Gyumagyihɛ 26
26
Paulo Ɩwɩ Ɔnɔlɛ Agripa Ansɩtɔ
1Mʋʋ Owie Agripa lɛbla Paulo ɔbɛɛ, “Naha fʋ ɔkpa. Kʋsʋ lɛ fʋ ɔnɔ.” Paulo lotsu ɩbɩ fʋa, lɛ mʋ́ ɔnɔ ɔbɛɛ,
2“Owie Agripa, nawun ánɩ́ ɔkla lawa mɩ ogya nlɩɩ fʋ ansɩtɔ, ndɛ mɩ ɔnɔ lɛ tsu asʋn anfɩ Yudafɔ bakla dɩnka mɩsʋ anfɩ ɩwɩ. 3Mʋ́á ɩbʋ ansigyi kʋraa gyi, fʋyin Yudafɔ amandɩɛ pʋ́ tɔá bʋtegyi mʋ́ ɩwɩ nwɛn fɛ́ɛ́. Ɩnɩ sʋ kokoli, nya klʋn afʋnu mɩ ɔnɔ.
4“Yudafɔ fɛ́ɛ́ bʋyin mɩ tsiatɔ. Bʋyin alɩá nɔpʋtsia mɩ ɔmátɔ tsu mɩ nyebitɔ pʋ́ alɩá nɔpʋtsia Yerusalem wulutɔ. 5Amʋ́ fɛ́ɛ́ bʋyin mɩ dodoodo. Nɩ bʋdekle a, amʋ́ onuto bɛ́talɩ bla fʋ ánɩ́ Farisiyin ngyi wanklaan. Farisifɔ ɛ bʋtegyi Yudafɔ Bulusum mbla amʋsʋ wanklaan dʋn ɔpasua kugyikʋ. 6Tɔá sʋá ndɛ nlɩɩ nfɩ, fʋdɛ mɩ asʋn gyi gyi, ndɛ ɔkpa kɩá Bulu ɔbɔ́bwɛ dɩnka mʋ asʋn amʋʋ ɔlɛka mʋ́ ɩwɩ ntam ha anɩ anain amʋsʋ. 7Anɩ abusuan duanyɔ amʋ fɛ́ɛ́ bɔpʋ ansɩ dɩnka ntam anfɩsʋá ɩbɛ́ba mʋ́tɔ ha amʋ́. Mʋ́ sʋ bʋdɛ Bulu sum ekekegyiɛkɛ nɩ. Nanain, ntam anfɩ sʋ Yudafɔ bʋdɛ asʋn kla dɩnka mɩsʋ nɩ. 8Ntogyi sʋ mlɩ Yudafɔ anfɩ mʋ́ mlɩmɛtalɩ hogyiá Bulu ɔbɛ́talɩ kʋsʋa aha tsu afulitɔ?
9“Tɛkɩ mɩ o nohogyiá nɔ́bwɛ togyitɔá nɛ́talɩ pʋtin Yesu Nasaretyin amʋ gyumagyihɛ ɔkpa. 10Ɩnɩgyi tɔá nɔbwɛ Yerusalem nɩ. Bulu igyi ahapʋ dɛhɛn amʋ bɛha mɩ tumi bɛɛ, nkɩta Bulu aha amʋ tswɩ obu. Nɩ bɔ́mɔ amʋ́ ɛ a, mɩ ɛ ntotsula mbɛɛ, bʋmɔ amʋ́. 11Netsia yɔ Yudafɔ ofiakpa kugyikʋtɔ, ntɛha bʋtɛkɩta amʋ́, bɩtɩ amʋ́ ɩsʋ, hɩɛ amʋ́ bʋtɛblɩ Yesu ɩwɩ abususʋ. Amʋ́ ɩwɩ ɔblɔ sʋ ntɛdɩnka amʋ́sʋ yɔ ɔmá bambasʋ yɛkɩta amʋ́, bɩtɩ amʋ́ ɩsʋ.
Paulo Ɩklʋntɔdamli Ɩwɩ Asʋn
(Gyumagyihɛ 9:1-19; 22:6-16)
12“Mʋ́ ɔkpa ɛkɛ ɔkʋ Bulu igyi ahapʋ dɛhɛn amʋ bɛha mɩ, nɔyɔ Damasko wulutɔ yɛbwɛ nɩ. 13Brɛá nna ɔkpatɔ nɔyɔ a, Nanain, ɩbwɛ fɛ ɔpa doduanyɔtɔ, wankɩ kʋ lɔwankɩ tsu ɔsʋsʋ wʋlɩ mɩsʋ. Ɩlɔwankɩ dʋn owi. Ɩlɔwankɩ wʋlɩ mɩa mɩ aba amʋʋ anɩna amʋsʋ. 14Ɩnʋ anɩ fɛ́ɛ́ anɩlɛdɩda. Nonu ɔmɛ kʋ Hebri ɔblɩtɔ ɔbɛɛ, ‘Saul, Saul, ntogyi sʋ fʋdɩn mɩsʋ alɩ? Ɩwɩ tɔɩ fʋdɛwa.> 15Mʋʋ nɛfɩtɛ mbɛɛ, ‘Owie, fʋ ma nɩ?> Mʋʋ anɩ Wie lɛbla mɩ ɔbɛɛ, ‘Mɩ Yesu nɩ. Mɩsʋ fʋdɩn nɩ. 16Nabɛlɛ ɩwɩ ɔwan suna fʋ, mɛnɩ fɔ́bwɛ mɩ osumpʋ. Kʋsʋ, afʋyɛbla aha tɔá fawun tsu mɩ ɩwɩ ndɛ, pʋ́ mʋ́á nɛ́lɛ suna fʋ. 17Nɔ́kɔ hɔ fʋ tsu aha amʋʋ ndɛ fʋ wa sɩsɩ, bʋgyi fʋ onuto aha Yudafɔ pʋ́ amʋ́á bʋmegyi Yudafɔ ɩbɩtɔ. 18Fóbwii amʋ́ ansɩ, bɛ́dalɩ tsu okluntɔ ba wankɩtɔ. Fɛ́lɛ amʋ́ tsu Satan tumi asɩ ba Bulu wa, mɛnɩ obési amʋ́ lakpan kie amʋ́, fówun bénya otsiakpa aha amʋʋ Bulu latsʋn amʋ́ hogyisʋ bwɛ amʋ́ mʋ aha amʋtɔ.>
