1 Tesalonikafɔ 3
3
Timoteo Tesalonika Yɔ
1Mʋ́ sʋ brɛá anɩmɛbɩ alɩá mlɩ tsiatɔ igyi, ɩdɛ anɩ han a, anɩlɔbwɛ agywɩɩn anɩaa, anɩ mʋ́ abétsia Atene wulutɔ, 2awa anɩ pio Timoteo, ogyi anɩ Bulu agyʋmayɔba Kristo asʋn wanklaan amʋ ɔkandatɔ sɩsɩ mlɩ. Ɔbɔwa mlɩ ɔwʋnlɩn, ɔtɔɩ kpla mlɩ amlɩlɩɩ kinkiinkin hogyitɔ, 3mɛnɩ mlɩtɔ ɔkʋkʋ méeyinki ɔma asʋn wunhɛ anfɩ sʋ. Mlɩ onuto mlɩyin ánɩ́ igyi tɔá ɩda yaɩ ha anɩ Akristofɔ dodo. 4Tsufɛ brɛá anɩbʋ mlɩ wa a, anɩlɛbla mlɩá bɛ́dɩnka mlɩsʋ. Lɛlɛ bɛdɩnka mlɩsʋ fɛ alɩá mlɩyin. 5Ɩnɩ sʋ brɛá netsia mmetsia a, nɔwa Timoteo mlɩ wa mbɛɛ, ɔbɛ́kɩ alɩá mlɩdɛ hogyi amʋtɔ. Tsufɛ ɩbɛ́talɩ ba ánɩ́ Ɔbʋnsam lasɔ mlɩ kɩ, ha anɩ gyumagyihɛ labwɛ kpaalɩ.
6Timoteo layinki pʋ asʋn wanklaan tsua mlɩ wa ba anɩ sei, tsu mlɩ hogyi pʋ́ mlɩ abadwɛ ɩwɩ. Alabla anɩ ɔbɛɛ, mlɩ ɛ mlɩdɛ anɩsʋ kaɩn dʋbɩ. Mlɩdekleá mlówun anɩ, fɛ alɩ amʋʋ anɩ ɛ anɩdekleá abówun mlɩ amʋ. 7Mʋ́ sʋ apio, mlɩ hogyi lawa anɩ atɛtɔ-ɔnlɩn, anɩ ipian pʋ́ anɩ asʋn wunhɛ fɛ́ɛ́tɔ; 8tsufɛ mlɩlɩɩ anɩ Wie hogyitɔ kinkiinkin. Mʋ́ sʋ anɩ klʋn ladɩ anɩ asɩ. 9Ɩpan mɔmʋ abɔ́kʋkʋ da Bulu mlɩ sʋ, ansɩá ɩdɛ anɩ gyi mʋ ansɩtɔ sʋ? 10Anɩtɛhɩɛ bɔ mpaɩ kokoli Bulu ɔpa mʋ́a onye anɩaa, ɔha ayinki bowun mlɩ, mɛnɩ abósuna mlɩ tɔá ɩbɛ́ha mlɩ hogyi bɔ́fʋn.
11Anɩ Sɩ Bulu onuto mʋa anɩ Wie Yesu bʋfinki ɔkpa ha anɩ aba mlɩ wa. 12Anɩ Wie ɔha mlɩ apio aba pʋ́ aha fɛ́ɛ́ dwɛ ɔnɔ ɩwa ɔnlɩn, fɛ alɩ amʋʋ anɩtɔdwɛ mlɩ amʋ. 13Ɔwa mlɩ ɔwʋnlɩn, mɛnɩ anɩ Sɩ Bulu omóowun ɔlala mlɩ ɩwɩ, ifin kʋkʋ ɛ méetsia mlɩ ɩwɩ mʋ ansɩtɔ, anɩ Wie Yesu mʋa mʋ aha fɛ́ɛ́ ɔbakɛ amʋ.
Currently Selected:
1 Tesalonikafɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
