuŋ lɛ, ba tʋɔŋ kʋbie, aŋ joŋ ʋ nagʋa daŋ Manasɛ kʋhɩaŋ nyuŋ lɛ.

15Ʋ sʋl Wɩa pɩ Josɛf a bʋl,

“Mɩ nyɩmma Abɩraham arɩ Aɩzɩk sɩɩ to Wɩa-la,

ʋ nɛ pɔmɛ mɩ mɩɩsɩŋ kala lɛ aa kɔ jɩnɩŋ.

16Dɩ Wɩa tɩndaarʋ-la sɩ lɩɩsɛmɛ mɩ wʋjʋʋlaa kala lɛ

pɛ hambiisiŋ deemba lɛ,

a leŋ dɩ mɩ yɩrɩŋ yɩrɛ,

dɩ mɩ nyɩmma Abɩraham arɩ Aɩzɩk yɩrɩŋ ma yɩrɛ,

a ŋaa dɩ ba pʋŋ

a su tinteeŋ kala.”

17Josɛf sɩ na dɩ ʋ nyɩmma joŋ ʋ nadiiŋ daŋ Efirem nyuŋ lɛ ʋ tʋɔŋ chei. Ʋ kɛŋ ʋ nyɩmma nɩsɩŋ lɛ dɩ ʋ kaa joŋo daŋ Manasɛ nyuŋ lɛ. 18Josɛf bʋla pɩ ʋ nyɩmma a bʋl, “Ŋɩɩ dee, Manasɛ nɛ kʋhɩaŋ. Joŋ ŋ nadiiŋ daŋ ʋ nyuŋ lɛ.”

19Ama ʋ nyɩmma vɩa aŋ bʋl, “Mɩ bii, mɩ jɩŋ wɩɩ-la mɩ sɩɩ ŋaa nɛ, ʋ ma doho jaŋ pʋŋ dɩ ʋ ma ŋaa babiibal, ama ʋ ŋaana nɛ jaŋ kɩɩʋ. Ʋ doho nɩaa jaŋ pʋŋ a ŋaa tintee daŋ.” 20Ŋɩɩ nɛ ʋ sʋl Wɩa pɩba tapʋlɩɩ-la aŋ bʋl,

“Dɩ Iziral tɩŋŋaa nɛ suri ba niiŋ a sʋl Wɩa dɩ ʋ pɛ nʋʋ lɛ,

ba jaŋ bʋl, ‘Wɩa jaŋ leŋ dɩ ŋ nagɛ Efirem arɩ Manasɛ.’ ”

Ŋɩɩ nɛ tɩɩ Efirem laa Manasɛ sɩpaaŋ.

21Ŋɩɩ nɛ Iziral bʋla pɩ Josɛf a bʋl, “Mɩ sʋʋŋ yie nɛ, ama Wɩa jaŋ pɛ ŋ lɛ a mɩɩra kɛnɩŋ mʋ ŋ nyɩmmaba tinteeŋ. 22Ŋ ma sɩ bɩra kɩɩ ŋ naambiiriŋ, ŋ nɛ mɩ jaŋ joŋ Sɛkɛm tintee-la pa, lee-la mɩ sɩ kɛŋ mɩ tokobiiŋ arɩ mɩ toŋ yuo laa Amɔrɩ tɩŋŋaa teeŋ.”

Currently Selected:

WƖAA DƖ-SUOMUŊ 48: SIS

Highlight

Copy