Marku 16

Uhindukilo wa Yesu

(Tala nawa Mat 28:1-8; Luk 24:1-12; Yoa 20:1-10)

1Muze te tangwa lia kuhwima hiliabalika, Maria Kamandala, ni Salome, ni Maria naye ya Tiangu (Jake) yaalanda maji a vumba libema, hanga akaye akawayise mujimba wa Yesu. 2Chichamene cheswe mu lumingu, ha kuvumbuka cha tangwa, yaaya ku fuka, 3yaalihula hakachi ko ngwo: “Iya matulangumwina kama liwe ku chikolo cha fuka?” 4(Te liwe linene liahiana.) Alioze muze haahetuka, yaamona liwe halilangumuna ko kulu. 5Muze haanjila mu fuka, yaamona mukweze kanatwama ku chindume, te kanazala hina litoma. No yeevwa woma unji. 6Alioze mukweze yaamba ngwenyi: “Kanda nwivwa woma. Nunafupu Yesu Kanazare, yoze anakahachila ha kulusu. Hahinduka, amuno keshimo. Talenu homa haze anakamusa. 7Alioze yeenu nulweze Petulu ni tumbaji twenyi eswe ngwenu. Yesu makanutetekela ku chifuchi cha Galilea. Kwenako munukamumona ngwe chize hananwambulwila kulu.”

8No yatuhuka, yaachina ku fuka, mumu achikimine. Kaalwezele mutu niumwe, mumu yeevwa woma.

Yesu yasolokela Maria Kamandala

(Tala nawa Mat 28:9-10; Yoa 20:11-18)

[ 9Muze te Yesu hahinduka ku kufwa mu lumingu#16:9 lumingu: tangwa litangu lia semana. chichamene, yasolokela hatangu Maria Kamandala, yoze atuhwishile mwiku wa luchisa shimbiali. 10Maria yaya ni kwambulwila waze abwile hamwe ni Yesu, shimbu te ananenganyana nikulila. 11Alioze, muze heevwa yize ambile Maria ngwenyi: “Yesu hahinduka, namumonanga,” kaamufulielele ko.

Yesu yasolokela tumbaji aali

(Tala nawa Luk 24:13-35)

12Kulutwe lia yino yuma, Yesu yasolokela tumbaji aali ni chifwa cheka, te ku minda anayi. 13No yaahiluka, yaambulwila tumbaji akwo, alioze kaafulielele ko.

Yesu yaasolokela tumbaji kumi ni kashi, yaashika

(Tala nawa Mat 28:16-20; Luk 24:36-49; Yoa 20:19-23; Yil 1:6-8)

14Hakusula, Yesu yasolokela e kumi ni kashi shimbu te anatwama ku mesa. Yaakanyamisa mumu kaafulielele ko, ni mumu ha kukala cha mbunge jo. Kaafulielele ko waze aliangile kumumona muze ahindukile ku kufwa. 15Yesu yaamba ngwenyi: “Yeenu hashi heswe, nukambujolele atu eswe Sango Jibema. 16Yoze mafuliela ni maamupapachisa kumakamulamwina. Alioze yoze keshi kufuliela, kumakamuhisa. 17Yilayi yino kumuyikaula akwa kufuliela: mu jina liami kumaakatuhwisa mwiku wa luchisa; kumaakahanjika maliji aha; 18chibwe akakwate manoka hanji kunwa Chuma chimwe cha kufwa, kuchichi kaalinga nichimwe; kumakasa moko hali mieji, mba kumakahinduka.”

Yesu yazezuka mwilu

(Tala nawa Luk 24:50-53; Yil 1:9-11)

19Muze Mwene Yesu hahanjika maliji wano, Zambi yamutambula mwilu, yatwama ku chindume cha Zambi. 20Tumbaji yaatuhuka nikwambujola kweswe. Mwene Yesu yalinga hamwe no nikukolesa longeso lio ni yilayi.]#16:20 Yisoneko yikwo yikulu ni maliji wano.

Currently Selected:

Marku 16: CHK1970

Highlight

Copy