Israelfɔ Ɩlʋ 44
44
Bulu, Kʋsʋ Gyi Anɩ Bʋalɛ
Kora abi atosuna ɩlʋ ha ɩlʋ osunapʋ.
1Oo Bulu, anɩ onuto anɩlanu.
Anɩ anain babla anɩ gyʋma ánɩ́ fegyi
amʋ́ bɩsʋ bɩmbɩ amʋ.
2Fɔpʋ ɩbɩ gya ɔmá-ɔmá,
tamɛ fɛha anɩ anain mʋ́ bɛlɛ nlin.
Fobwie ɔmá-ɔmá,
tamɛ fɛha amʋ́ mʋ́ bɛklɛɩ.
3Megyi amʋ́ akɔtɔ bɔpʋnya ɔsʋlʋ amʋ.
Megyi amʋ́ ɔwʋnlɩn bɔpʋgyi ɩsʋ ɩsatɔ.
Fʋtɔdwɛ amʋ́.
Mʋ́ sʋ fʋ tumi, fʋ gyɔpɩ pʋ́ fʋ ɩwɩwankɩ legyi ɩsʋ ha amʋ́.
4Fʋgyi anɩ Wie pʋ́ anɩ Bulu.
Tsula, Yakob ogyi ɩsʋ.
5Ɩna fʋsʋ anɩtɛlɛ anɩ alupʋ da.
Fʋ ɩdatɔ anɩtɛtsatsa anɩ adʋnsʋ.
6Anɩtamapʋ ansɩ dɩnka anɩ ɩtasʋ,
anɩ ɔdayi ɛ mɔ́ɔhɔ anɩ.
7Tamɛ falɛ anɩ anɩ alupʋ ɩbɩtɔ,
faha anɩ adʋn basʋpa.
8Bulu, fʋ sʋ anɩtotsu ɩwɩ ɔpa-onye.
Abɛ́da fʋ ɩpan brɛ fɛ́ɛ́. Ɩya.
9Tamɛ sei fasi anɩ wa ɔkpa, anɩlasʋpa.
Fʋmɛkpa anɩ ya ɩsa.
10Faha anɩlakɔ srɩ.
Anɩ alupʋ balupa anɩ atɔ fɛ́ɛ́.
11Faha fɛɛ, bʋtɩn anɩ fɛ akufa.
Fada anɩ saɩn wa ɔmá-ɔmátɔ.
12Fafɛ fʋ aha ibia pɔnhɛ,
fʋmenya tɔtɔ anɩsʋ.
13Faha anɩlasʋpa apio aba ansɩtɔ.
Aha ánɩ́ bʋtsie bomli anɩ betsia mɔsɩ anɩ, bwɛ anɩ ɔblɔla.
14Anɩlemli blɩbi ha ɔmá-ɔmá.
Ɔmá bambasʋfɔ bowun anɩ bakpʋkpʋ nwuntɔ, bwɛ anɩ ɔblɔla.
15Pɛlɩ dɛ anɩ ɔpa-onye.
Ɩlamli anɩ nsʋpa,
16anɩ ɔblɔla abwɛpʋ pʋ́ anɩsʋ apleipʋ ansɩtɔ;
anɩ alupʋ pʋ́ aha ánɩ́ bʋtamasi ɩla kie ansɩtɔ.
17Anɩlɔtsʋn ɩnɩ fɛ́ɛ́tɔ.
Mʋ́ o a, anɩmɔkʋtan fʋsʋ,
ntɛ kina fʋ ntamsʋ gyi.
18Anɩmɔkʋdamli ɔma ha fʋ,
ntɛ dalɩ fʋ ɔkpasʋ ɛkɛkɛɛkɛ.
19Tamɛ febiabia anɩ,
si anɩ tswɩ mkpataku otsiakpa.
Fesi anɩ wa oklun tuuntɔ.
20Nɩ anɩlatan fʋ ɩdasʋ,
ntɛ tsu ɩbɩ fʋa bɔ mpaɩ ha ɔmá bamba ɔkpɩ ɔkʋ a,
21Bulu, tɛkɩ fʋmɛ́ɛbɩ?
Tsufɛ fʋyin anɩ agywɩɩntɔ asʋn ŋainhɛ kugyikʋ.
22Ee! Fʋ sʋ anɩtefia lowu ɔpa-onye,
fɛ akufa bapʋ bɛya ɔmɔkpa.
23Kʋsʋ! Mɩ Wie, ntogyi sʋ fʋdɛdɩdɩ?
Kʋsʋ, mádɩdɩ si anɩ wa ɔkpa fɛ́ɛ́!
24Ntogyi sʋ fadɩnkɩ ansɩ anɩsʋ?
Fatan anɩ ipian pʋ́ alɩá anɩ alupʋ bʋdɛ anɩ yia wa ntsu fɛ́ɛ́?
25Tsufɛ bada anɩ lɛda ɔsʋlʋtɔ tantaantan.
Anɩ ɔyʋlʋ latɛ manta ɔsʋlʋ.
26Kʋsʋ gyi anɩ bʋalɛ!
Fʋ ɔdwɛá ɩma ɔka sʋ ka lɛ anɩ.
Currently Selected:
Israelfɔ Ɩlʋ 44: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