Paulo Gyumagyihɛ Ɩwɩ Asʋn
19“Nanain Agripa, ɩnɩ sʋ nɔbwɛ dɩnka atɔ amʋʋ nowun, itsu ɔsʋsʋ amʋsʋ. 20Gyankpapʋ a, nɔyɔ Damasko wulutɔ. Mʋ́ ɔma a, nɔyɔ Yerusalem pʋ́ Yudea ɔmátɔ fɛ́ɛ́. Nɔyɔ aha amʋʋ bʋmegyi Yudafɔ amʋ ɛ wa. Nɛyɛbla amʋ́ mbɛɛ, bʋsi lakpan bwɛ, abʋdamli ba Bulu wa, abʋtsia tsiatɔá ilosuna ánɩ́ badamli klʋntɔ. 21Ɩnɩ sʋ Yudafɔ amʋ bɛkɩta mɩ brɛá mbʋ Bulu ɔtswɛkpa ɩnʋ bɛɛ, bɔ́mɔ mɩ nɩ. 22Tamɛ Bulu dɛ mɩ kpa alɩɩ bɔtʋ ɔwʋlʋ anfɩ wanlɩnbɩ. Mʋ́ sʋ nlɩɩ nfɩ ndɛ, ndɛ mlɩ nyebi-ahandɛ fɛ́ɛ́ tɔá nawun bla nɩ. Asʋn ánɩ́ Mose mʋa Bulu ɔnɔsʋ atɔɩpʋ amʋ bɛblɩ bɛɛ, ɩbɛ́ba mʋ́tɔ kɛn ndɛblɩ. 23Bɛɛ, ‘Ilehian ánɩ́ Kristo, (ɔha amʋʋ Bulu lada mʋ ofuli amʋ) obówun ɩwɩɔsɩn wu, mɛnɩ ɔbɔ́bwɛ ɔha gyankpapʋá ɔbɔ́kʋsʋ tsu afulitɔ. Ɔbɔ́pʋ wankɩ ba Yudafɔ pʋ́ aha ánɩ́ bʋmegyi Yudafɔ ɛ.> ”
24Brɛá Paulo lɛblɩ ɩnɩ a, ɔmásʋ ogyipʋ Festo lɔkplʋn wa Paulo ɔbɛɛ, “Paulo, fʋ nwun layinta! Fʋ ɔwʋlʋbɩ dʋbɩdʋbɩ amʋ laha fʋdɛ gbede lɔ.”
25Mʋʋ Paulo lɛbla mʋ ɔbɛɛ, “Onumnyampʋ Festo, mmɛdɛ gbede lɔ. Ɔnɔkwalɩ onutonuto ndɛ mlɩ bla. 26Nanain Agripa yin asʋn anfɩ fɛ́ɛ́ ɩwɩ. Nɛ́talɩ bla mʋ faan. Nahogyiá megyi asʋn ŋainhɛ igyi ha mʋ, tsufɛ bʋmɔbwɛ mʋ́ ŋain. 27Nanain Agripa, fɔhɔ Bulu ɔnɔsʋ atɔɩpʋ asʋn wanlɩnhɛ amʋsʋ gyi? Nyin ánɩ́ fɔhɔ mʋ́sʋ gyi.”
28Ɩnʋ Owie Agripa lɛbla Paulo ɔbɛɛ, “Fahogyi fɛɛ, fɛ́talɩ damli mɩ bwɛ Okristoyin brɛ tinbi anfɩtɔ?”
29Paulo lɛbla mʋ ɔbɛɛ, “Brɛ tinbi o, brɛ tsɔtsɔɔtsɔ o, mɩ mpaɩ ánɩ́ ndɛbɔ ha Bulu gyi, fʋa aha anfɩ mlɩdɛ mɩ asʋn blɩhɛ nu ndɛ anfɩ fɛ́ɛ́ mlɛ́ba bɔbwɛ fɛ mɩ. Tamɛ bʋmáwa mlɩ ɩkan anfɩ mʋ́.”
30Ɩnʋ a, Owie Agripa mʋa ɔmásʋ ogyipʋ Festo pʋ́ Berenike mʋa aha amʋʋ bʋtsie ɩnʋ amʋ fɛ́ɛ́ bɔkʋsʋ dalɩ. 31Bɛyɛlɩɩ ɩtsɛtɔ, amʋ́ wʋlɛwʋlɛ bʋdɛblɩ bɛɛ, “Oyin anfɩ mɔkʋbwɛ tɔtɔá ilehian ha mʋ lowu ntɛ mʋ obuwa.” 32Mʋʋ Owie Agripa lɛbla Festo ɔbɛɛ, “Tɛkɩ nɩ ɔmɛblɩ ɔbɛɛ, Roma owie dɛhɛn koun ogyi mʋ asʋn a, tɛkɩ fɛ́talɩ si mʋ.”
Currently Selected:
Gyumagyihɛ 26: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation