2 Korintofɔ 6
6
1Anɩa Bulunyɔ dɛ agyʋma yɔ. Mʋ́ sʋ anɩdɛ mlɩ kokoli anɩaa, mlɩmáha Bulu awɩtɔlɛ amʋʋ mlɩlanya amʋ ɩbwɛ kpaalɩ. 2Tsufɛ Bulu lɛblɩ mʋ asʋn wanlɩnhɛ amʋtɔ ɔbɛɛ,
“Brɛa mɩ brɛ lɔfʋn ánɩ́ nówun aha nwɛ a,
nonu mlɩ ɔmɛ.
Mɩ nkpa ɔhɔkɛ amʋ ɩlɔfʋn a, negyi mlɩ bʋalɛ.”
Mlɩnu! Brɛ amʋ lafʋn a. Ndɛ gyi mlɩ nkpa ɔhɔkɛ amʋ nɩ!
3Anɩmedekleá abétin ɔhaa anɩ Wie wa ba ɔkpa, mɛnɩ ɔhaa méenya asʋansʋ blɩ tsu anɩ agyʋma anfɩ ɩwɩ. 4Mboun anɩ bwɛhɛ fɛ́ɛ́tɔ a, anɩtɛlɛ suna ánɩ́ Bulu asumbi anɩgyi ɔnɔkwalɩsʋ. Anɩtotomi anɩ ɩwɩɔsɩn, anɩ ɩkplan pʋ́ anɩ asʋn wunhɛ kugyikʋ ɛtɔ. 5Bɛpɩtɩ anɩ atɔ, wa anɩ obu, bɛkpa bun anɩsʋ da anɩ. Anɩlɔyɔ agyʋma ánɩ́ ɩdʋn anɩ. Nkɛkʋ anɩtamadɩdɩ, nkɛkʋ ɛ anɩtetsia akʋn. 6Anɩlɔtsʋn anɩ tsiatɔsʋ lɛ suna ánɩ́ ifin kʋkʋ má anɩ ɩwɩ. Anɩyin asʋn, anɩtenya ɩklʋn. Anɩbʋ awɩtɔlɛ, Ɔŋɛ Wankɩhɛ amʋ tsie anɩtɔ. Anɩtɛhɩɛ dwɛ aha ɛ tsu anɩ klʋntɔ. 7Anɩtɛda Bulu asʋn amʋ ɔkan ɔnɔkwalɩsʋ pʋ́ Bulu tumitɔ. Yilebwɛ gyi ɩsa-akɔtɔá anɩdɛpʋkɔ aha, anɩdɛpʋtin anɩ ɩwɩ ɛ. 8Akʋ bʋtobu anɩ, akʋ ɛ bʋtɔsʋpa anɩ. Akʋ bʋtɛkanfʋ anɩ, akʋ ɛ bʋtɔkpɔɩ anɩ. Anɩ asʋn da ɔkpa, tamɛ bʋdɛ anɩ bu afunupʋ. 9Fɛ anɩmegyi tɔtɔ aha ansɩtɔ, tamɛ aha anɩgyi. Fowun anɩ fɛ́ɛ́ anɩdewu nɩ, tamɛ kɩ, anɩbʋ nkpa. Bʋtesian anɩ mɔ, tamɛ anɩtɛdalɩ mʋ́tɔ. 10Anɩbʋ ɩwɩɔsɩntɔ, tamɛ Kristo sʋ anɩbʋ ansigyitɔ. Ahianfɔ anɩgyi, tamɛ anɩlaha aha bamli ɩwɩ anyapʋ. Anɩmá tɔtɔ, tamɛ anɩbʋ togyitɔ Kristo sʋ.
11Korintofɔ! Anɩtɛhɩɛ nya mlɩ ɩwɩ ansigyi, lɛ ɩwɩtɔ bla mlɩ asʋn. 12Anɩtamakʋla ɩwɩ mlɩsʋ, tamɛ mlɩ mʋ́ mlɩdɛ ɩwɩ kʋla anɩsʋ. 13Ndɛ mlɩ asʋn bla fɛ mɩ onuto abi. Mlɩ ɛ mlɩmápʋ asʋansʋ ŋain anɩ.
Ɔmátɔfɔ Pʋgyi Mba
14Mlɩa ɔmátɔfɔ mlɩmágyi mba. Nkalɩ yile mʋ́a lalahɛ bɛ́talɩ tsia tsukʋlɛ? Nkalɩ wankɩ mʋa oklun ɛ bɔ́bwɛ kʋlɛ? 15Kristo mʋa Ɔbʋnsam#6:15 Paulo lɛtɩ Ɔbʋnsam ɔbɛɛ, ‘Belial.> bɛ́talɩ bwɛ agywɩɩn kʋlɛ? Ɛkɛkɛɛkɛ! Nkalɩ ohogyipʋ mʋa ɔha ánɩ́ ɔma hogyi bɔ́bwɛ kʋlɛ? 16Nkalɩ bɔ́tswɛ ɔkpɩ Bulu ɔtswɛkpa? Tsufɛ anɩgyi Bulu Ɔkɩankpapʋ amʋ ɔtswɛkpa nɩ. Igyi fɛ alɩá bɔwanlɩn wa Bulu asʋn amʋtɔ bɛɛ,
“Bulu ɔbɛɛ, ‘Nétsia mɩ ahatɔ,
mɩa amʋ́nyɔ abɛ́natɩ.
Nɔ́bwɛ amʋ́ Bulu,
amʋ́ ɛ bɔ́bwɛ mɩ aha.> ”
17Bɔwanlɩn wa Bulu asʋn amʋtɔ ɛ bɛɛ,
“Anɩ Wie Bulu ɔbɛɛ,
‘Mlɩdalɩ amʋ́tɔ, amlɩmaɩn ɩwɩ lɛ amʋ́sʋ.> ”
Bɛtra wanlɩn wa Bulu asʋn amʋtɔ bɛɛ,
“Mlɩmáwa ɩbɩ lalahɛtɔ,
mɩ anhɔ mlɩ.”
18Bɛtra wanlɩn wa Bulu asʋn amʋtɔ bɛɛ,
“Bulu ɔbɛɛ, ‘Nɔ́bwɛ mlɩ Sɩ,
mlɩ ɛ mlɔ́bwɛ mɩ abi.>
Alɩ anɩ Wie Otumipʋ dɛblɩ nɩ.”
Currently Selected:
2 Korintofɔ 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
