Gyumagyihɛ 25
25
Paulo Roma Owie Wa Yɔ
1Ɔmásʋ ogyipʋ Porkio Festo lebetsia obiasʋ Kaesarea. Mʋ́ ɛkɛ sasɩ a, ɔlɔdʋ yɔ Yerusalem. 2Ɩnʋ Bulu igyi ahapʋ dɛhɛn pʋ́ Yudafɔ ahandɛ akʋ bɔpʋ Paulo ɩwɩ asʋn yɔtswɩ mʋ ansɩtɔ. 3Bɔbwɛ agywɩɩn ánɩ́ bɔ́yɛwa obun ɔkpatɔ, mɔ Paulo. Mʋ́ sʋ bɔyɔkʋlɩ Festo bɛɛ, ɔpʋ Paulo ba Yerusalem. 4Tamɛ Festo lɛbla amʋ́ ɔbɛɛ, “Paulo da obu Kaesarea wulutɔ dodo. Ɩmɔ́ɔwa ɔpá mɩ ɛ néyinki yɔ ɩnʋ. 5Mlɩha mlɩ ahandɛ amʋ akʋ abʋbuo mɩ yɔ ɩnʋ, abʋyɛblɩ tsitsa oduá alabwɛ.”
6Festo lɛtra tsia Yerusalem nkekwe ntɛ nkɛ du asa oleyinki yɔ Kaesarea. Olowie ɩnʋ a, ɔlɔwa bɔyɔpʋ Paulo ba, oletsia asʋn amʋsʋ ɔyɩkɛhɛ. 7Paulo lenya wie ɩnʋ alɩ, ahandɛ amʋʋ botsu Yerusalem ba amʋ bɛkafia mʋ, kla asʋn tsɔtsɔɔtsɔ dɩnka mʋsʋ. Tamɛ bʋmɛtalɩ nya tɔtɔ pʋsuna ánɩ́ asʋn amʋ ɩbʋ mʋ́tɔ. 8Mʋʋ Paulo lɛlɛ mʋ́ ɔnɔ ɔbɛɛ, “Mmɔkʋtʋn Yudafɔ mbla kʋkʋ, ntɛ bwɛ tɔkʋ pʋ ifin da Bulu ɔtswɛkpa amʋ ntɛ pʋ lalahɛ kʋkʋ ɛ gyi Roma owie dɛhɛn.”
9Festo dekle ɔbɛɛ, mʋ asʋn ɩwa Yudafɔ amʋ ɔdwɛ. Mʋ́ sʋ ɔlɛfɩtɛ Paulo ɔbɛɛ, “Fʋdekle fɛɛ fɔ́yɔ Yerusalem, mɩ anyegyi fʋ asʋn ɩnʋ?”
10Paulo lɛlɛ mʋ́ ɔnɔ ɔbɛɛ, “Roma Owie Dɛhɛn asʋn ogyikpa nlɩɩ. Nfɩ ilehian ánɩ́ bégyi mɩ asʋn. Fʋ onuto fʋyin ánɩ́ mmɔkʋbwɛ Yudafɔ tɔtɔ. 11Nɩ natʋn mbla, ilehian lowu a, mmɔkʋtin ɔkpa mbɛɛ bʋmámɔ mɩ. Tamɛ nɩ asʋn anfɩ Yudafɔ bablɩ dɩnka mɩsʋ anfɩ ɩma mʋ́tɔ a, ɔhaa má ɔkpa ánɩ́ ɔbɔ́pʋ mɩ wa amʋ́ ɩbɩtɔ. Mʋ́ sʋ mʋ́ bʋpʋ mɩ asʋn ya Roma Owie Dɛhɛn onuto ogyi mʋ́.”
12Ɩnʋ Festo mʋa mʋ ahandɛ bɔyɔ abrɩwa wa. Mʋʋ ɔlɛbɛbla Paulo ɔbɛɛ, “Fʋ onuto fɛɛ, Roma Owie Dɛhɛn ogyi fʋ asʋn. Mʋ́ sʋ abɔ́pʋ fʋ ya mʋ wa.”
