Zakaria 1
1
Mwene Zambi yatambika atu jenyi ahiluke kuli iye
1Ha mwaka wa muchaali ha kakweji wa muchinake#1:1 kakweji WA muchinake: Kwaali wa Tuchokwe, ha mwaka 520 muze te Yesu Kristu kanda achisemuka. wa kuyula cha Dariuse mwanangana wa Persia, Mwene Zambi yalweza maliji wano kuli mukwa munanyi Zakaria, mwana wa Berekia mujikulu wa Ido. 2Yamwambila alweze atu ngwenyi: “Yami, Mwene Zambi, natenukinyine tushakulu twenu kuhiana, 3alioze haliabwila ngunanwambe ngwami: Hilukenu kuli yami, mba ni yami munguhiluka kuli yenu. 4Kanda nubwa ngwe tushakulu twenu. Mumu mwaka wali akwa munanyi te kaakwalongesa maliji jami, yaalweza ngwo: ‘Kanda nubwa yingulungulu, kanda nuvulumuna.’ Alioze kaangubanjikile ko, kaangwononokenene ko. 5Tushakulu twenu ni akwa munanyi haanafu kulu. 6Nahanyine Shimbi jami ni maliji a kukanyamisa kuli tuvumbi twami akwa munanyi aalweze tushakulu twenu. Alioze yaalelesa, kashika yaamona lamba. Hohene yaalumuka ku mbunge, yaatayiza ngwo, yami Mwene Zambi Mukwa Ndundo Jeswe naamwesene lamba nikulita ni yitanga yo, ngwe chize nabatwile kulu.”
Usolwelo wa tuvwalu
7Ha mwaka wa muchaali wa kuyula cha Dariuse, ha tangwa lia makumi aali a kakweji wa kumi ni umuwika#1:7 kakweji WA kumi ni umuwika: Chipinji cha Kutano ni cha Kusambano. (kakweji wa Shebate), Mwene Zambi yangulweza maliji ha ufuku mu Usolwelo. 8Yingumona kanganda ka Mwene Zambi kanende ha kavwalu muchila, yamana mukachi ka mitondo mirtre mu chikulo. Kunyima lienyi yikubwa tuvwalu akwo achila, ni ayibeka yibeka, ni atoma. 9Yingumuhula ngwami: “A mwata, tuvwalu wano kuchi analumbunuka?”
Yangukumbulula ngwenyi: “Mungukulweza chize analumbunuka. 10Mwene Zambi waatuma hanga endese chifuchi.”
11No yaalweza kanganda ka Mwene Zambi ngwo: “Hitwendesa hashi heswe, kuwana atu eswe haabwa ni mulekeleke, haazeya.”
12Hohene kanganda ka mwilu yamba ngwenyi: “Mwene Zambi Mukwa Ndundo Jeswe, hiunatenukina Yerusaleme ni e membo ja Yuda ha miaka makumi shimbiali. Mba miaka yingahi yasala ko ha kweevwila kama keke?”
13Neye yakumbulula mwe kanganda ni maliji a kuhuhumiona. 14Kanganda neye yangulweza ngumwange sango jize Mwene Zambi Mukwa Ndundo Jeswe ambile ngwenyi: “Nguli ni ukwa unji hakutwala ku Yerusaleme, limbo liami lia chijila, 15alioze mavungu waze anatwama kanawa mu uhwimino ngunaatenukina. Mumu muze nalihumikijine ni atu jami, e mavungu yaahungumiona kuhiana. 16Kashika hinahiluka ku Yerusaleme hanga ngweevwile keke. Zuwo liami mungulilulika, ni lie limbo mungulitungulula.”
17Mwe kanganda yangwamba nawa ngumwange sango ngwenyi: “Mwene Zambi Mukwa Ndundo Jeswe kanambe ngwenyi, membo jenyi kumaakayuka nawa. Neye makakwasa Yerusaleme nawa ni kuutayiza kubwa limbo lienyi mwene.”
Usolwelo wa mbinga
18Mu Usolwelo ukwo yingumona mbinga jiwana ja ngombe. 19Yinguhula kanganda yoze te unahanjika ni yami ngwami: “Mbinga jino kuchi jinalumbunuka?”
Yangukumbulula ngwenyi: “Mbinga jino jinalumbununa mavungu waze amwangine mu Yuda, ni Israele, ni Yerusaleme.”
20Hohene Mwene Zambi yangulweza fuli awana ni mieto. 21Yinguhula ngwami: “Atu wano yika aneza ni kulinga?”
Iye ngwenyi: “Kaaneza ni kuvwisa mwongo ni kukumba mavungu waze afwenyene chifuchi cha Yuda ni kumwanga atu jamo.”
Currently Selected:
Zakaria 1: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
