Marku 15

Yesu ku meso ja Pilatu

(Tala nawa Mat 27:1-2, 11-14; Luk 23:1-5; Yoa 18:28-38)

1Chichamene cheswe mahako a lutwe a Zambi, ni makulwana ja Ayuda, ni alongeshi a Shimbi, hamwe ni ngaji eswe a mu Mbunga ya Ngaji ja Ayuda#15:1 MBUNGA YA NGAJI JA AYUDA: tala 14:55. yaatwama punga. Yaakasa Yesu, yaamutwala nikumukunjika kuli Pilatu.#15:1 PILATU: Karoma, mukwa kuyula wa yifuchi ya Yudea, ni Samaria, ni Idumea mu wanangana wa Aroma ha miaka 26-36. 2Mwe Pilatu yamuhula ngwenyi: “Mwe mwanangana wa Yuda yena, nyi ka?” Yesu ngwenyi: “Kuwamba.” 3Mahako a lutwe yaasuma Yesu ni yuma yinji. 4Pilatu yahula nawa Yesu ngwenyi: “Kuushi kukumbulula nichimwe, nyi? Achivwa yuma yibwa haha anakusumu nayo!” 5Alioze hi kakumbulwile ko nawa nichimwe; Pilatu yalishimwoka kuhiana.

Pilatu yakunjika Yesu ku kufwa

(Tala nawa Mat 27:15-26; Luk 23:13-25; Yoa 18:39—19:16)

6Ha chiwanyino cheswe cha Kubalika Pilatu ndako abwile nayo ya kutusula funge umuwika yoze te mbunga meeta. 7Umwe lunga te wabwile ko, jina lienyi Baraba, wakukasa hamwe ni yitanganyanyi akwo. Enoo ashihile atu. 8Mbunga yaaya maha Pilatu, yaabutuka kumwita aalingile nikulita ni ndako yenyi. 9Pilatu yahula ngwenyi: “Nunazange ngunutuswile mwanangana wa Ayuda, nyi?” 10Mumu te kananyingika pundu ngwenyi, mahako a lutwe haakunjika Yesu mumu ha ukwa. 11Alioze mahako a lutwe yaavundula mbunga hanga atuhwise Baraba. 12Pilatu yaahula ngwenyi: “Mba kuchi nunazange ngulinge ni yoze nunavuluka ngwenu: ‘Mwanangana wa Ayuda’?” 13Yaamukumbulula nikukololoka ngwo: “Muhachile ha kulusu!” 14Alioze Pilatu ngwenyi: “Chibi chika kevwe anakalinga?” Hohene atu yaakololoka chikolo ngwo: “Muhachile ha kulusu!” 15Pilatu yazanga kuhutula mbunga, kashika yaatuswila Baraba. Muze te halambisa Yesu ni fimbo (shikote), Pilatu yamukunjika hanga amuhate ha kulusu.

Tujita yaakekuna Yesu

(Tala nawa Mat 27:27-31; Yoa 19:2-3)

16Tujita yaamutwala ku yiize mukachi ka zuwo lia mwanangana. No yaatambika tujita eswe a ku mbunga yize. 17Yaamujika hina lichila, yaayinda chipangula cha mbimbo ni kumujika cho ku mutwe. 18No yaabutuka kumumeneka ngwo: “Vulie, mwanangana wa Ayuda!” 19Yaamulambalamba mutondo ha mutwe, yaamufwilafwila mate, yaaliumba ha makungunwa jo ngwe kaanamuwayila. 20Muze hamanununa kumukekuna, yaamuzula hina lichila, yaamujika mahina jenyi, mba yaamutwala haze lia limbo hanga amuhate ha kulusu.

Tujita yaahata Yesu ha kulusu

(Tala nawa Mat 27:32-44; Luk 23:26-43; Yoa 19:17-27)

21Mu jila yaatakana ni umwe mutu wa ku Sirene,#15:21 sirene: lie limbo lia wanangana mu chifuchi cha Libia ku norde mu Afrika. jina lienyi Simone (tato ya Alexandre ni Rufu), te ku munda anakatuka. Yaamwaha kulusu ya Yesu ni tachi, hanga ayimbate. 22Yaatwala Yesu kumwe kuma akuvuluka ngwo, Golgota, kulumbunuka ngwo: “Homa lia Balanga.” 23Yaazanga kumwaha vinyu yakuchinga ni yitumbo ya utunu, mira. Alioze yalituna yo. 24No yaamuhata ha kulusu. Mba yaalitetela mahina jenyi, nikuta chela ha kumona chize mutu ni mutu matambula. 25Te ha ola ya muchilivwa lia chichamene amuhachilile ha kulusu. 26Ha mukanda yaasoneka ho chitela chize amusumine nacho ngwo: “Mwe Mwanangana wa Ayuda.” 27Yaahata nawa mihuza aali ha makulusu, umuwika ku chindume cha Yesu, mukwo ku chimeso. [ 28Chenacho yuma yize yasonewene mu Mukanda wa Zambi yikamanunuke ngwo: “Haanamwalula hamwe ni yingulungulu.”]#15:28 Yisoneko yikwo yikulu kuyishi ni maliji wano.

29Atu waze abaliekele kuze yaalihunga mitwe nikumuchoka ngwo: “Ehee! Yena wazangile kwonona zuwo lia Zambi ni kulitunga nawa ha matangwa atatu! 30Lilamwine yena mwene! Sunuka ha kulusu!” 31Chimuwika nawa mahako a lutwe a Zambi, ni alongeshi a Shimbi yaakekuna Yesu nikulihanjekesa ngwo: “Walamwinyine atu akwo, alioze mwene kahashile kulilamwina! 32Chilamwina yoze Zambi alakenyene mwanangana wa Israele asunuke haliabwila ha kulusu! Nyi twachimona, mba tumufuliele.” Chibwe waze ahachiwile hamwe nenyi ha makulusu yaamuchoka.

Kufwa cha Yesu

(Tala nawa Mat 27:45-56; Luk 23:44-49; Yoa 19:28-30)

33Tangwa ha muchima, chifuchi cheswe yichibwa ni milima bwii, yiisala ndoo ola jitatu. 34Ha ola ya muchitatu Yesu yakololoka chikolo ngwenyi: “Eloi, Eloi, lema sabaktani?” Kulumbunuka ngwo: “Zambi yami, Zambi yami, kuchi mba hiwangwehuka?” 35Amwe waze amanyine ko, muze haachivwa, yaamba ngwo: “Achivwenu, kanatambika Eliya!” 36Umuwika hakachi ko yazomboka, yazalisa shiponja ni vinaigre, yayisa ku songo lia lumbungu, yamweseka yo hanga anwe, ngwenyi: “Matumone, nyi Eliya meza ni kumusunwisa.” 37Alioze Yesu yakololoka chikolo, mba yafwa.

38Chikalakala cha hina lia mu zuwo lia Zambi yichibulika mukachi, chize kwilu ndoo hashi. 39Mwata wa tujita yoze wamanyine ko, muze hevwa chize akololokele ni hamona chize asutwile mwono wenyi, yamba ngwenyi: “Chamwenemwene mutu yono mwe Mwana Zambi!”

40Amwe mapwo, te kaanamana kusuku ni kutala. Hakachi ko te haali Maria Kamandala, ni Salome, ni Maria naye ya Josefe ni Tiangu (Jake) mukweze. 41Ayo eswe te kaakukaula Yesu muze abwile mu chifuchi cha Galilea ni kumukwasa. Yikubwa nawa mapwo anji akwo waze ejile hamwe nenyi ku Yerusaleme.

Kufunda cha Yesu

(Tala nawa Mat 27:57-61; Luk 23:50-56; Yoa 19:38-42)

42-43Muze te tangwa hiliendala, Josefe wa ku Arimatea#15:42-43 arimatea: limwe limbo kilometro 35 ku norde ku chitokelo cha Yerusaleme. yeza; mutu mulemu wa ku Mbunga ya Ngaji ja Ayuda,#15:42-43 Mbunga ya ngaji ja Ayuda: tala 14:55. yoze te wakutwaminyina Wanangana wa Zambi. Te mumatano, tangwa lia atu kulilulika mumu tangwa lize lia kulutwe yilibwa lia uhwimino. Josefe yanjila maha Pilatu ni hamu lieswe, nikumwita mujimba wa Yesu. 44Alioze Pilatu yalishimwoka ha kwivwa ngwo: “Hafwa.” Yatambika mwata wa tujita hanga amuhule nyi hafwa kulu. 45Muze hevwa shindakenyo ya mwe mwata, Pilatu yatayiza kuhana mujimba wa Yesu kuli Josefe. 46Neye yalanda hina litoma, yasunwisa we mujimba wa Yesu, yauvunga ni hina lize, yausa mu fuka liakutota mu liwe. Mba yalangumwina liwe linene ku chikolo cha fuka. 47Maria Kamandala, ni Maria naye ya Josefe yaatala, yaamona kuze amusele.

Currently Selected:

Marku 15: CHK1970

Highlight

Copy