WƖAA DƖ-SUOMUŊ 26

Aɩzɩk arɩ Abɩmɛlɛk

1Losuŋ bɩra jʋʋ tintee-la, arɩ Abɩraham mɩɩsɩŋ lɛ losuŋ fa sɩ jʋʋ ŋɩɩ. Ŋɩɩ nɛ Aɩzɩk sii mʋ Gɛra tinteeŋ, Fɩlɩsɩtɩa tɩŋŋaa kuoro Abɩmɛlɛk teeŋ. 2Ŋɩɩ nɛ La TƖƖNA kɛŋ ʋ tɩtɩa dagɛ Aɩzɩk a bʋla pʋ, “Sɩ́ Ijipiti tinteeŋ mʋ, hɔŋ lee-la mɩ sɩ jaŋ dagɩŋ. 3Hɔŋ tinteeŋ deeŋ lɛ mʋa, mɩ jaŋ chɩŋ ŋ harɩŋ a pɛ ŋ lɛ. Ŋ dɩ ŋ doho nɩaa nɛ mɩ jaŋ joŋ leriŋ deeŋ pa arɩ mɩ sɩ bil niiŋ pɩ ŋ nyɩmma Abɩraham ŋɩɩ. 4Mɩ jaŋ leŋ dɩ ŋ doho nɩaa pʋŋ a nagɛ chɛnwʋlaa sɩ hɛ wɩa-nyuŋ a joŋ leriŋ deeŋ kala pɩba. Ba lɛ nɛ mɩ jaŋ to pɛ dʋnɩa nɩaa kala lɛ, 5bɛɛ wɩaa Abɩraham ŋaa wɩalɩŋ kala mɩ sɩɩ chɛ nɛ, aa to wɩalɩŋ kala mɩ sɩ daga arɩ wɩalɩŋ kala mɩ sɩ bile.” 6Ŋɩɩ nɛ Aɩzɩk hɔŋ Gɛra tinteeŋ lɛ.

7Taŋ-la nɩaa sɩ pɩɛsʋ ʋ haala wɩaa, fawʋllʋŋ kɛnʋ. Ʋ bʋl dɩ ʋ dɩhaala nɛ, bɛɛ wɩaa ʋ bɩɩna ba jaŋ kpʋʋ a tɩŋ Rɩbɛka sɩ zɔmɔ wɩaa.

8Aɩzɩk sɩ hɔŋ nɩmɛ a dieni, tapʋlɩɩ kʋbala Fɩlɩsɩtɩa tɩŋŋaa kuoro Abɩmɛlɛk to tokoro a na Aɩzɩk arɩ Rɩbɛka dɩ baa tɩrɩgʋ. 9Ŋɩɩ nɛ Abɩmɛlɛk yɩrɛ Aɩzɩk a bʋla pʋ, “Ŋ haala nɛ tolo-la, bɛɛ nɛ tɩɩ ŋ bʋl dɩ ŋ dɩhaala nɛ?”

Ŋɩɩ nɛ Aɩzɩk bʋla pʋ, “Mɩ fa bɩɩna arɩ ma jaŋ kpʋmɛ dɩ mɩ nɛ sɩ mɩ haala nɛ.”

10Ŋɩɩ nɛ Abɩmɛlɛk pɩɛsʋ, “Bɛɛ nɛ ŋ ŋaa la lɛ ŋ-la? Baalaa deemba dɔŋɔ fa jaŋ wuo kɛŋ ŋ haal-la pɩŋ dɩ ʋ ŋaa disiniŋ a pɩla.”

11Ŋɩɩ nɛ Abɩmɛlɛk bʋla pɩ ʋ nɩaa kala, “Nɩɩ-la kala sɩ jaŋ walɩmɛ baala deeŋ koo ʋ haala, mɩ jaŋ leŋ dɩ ba kpʋʋ.”

12Ŋɩɩ nɛ Aɩzɩk bil baga tintee-la lɛ a duu kɩaa. Jɩna-la tɩtɩa ʋ na kɩaa woruŋ, bɛɛ wɩaa La TƖƖNA pɛ ʋ lɛ nɛ. 13Ŋɩɩ nɛ Aɩzɩk dʋa kɩaa, kɩalɩŋ pʋŋ ŋɩɩ halɩɩ ʋ kʋ kɛŋ kɩaa woruŋ. 14A tɩŋ ʋ fa sɩ kɛŋ piesee, nɛsɩŋ arɩ tɩntɩnnaa yʋgɛ ŋɩɩ, Fɩlɩsɩtɩa tɩŋŋaa yaraa bibieri ʋ nyuŋ. 15Ŋɩɩ nɛ Fɩlɩsɩtɩa tɩŋŋaa paa hagɩla tɔ vile-la kala Aɩzɩk nyɩmma Abɩraham fa sɩ ŋaa ʋ tɩntɩnnaa lu.

16Ŋɩɩ nɛ Abɩmɛlɛk bʋla pɩ Aɩzɩk, “Sii la tinteeŋ lɛ, bɛɛ wɩaa ŋ dolie kɩɩla nɛ.”

17Aɩzɩk sii lee-la a mʋ hɛ ʋ lɛbɩŋ Gɛra fuonaaŋ lɛ a hɔŋ nɩmɛ. 18Ŋɩɩ nɛ Aɩzɩk bɩra chaarɛ vile-la kala ʋ nyɩmma Abɩraham fa sɩ luo Fɩlɩsɩtɩa tɩŋŋaa paa hagɩla tɔ ʋ nyɩmma sʋʋŋ harɩŋ lɛ, aŋ bɩra hɛ yɩra-la tɩtɩa ʋ nyɩmma fa sɩ hɛ pɩ vile-la.