Festo Agripa Paulo Ɩwɩ Asʋn Bla
13Nkɛ kʋ ɔma a, Owie Agripa mʋa Berenike bɛba Kaesarea. Bɛba bɛha Festo nwunkpa. 14Betsia ɩnʋ wa ɔpá. Mʋ́ sʋ Festo lɛbla amʋ́ Paulo ɩwɩ asʋn. Ɔbɛɛ, “Felike lɔwa oyin ɔkʋ obu nfɩ, olesi mʋ wa natɩ. 15Brɛá nɔyɔ Yerusalem a, Bulu igyi ahapʋ dɛhɛn pʋ́ Yudafɔ ahandɛ bɛba bɛblɩ asʋn tsɔtsɔɔtsɔ dɩnka mʋsʋ, bla mɩ bɛɛ nha mʋ ɩpɔn, abʋmɔ mʋ. 16Tamɛ nɛbla amʋ́ mbɛɛ, ‘Ɩma anɩ Romafɔ amandɩɛtɔá bɛ́ha ɔkʋ ɩpɔn, nkɛtɩ mʋa mʋ anyaba bafia gyi asʋn.> 17Mʋ́ sʋ ɛkɛá mɩa Yudafɔ amʋ anɩlobowie Kaesarea nfɩ a, mmesi wa obiatɔ. Ɔyɩ kɛhɛ kotoo nɛ́ha bɔyɔpʋ oyin amʋ ba, netsia asʋn amʋsʋ. 18Nkɩ mbɛɛ, mʋ anyaba amʋ bénya tsitsa kʋ tsu mʋ ɩwɩ, tamɛ bʋmenya. 19Mboun amʋ́ Bulusum pʋ́ Yesu ɔkʋá alawu tsʋn, tamɛ Paulo ɔbɛɛ, ɔtra otsie nkpa ɩwɩ asʋn bʋdɛbɩtɩ. 20Mʋ́ sʋ mmowun alɩá nɔ́yɔ asʋn amʋtɔ. Nɛfɩtɛ Paulo mbɛɛ, obótsula abʋyɔ Yerusalem yegyi asʋn amʋ ɩnʋ. 21Tamɛ ɔlɛblɩ ɔbɛɛ, mʋdekleá mʋ asʋn ɩyɔ Roma Owie Dɛhɛn ansɩtɔ. Mʋ́ sʋ nɛ́ha bɔ́wa mʋ obu yɔfʋn brɛá nɔ́pʋ mʋ sɩsɩ Roma Owie Dɛhɛn.”
22Mʋʋ Agripa lɛbla Festo ɔbɛɛ, “Mɩ ɛ ndekle mbɛɛ, nónu asʋn anfɩ tsu mʋ onuto ɔnɔtɔ.” Festo lɛbla mʋ ɔbɛɛ, “Ɔkɛ nɛ́ha bɔ́pʋ mʋ ba, ɔbɛ́lɛ asʋn amʋtɔ suna fʋ.”
Paulo Agripa Ansɩtɔ Lɩɩ
23Ɔyɩ kɛhɛ a, Agripa mʋa Berenike bɛhɩhɩɛ ɩwɩ, ɩsa akɔpʋ pʋ́ wulu ahandɛ bobuo amʋ́ ba. Festo lɛha bɛkpa Paulo ba ɩnʋ. 24Mʋʋ ɔlɛblɩ ɔbɛɛ, “Owie Agripa mʋa aha ánɩ́ bafia nfɩ fɛ́ɛ́, mlɩlawun oyin anfɩ ɔlɩɩ? Yudafɔá bʋbʋ nfɩ pʋ́ Yerusalem fɛ́ɛ́ bɔpʋ mʋ asʋn ba mɩ. Bɛɛ, mehian ánɩ́ ɔbɛ́tra tsia nkpa. 25Brɛá nɔyɔ asʋn amʋtɔ a, mmowun tɔá alabwɛ sʋ bɔ́mɔ mʋ. Tamɛ mʋ onuto ɔbɛɛ, mpʋ mʋ asʋn ya Roma Owie Dɛhɛn. Mʋ́ sʋ nabwɛ agywɩɩn mbɛɛ, nɛ́ha bɔ́pʋ mʋ ya. 26Tamɛ mmowun tsitsa kʋkʋ mʋ ɩwɩá nɔ́wanlɩn manta mʋsʋ bɔ́pʋ mʋ ya. Mʋ́ sʋ nakpa mʋ ba mlɩ ansɩtɔ nɩ, titriu fʋ Owie Agripa. Ndekleá atɛtɛ asʋn amʋtɔ, ɔtɩnɛá ileyeyi a, mɩ anya asʋankʋ wanlɩn sɩsɩ mʋ. 27Tsufɛ nawun ánɩ́ ɩma alɛá bɔ́pʋ obu ɔdɩpʋ sɩsɩ, bʋmɔwanlɩn tɔá alabwɛ manta mʋsʋ.”
Currently Selected:
Gyumagyihɛ 25: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
