1 Tesalonikafɔ 4
4
Tsiatɔá Ilegyi Bulu Ansɩ
1Apio, ɩtrahɛ a, anɩlosuna mlɩ tsiatɔ, mɛnɩ Bulu ansɩ bégyi mlɩ ɩwɩ. Lɛlɛ mʋ́ a, alɩ mlɩ tsiatɔ gyi nɩ. Sei a, anɩhɩɛ anɩdɛ mlɩ kokoli anɩ Wie Yesu ɩdatɔ anɩaa, mlɩbwɛ mʋ́ dʋn alɩ. 2Tsufɛ mlɩyin mbla amʋʋ anɩlɔwa ha mlɩ anɩ Wie Yesu ɩdatɔ amʋ. 3Bulu dekleá mlɩha mlɩ ɩwɩ ɩtɩn. Mʋ́ sʋ mlɩmáwa atsɩ mʋ́a ayin asʋn. 4Mlɩtɔ okugyiɔkʋ ɔbɩ alɩá ɔbɛ́kɩta ɩwɩ, ɩwɩtɩn pʋ́ obú ɔkpasʋ. 5Ɩmábwɛ ɔwɔlɩ lalahɛ ɔkpasʋ, fɛ alɩá aha ánɩ́ bʋmeyin Bulu bʋtɔbwɛ. 6Mlɩtɔ ɔkʋkʋ másisi mʋ ba, swɩɩ mʋ mʋ ka. Tsufɛ anɩ Wie ɔbɛ́bɩtɩ aha ánɩ́ bʋtɔbwɛ mʋ́ odu ɩsʋ. Anɩdɛ mlɩ ɔla da, fɛ alɩá anɩlɔkʋ bla mlɩ yaɩ. 7Tsufɛ Bulu mɛtɩ anɩ ɔbɛɛ, aba bɔtɔ mbʋa; mboun ɔbɛɛ, ifin kʋkʋ mátsia anɩ ɩwɩ. 8Mʋ́ sʋ ɔhagyiɔha ánɩ́ omegyi atosunahɛ anfɩsʋ a, megyi nyankpʋsa omedebu. Mboun Bulu amʋʋ ɔlɔpʋ mʋ Ɔŋɛ Wankɩhɛ ha mlɩ amʋ.
9Imehian ánɩ́ abɔ́wanlɩn asʋansʋ tsu mlɩ aba akristofɔ-dwɛ ɩwɩ sɩsɩ mlɩ. Tsufɛ Bulu onuto lasuna mlɩ alɩá mlɩdwɛ mlɩ aba dodoodo. 10Ɔnɔkwalɩ a, mlɩdɛ apio ahogyipʋá bʋbʋ Makedonia ɔmátɔ fɛ́ɛ́ dwɛ dodo. Mʋ́ sʋ apio, anɩdɛ ɩpa bwii ha mlɩ anɩaa, mlɩtra dwɛ aba dʋn alɩ. 11Mlɩpʋdɩnka ɩwɩsʋá mlétsia tsiatɔ wanklaan. Mlɔ́pʋ mlɩ ɩbɩ yɔ agyʋma pʋkɩ mlɩ ɩwɩsʋ, fɛ alɩá anɩlɛbla mlɩ, 12mɛnɩ mlɩa aha ánɩ́ bʋmegyi ahogyipʋ mlétsia wanklaan, mlɩmɛ́ɛtra pʋ ansɩ dɩnka ɔhaasʋ.
Anɩ Wie Yesu Yinki Ba
13Apio, anɩdekle anɩaa, mlɩbɩ ɔnɔkwalɩá ɩbʋ Akristofɔá bawu ɩwɩ, mɛnɩ mlɩméetsia gyi awɩrɛhɔ fɛ aha ánɩ́ amʋ́ ansɩ mɛdɩn tɔtɔsʋ. 14Anɩlohogyiá Yesu lowu kʋsʋ tsu afulitɔ. Alɩ kɛn anɩlohogyiá Bulu ɔbɛ́kpa aha amʋʋ bɔhɔ mʋ gyi asa bowu amʋ ba nɩ.
15Anɩ Wie onuto atosunahɛ anɩdɛ mlɩ suna sei a. Anɩ aha ánɩ́ anɩtra anɩtsie nkpa asa anɩ Wie ɔbakɛ ɩbɔ́fʋn a, anɩméegya awupʋ amʋ nkpa yefia mʋ. 16Tsufɛ anɩ Wie ɔbɔ́kplʋn tumisʋ, Bulu-ɔbɔpʋ dɛhɛn ɔbɛ́lɛ ɔnɔ, bɔ́fʋlɩ Bulu ɔkpɛ ɛ brɛá anɩ Wie onuto dɛkplɩ tsu ɔsʋsʋ ɔba. Ahogyipʋá bawu bégyankpa kʋsʋ. 17Mʋ ɔma a, anɩ akɩankpapʋ ɛ fɛ́ɛ́ abɔ́yɔ yɛtʋ amʋ́ nwʋlʋtatɔ, anɩ fɛ́ɛ́ abéyefia anɩ Wie afutɔ. Tsu ɛkɛ amʋ a, abétsia anɩ Wie wa brɛ fɛ́ɛ́. 18Mʋ́ sʋ mlɩpʋ asʋn anfɩ kɩta ɩklʋn wa aba ɩwɩtɔ.
Currently Selected:
1 Tesalonikafɔ 4: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