19Ŋɩɩ nɛ Aɩzɩk tɩntɩnnaa lu viliŋ fuonaa-la lɛ a na lɩɩzɔmʋŋ nɩmɛ. 20Ŋɩɩ nɛ Gɛra tɩŋŋaa kʋdaaraa kɛŋ Aɩzɩk kʋdaaraa yuo yuosuŋ a bʋl dɩ ba nɛ tɩɩ vil-la. Ŋɩɩ nɛ Aɩzɩk hɛ vil-la yɩrɩŋ Ɛsɛk. Ɛsɛk bʋbʋɔŋ nɛ: ba kaa yuo yuosuŋ nɛ. 21Ŋɩɩ nɛ ba bɩra lu dɔŋɔ, ba bɩra yuo yuosuŋ ʋ ma wɩaa, ʋ bɩra hɛ ʋ ma yɩrɩŋ Sɩtɩna. Sɩtɩna bʋbʋɔŋ nɛ: dʋndɔnnʋŋ.

22Ŋɩɩ nɛ ʋ sii nɩmɛ a bɩra mʋ lu viliŋ dɔŋɔ. Ba bɩ ʋ-na wɩaa kaa yuo dɔŋɔ. Ʋ hɛ ʋ yɩrɩŋ Rehobɔf aŋ bʋl, “La TƖƖNA pɩla leriŋ nɛ dɩ la hɔŋ arɩ fɩɛlɩŋ a dʋa.”

23Aɩzɩk sii nɩmɛ a bɩra mʋ Bɛɛsɩba tinteeŋ. 24Tɩtaŋ-la tɩtɩa nɛ Wɩa kɛŋ ʋ tɩtɩa kʋ dagʋ aŋ bʋl, “Mɩ nɛ ŋaa ŋ nyɩmma Abɩraham Wɩa. Sɩ́ leŋe dɩ fawʋllʋŋ kɛnɩŋ. Mɩ hɛ ŋ harɩŋ, mɩ jaŋ pɛ ŋ lɛ a leŋ dɩ ŋ doho nɩaa pʋŋ a tɩŋ mɩ tɩntɩnna Abɩraham wɩaa.”

25Ŋɩɩ nɛ Aɩzɩk saa Wɩɩsʋllɩ koruŋ nɩmɛ aa yɩrɛ La TƖƖNA yɩrɩŋ aŋ hɛ ʋ lɛbɩŋ. Ʋ tɩntɩnnaa ma lu viliŋ nɩmɛ.

26Ŋɩɩ nɛ Abɩmɛlɛk arɩ Ahuzaf, nɩɩ-la sɩ bʋl wɩaa chɩchagɩlʋ, arɩ ʋ laalɩyuori-hɩaŋ Fiko lɩɩ Gɛra tinteeŋ a mʋ dɩ ba na Aɩzɩk. 27Ŋɩɩ nɛ Aɩzɩk pɩɛsɛba, “Bɛɛ nɛ tɩɩ maa kɔ dɩ ma namɛ lɛɛlɛ? Ma fa bɩ mɩ wɩaa cho a kirimi ma jaŋ lɛ.”

28Ŋɩɩ nɛ ba bʋl, “La na arɩ La TƖƖNA chɩŋ ŋ harɩŋ nɛ woruŋ. Ŋɩɩ nɛ laa chɛ dɩ la bil niiŋ la dɩŋ pɛgɛ, a ŋmɩɛsa pɩ dɔŋɔ 29arɩ ŋ bɩ jaŋ ŋaala wʋbɔŋ, arɩ la sɩ bɩŋ wʋbɔŋ ŋaa ŋɩɩ aŋ kiriŋ sɔm, ama lɛɛlɛ La TƖƖNA pɛ ŋ lɛ nɛ.”

30Ŋɩɩ nɛ Aɩzɩk ŋaa kʋdiilee ba gbiele pɩba, ba dii aŋ nyʋa. 31Taŋ sɩ pʋla chʋchʋɔŋ, ba ŋmɩɛsa pɩ dɔŋɔ. Ŋɩɩ nɛ Aɩzɩk hɛba wombiiŋ lɛ, ba leŋu ʋ hɔŋ arɩ yarɩfɩɛlaa.

32Tapʋlɩɩ-la nɛ Aɩzɩk tɩntɩnnaa kʋ bʋl vil-la ba sɩ luo wɩaa pʋ, “La yi lɩɩŋ lɛ nɛ.” 33Ʋ hɛ vil-la yɩrɩŋ Sɩba. Vil-la sɩ hɛ taŋ-la lɛ ma yɩrɩŋ nɛ Bɛɛsɩba. Arɩ jɩnɩŋ taŋ-la yɩrɩŋ nɛ ha ŋɩɩ.

34Ɛsɔ sɩ ŋaa jɩsɩŋ mahɩŋ balɩa, ʋ jaa Hiti tɩŋŋaa toloo balɩa nɛ. Dɔŋɔ yɩrɩŋ nɛ Judif a ŋaa Bɛɛrɩ tolo, dɔŋɔ ma yɩrɩŋ nɛ Basɩmaf a ma ŋaa Ɛlɔŋ tolo. 35Haalaa deemba bɩ leŋe Aɩzɩk arɩ Rɩbɛka tʋɔŋ pɩŋ dɩ-bala.

Currently Selected:

WƖAA DƖ-SUOMUŊ 26: SIS

Highlight

Copy