Kolosefɔ 4

1Nkpábi awie, mlɩpʋ tɔá ɩbʋ alɛ, igyi ɔnɔkwalɩ kpa mlɩ nkpábi, tsufɛ mlɩ ɛ mlɩbʋ Owie ɔsʋsʋ.

2Mlɩkɩta mpaɩbɔtɔ. Mlɩdɩnka ansɩ ɩwɩsʋ, ɩpanda ɛ itsia mlɩ klʋntɔ. 3Mlɩbɔ mpaɩ ha anɩ ɛ. Bulu ofinki ɔkpa ha anɩ atalɩ da Kristo ɩwɩ asʋn ŋainhɛ amʋ ɔkan. Mʋ́ sʋ nda obu nɩ. 4Mlɩbɔ mpaɩ mlɩaa, nda mʋ́ ɔkan wanklaan, alɩá ilehian.

5Mlɩkɩ mlɩ natɩtɔ ɔmátɔfɔtɔ. Nɩ ɔkpa ifinki ha mlɩ a, mlɩmáyinta mʋ́. 6Mlɩ ɩtɔɩ ɩwa anulɛ, ɩwa labi, mɛnɩ mlɛ́talɩ lɛ ɔhagyiɔha asʋn fɩtɛhɛ ɔnɔ wanklaan.

Ɩkla

7Anɩa opio ɔdwɛpʋ Tihiko dɛ anɩ Wie agyʋma yɔ. Osumpʋ ɔnɔkwalɩpʋ ogyi. Ɔbɛ́bla mlɩ alɩá mɩ ɩwɩ gyi fɛ́ɛ́. 8Nawa mʋ mlɩ wa mbɛɛ, ɔbɛbla mlɩ alɩá anɩ ɩwɩ gyi, ɔwa mlɩ atɛtɔ-ɔnlɩn. 9Mʋa anɩ pio ɔdwɛpʋ ɔnɔkwalɩpʋ Onesimo, ogyi mlɩ pɩ amʋ ɔbɛ́ba bɛbla mlɩ asʋn ánɩ́ ɩlaba nfɩ fɛ́ɛ́.

10Aristarko, mɩ ba ánɩ́ mɩa mʋnyɔ anɩda obu ɔha mlɩ itsia. Alɩ kɛn Marko, ogyi Barnaba mʋ pio amʋ ɛ ɔha mlɩ itsia nɩ. Mlɩhɔ Marko ɔfɔɔ wanklaan, nɩ ɔlɔtsʋn ba mlɩ wa fɛ alɩá nɛbla mlɩ yaɩ. 11Opio Yesu, bʋtɛtra tɩ mʋ Yusto ɛ ɔha mlɩ itsia. Aha abasa anfɩ pɛ gyi Yudafɔá mɩa amʋ́nyɔ anɩdɛ Bulu iwiegyi amʋ ɩwɩ agyʋma yɔ nɩ. Amʋ́ tɛkɩta klʋn wa mɩ ɩwɩtɔ nɩ.

12Epafra, otsu mlɩ wa, ogyi Kristo Yesu osumbi amʋ ɛ ɔha mlɩ itsia. Ɔtɛhɩɛ bɔ mpaɩ ha mlɩ ánɩ́ Bulu ɔwa mlɩ ɔwʋnlɩn, ɔha amlɩfʋn, amlɩtalɩ bwɛ Bulu apɛ kugyikʋ. 13Nɛ́talɩ gyi mʋ ɩwɩ adansɩɛ ánɩ́ ɔhɩɛ ɔdɛ agyʋma yɔ mlɩa Akristofɔá bʋbʋ Laodikea pʋ́ Hierapoli ɩdatɔ. 14Anɩ ɔdwɛpʋ Luka, ogyi ɩlɔ ɔtsapʋ mʋa Dema bɛha mlɩ itsia.

15Nɛha anɩ apio Laodikeafɔ amʋ itsia. Nɛha Nunfa mʋa ɔpasua amʋʋ ɩbʋ mʋ woyitɔ amʋ ɛ itsia. 16Nɩ mlɛkla ɔwʋlʋ anfɩ suna ɔpasua amʋ ta a, mlɩpʋsɩsɩ Laodikeafɔ ɛ. Mlɩkla amʋ́ klɛ amʋʋ nɔpʋsɩsɩ amʋ́ amʋ ɛ. 17Mlɩbla Arkipo mlɩaa, ɔmɔ agyʋma amʋʋ Bulu lɔpʋwa mʋ ɩbɩtɔ amʋ ɔnɔ wanklaan.

18Mɩ Paulo, onutonuto lawa ɩbɩ ɔwʋlʋ anfɩ asɩ. Mlɩmátan ánɩ́ nda obu.

Bulu ogyi mlɩ bʋalɛ.

Currently Selected:

Kolosefɔ 4: nko

Highlight

Copy