Atɔ Lɛsunahɛ 5
5
Okufabi Amʋ Ɔwʋlʋ Amʋ Tii
1Ɩnɩ ɔma a, nowun ánɩ́ ɔha amʋʋ otsie owie obia amʋsʋ amʋ dɛ ɔwʋlʋ kuntahɛ mʋ gyɔpɩtɔ. Bɔwanlɩn atɔ dɩnka mʋ́ nkpa mʋ́a mʋ́ ɔma fɛ́ɛ́, bɔpʋ okpin tan mʋ́ ɔnɔ tse sienɔ. 2Ɩnʋ nowun Bulu-ɔbɔpʋ otumipʋ ɔkʋá ɔdɛkplʋn fɩtɛ ɔbɛɛ, “Ma lɔfʋn ánɩ́ ɔbɛ́maɩn atɔ asienɔ anfɩ, tii ɔwʋlʋ amʋ ɔnɔ?” 3Bʋmenya ɔhaa ɔsʋsʋ ntɛ ɔsʋlʋsʋ ntɛ ɔsʋlʋ ayasɩá ɔbɛ́talɩ tii mʋ́ ɔnɔ, kla mʋ́. 4Ɩnɩ sʋ nɛhɩɛ su, tsufɛ bʋmenya ɔha ánɩ́ ɔlɔfʋn, obétii ɔwʋlʋ amʋ ntɛ ɔbɛ́kla mʋ́. 5Ɩnʋ ahandɛ amʋtɔ ɔkʋlɛ lɛbla mɩ ɔbɛɛ, “Mátra su. Kɩ, Yuda abusuantɔ Gyata, ogyi Owie Dawid mʋ na amʋ lagyi ɩsʋ. Ɔlɔfʋn ánɩ́ ɔbɛ́maɩn atɔ asienɔ amʋ, tii ɔwʋlʋ amʋ ɔnɔ.”
6Ɩnʋ nowun Okufabi ɔkʋ. Ɩlɛlɩan ánɩ́ bapʋ mʋ ha igyi kɩ. Ɔlɩɩ owie obia amʋ, akɩankpapʋ ana amʋ pʋ́ ahandɛ adʋanyɔ-na amʋ nsɩnɛ. Ɔbʋ nsiebi asienɔ pʋ́ ansibi asienɔ. Mʋ ansibi asienɔ amʋ gyi ɔŋɛ asienɔá Bulu tɔwa sɩsɩ ɔsʋlʋ anfɩsʋ ɔtɩnɛgyiɔtɩnɛ nɩ. 7Okufabi amʋ lɛdalɩ ba nkpa, ɔlɔbɔhɔ ɔwʋlʋ amʋ lɛ ɔha amʋʋ otsie owie obiasʋ amʋ gyɔpɩtɔ. 8Ɩnʋ mbwɩ amʋʋ bʋkɩ nkpa ana amʋ pʋ́ ahandɛ adʋanyɔ-na amʋtɔ okugyiɔkʋ lemli bun Okufabi amʋ ansɩtɔ. Okugyiɔkʋ dɛ ɔsankuo pʋ́ sika pɛpɛ blanwebiá ɔhɩɛn bɔ mʋ́. Bulu aha mpaɩ gyi ɔhɩɛn anfɩ. 9Akɩankpapʋ ana amʋ pʋ́ ahandɛ adʋanyɔ-na amʋ bʋdɛ ɩlʋ pɔpwɛ wa bɛɛ,
“Fʋlɔfʋn ánɩ́ fótsu ɔwʋlʋ amʋ,
maɩn atɔ asienɔ amʋʋ bɔpʋtan mʋ́ ɔnɔ amʋ.
Tsufɛ bɔpʋ fʋ ha igyi, fɔpʋ fʋ obugya hɔ aha ha Bulu.
Fɔhɔ aha abusuangyiabusuan, ɔblɩgyiɔblɩ, ɔmágyiɔmá pʋ́ ɔsʋlʋsʋ aha ɔtsan-ɔtsan fɛ́ɛ́tɔ.
10Fayaɩ fʋ iwie ogyikpa ha amʋ́, fabwɛ amʋ́ fʋ igyi ahapʋá bétsia ha anɩ Bulu amʋ igyi.
Bégyi iwie ɔsʋlʋsʋ.”
11Nɛlakɩ, nonu Bulu-abɔpʋ tsɔtsɔɔtsɔ ɔmɛ. Bʋhɩɛ bʋtsɔá bʋma ɩklatɔ. Bobomli owie obia amʋ mʋ́a akɩankpapʋ amʋ pʋ́ ahandɛ adʋanyɔ-na amʋ. 12Bɔpʋ ɔmɛ kpɔnkpɔɔnkpɔntɩ wa ɩlʋ bɛɛ,
“Okufabi amʋʋ bɔpʋha igyi amʋ lɔfʋn
ha tumi, ɩwɩnya mʋ́a
nyansa pʋ́ awutɔ ɔwʋnlɩn,
ɩdayile mʋ́a numnyam pʋ́ kanfʋ.”
13Ɩnʋ nonu atɔá Bulu lɔbwɛ fɛ́ɛ́ ɔmɛ. Mʋ́a ɩbʋ ɔsʋ mʋ́a asɩ, ɔsʋlʋ ayasɩ pʋ́ ɔpʋtɔ fɛ́ɛ́, bʋdɛ ɩlʋ wa bɛɛ,
“Kanfʋ, ɩdayile, numnyam pʋ́ tumi fɛ́ɛ́
iletsia ɔha amʋʋ otsie owie obiasʋ amʋ
pʋ́ Okufabi amʋ brɛ fɛ́ɛ́!”
14Mʋʋ akɩankpapʋ ana amʋ bɛblɩ bɛɛ, “Amen!” Ɩnʋ ahandɛ adʋanyɔ-na amʋ bemli bun sum Bulu mʋa Okufabi amʋ.
Currently Selected:
Atɔ Lɛsunahɛ 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation