Atɔ Lɛsunahɛ 6
6
Okpin Asienɔ Amʋ Maɩn
1Mɩ ansɩtɔ ɩnʋ a, Okufabi amʋ lɛmaɩn atɔ asienɔ amʋʋ bɔpʋtan ɔwʋlʋ amʋ ɔnɔ amʋtɔ kʋlɛ. Ɩnʋ nonuá akɩankpapʋ ana amʋtɔ ɔkʋlɛ lɛlɛ ɔnɔ. Mʋ ɔmɛ lɛlɩn fɛ ɔprada ɔbɛɛ, “Ba!” 2Nɛkɩ a, ɔpɔnkɔ fututu ɔkʋ nɩ. Mʋsʋ odɩnkapʋ amʋ dɛ ɩta, bobun mʋ owiepa. Ɔlɔpʋ ɔpɔnkɔ amʋ kplɩ ba ɔsʋlʋsʋ fɛ ɩsʋ ogyipʋá ɔtra ɔba bɔkɔ ɩsa tsɔtsɔɔtsɔ, ɔtra gyi ɩsʋ.
3Brɛá Okufabi amʋ lɛmaɩn atɔ nyɔsɩá bɔpʋtan ɔwʋlʋ amʋ ɔnɔ a, nonuá akɩankpapʋ amʋtɔ onyɔsɩ lɛblɩ ɔbɛɛ, “Ba!” 4Ɔpɔnkɔ pɛpɛ ɔkʋ lɛdalɩ ba. Bɛha mʋsʋ ɔdɩnkapʋ ɔdayi ɩya anyɔ tɩntɩn kʋ. Bɛha mʋ tumiá ɔlɛ iwilwii lɛ ɔyɩtɔ. Mʋ́ sʋ ɩsa lɛda ɔtɩnɛgyiɔtɩnɛ, aha bɔmɔ aba.
5Brɛá Okufabi amʋ lɛmaɩn atɔ sasɩá bɔpʋtan ɔwʋlʋ amʋ ɔnɔ a, nonuá akɩankpapʋ amʋtɔ ɔsasɩ lɛblɩ ɔbɛɛ, “Ba!” Nɛkɩ a, ɔpɔnkɔ bibi ɔkʋ nɩ. Mʋsʋ ɔdɩnkapʋ amʋ dɛ skeeli. 6Ɩnʋ nonu ɔmɛ kʋ lɛdalɩ tsu mbwɩ amʋʋ bʋtsie nkpa ana amʋtɔ ɔbɛɛ, “Ayo olonka kʋlɛ ntɛ ɩmɔ olonka asa ɩbɔ́bwɛ ɛkɛwʋlɛ ɩkɔka.#6:6 Ilosuna ánɩ́ ɩsa sʋ atɔ bɛ́hɩɛ wa ibia. Tamɛ máyinta nfɔ mʋ́a waɩn-nyi mʋ́.”
7Brɛá Okufabi amʋ lɛmaɩn atɔ nasɩá bɔpʋtan ɔwʋlʋ amʋ ɔnɔ a, nonuá akɩankpapʋ amʋtɔ ɔnasɩ lɛblɩ ɔbɛɛ, “Ba!” 8Ɩnʋ nowun ɔpɔnkɔ ɔkʋá mʋ ɩwɩ igyi fɛ nsuo. Mʋsʋ ɔdɩnkapʋ amʋ ɩda gyi Lowu. Afulitɔ ɛ buo mʋ. Bɛha amʋ́ tumiá nɩ beye ɔyɩtɔ aku-ana a, bʋmɔ iku-kʋlɛ. Bʋpʋ ɔdayi ɩya anyɔ mʋ́a akʋn, ɩlɔ mʋ́a ɔsʋlʋsʋ mbwɩkɩta-atɔ mɔ amʋ́.
9Brɛá Okufabi amʋ lɛmaɩn atɔ nusɩá bɔpʋtan mʋ́ ɔnɔ a, nowun Bulu asʋntɔ akɩtapʋ amʋ ɔkla afɔdɩɛ-ɔswɩ amʋ ayasɩ. Bulu asʋn amʋ ɩwɩ adansɩɛ gyi sʋ bɔmɔ amʋ́. 10Ɩnʋ bɔsʋra okitikiti kʋklʋkʋʋ bɛɛ, “Oo! Bulu Otumipʋ, fʋ ɩwɩ lɔwankɩ, fʋbʋ ɔnɔkwalɩ. Ɔmɛnkɛ fégyi ɔsʋlʋ anfɩsʋ aha asʋn, fɩtɛ anɩ obugya tsu anɩ amɔpʋ amʋ wa?” 11Mʋ́ ɔma a, bɛha amʋ́ fɛ́ɛ́ liga fututu, bɛbla amʋ́ bɛɛ, bʋtra tsia kpalobi. Bʋtsia yɔfʋn brɛá bamɔ amʋ́ aba asumpʋ ahogyipʋ amʋ ɛ, amʋ́ ɔdʋdʋɔ lafʋn asa.
12Brɛá ndɛkɩ a, Okufabi amʋ lɛmaɩn atɔ siesɩá bɔpʋtan ɔwʋlʋ amʋ ɔnɔ. Ɔsʋlʋ lɛkpɩnkɩ kʋklʋkʋʋ, owi lebi tuun fɛ tati bibi, ɔtsra ɛ lɛpɛ kɔɔ fɛ obugya. 13Mʋʋ ntsrakpabi bɛkpakpa bun ɔsʋlʋsʋ, fɛ afu kpɔnkpɔɔnkpɔntɩ latsʋn kpakpa pɔntɔ-abiá ɩmɔkʋdan bun. 14Nwʋlʋta lokunta fɛ ɔwʋlʋ, tsu mʋ́ natɩ. Abʋ mʋ́a ɔpʋ nsɩnɛ ɔsʋlʋ fɛ́ɛ́ lɛdalɩ mʋ́ otsiakpa. 15Ɩnʋ nowun ánɩ́ ɔyɩtɔ awie pʋ́ ahandɛ pʋ́ ɩsa ɔnɔ alɩɩpʋ, asikafɔ, atumipʋ, nkpábi mʋ́a ɩwɩsʋ atsiapʋ beyeŋain abʋsʋ abwi alatɔ pʋ́ abwi mbɔtɔ. 16Bɛbla abʋ mʋ́a abʋta amʋ bɛɛ, “Mlɩkpa bun anɩsʋ, mɛnɩ owie obiasʋ otsiapʋ amʋ omóowun anɩ, Okufabi amʋ ɔmɛ́ɛbɩtɩ anɩ ɩsʋ! 17Tsufɛ amʋ́ aha ɩsʋbɩtɩ ɛkɛ amʋ lafʋn. Ma ɔbɛ́talɩ lɩɩ mʋ́ ɔnɔ?”
Currently Selected:
Atɔ Lɛsunahɛ 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation