Marku 12

Chishima cha njimi abi

(Tala nawa Mat 21:33-46; Luk 20:9-19)

1Hohene Yesu yabutuka kwatela yishima ngwenyi: “Umwe mutu watumbile munda wa vinyu, yaujingilika chipanga, yafula ko wina wa kukamina vinyu, yatunga ko zuwo lisuku lia kutalila munda, yakunjika munda ku moko ja njimi, mba yaya mu wenyi. 2Muze mwaka wa kuhela hiwaheta, yatuma kavumbi kuli njimi hanga akatambule yimwe mihuko ya ku munda. 3Alioze e njimi yaamukwata, yaamulamba, yaamukatwisa mokomoko. 4Mwenya munda yatuma kavumbi mukwo. No yaamulokola mutwe, yaamutuka. 5Mba yatuma mukwo. Njimi yaamushiha. Yaalinga chizechene kuli akwo anji. Yaalamba amwe, yaashiha akwo. 6Mutu umuwika wasalile, mwe mwanenyi wa lunga, yoze te akuzanga kuhiana. Yaatumina ye chisuho chakusula, ngwenyi: ‘Hanji maakamusa vumbi.’ 7Alioze njimi yaalihanjikisa hakachi ko ngwo: ‘Awu mwe swana. Tuyenu tumushihe, mba munda wa vinyu ukabwe niwetu.’ 8Yaamukwata, yaamushiha, yaamumbila haze lia munda.

9“Mwenya munda kuchi mba makalinga njimi waze? Makeza ni kwashiha, mba makakunjika munda ku moko ja njimi eka. 10Kanda nuchitanga kama nilimwe tangwa maliji wano mu Mukanda wa Zambi, nyi? Ngwo:

‘Liwe lize alitunyine tungi,

hiliabwa liwe lia mu mbango, lize hakolesa zuwo.

11Chuma chino alingile Mwene Zambi,

Chili cha kulishimwoka!’ ”

12Akwa lutwe ja Ayuda yaafupa mana kumukwata, mumu yaanyingika ngwo, kata chishima chino cha kwahisa. Alioze yeevwa woma wa mbunga. Kashika yaamwecha, yaaya kwo.

Chihula hakutwala ku lijimu lia mwanangana wa Aroma

(Tala nawa Mat 22:15-22; Luk 20:20-26)

13Akwa lutwe yaatumina Yesu amwe Afariseu#12:13 AFARISEU: tala 2:16. ni amwe a kuli Aherode#12:13 AHERODE: tala 3:6. ha kumutela muheto ni yihula. 14No yeeza nikumwamba ngwo: “Longeshi, tunanyingika ngwetu, yena kuuli wamwenemwene. Kuushi woma ha yize akunyonga atu, kuushi kutala ulemu wo, alioze wakulongesa Shimbi ja Zambi ni umwenemwene. Twambulwile, muchilita ni Shimbi jetu kulambula mwanangana wa Aroma#12:14 mwanangana WA AROMA: ha matangwa waze Tiberiu yoze wayulile ha miaka 14-7. lijimu, nyi ka? Chatamba kulambula, nyi ka?” 15Alioze Yesu yanyingika ulembekese wo, yaakumbulula ngwenyi: “Kuchi kevwe nunangweseka? Ngunehenenu mwe lumbongo,#12:15 lumbongo: lumbongo wa Aroma, jina lienyi denariuse. ngumutale.” 16No yaamunehena ye. Mba Yesu yaahula ngwenyi: “Chizulie chino ni Chisoneko chino yaya?” No yaakumbulula ngwo: “Ya mwanangana wa Aroma.” 17Yesu ngwenyi: “Hilwishilenu mwanangana wa Aroma yize niyenyi, Zambi neye yize niyenyi.” No yaamukomoka kuhiana.

Chihula hakutwala ku uhindukilo wa afu

(Tala nawa Mat 22:23-33; Luk 20:27-40)

18Amwe Asaduseu#12:18 ASADUSEU: yimwe mbunga yikepe ya Ayuda, chibichibi ya mahako waze atayijile shina mikanda ya Ubutukilo ndoo ku Shimbi ya Mukanda wa Zambi. yeeza kuli Yesu. (Waze akwamba ngwo: “Afu keechi kahinduka.”) Yaamwamba ngwo: 19“Longeshi, Mose hanatusonekena Shimbi yino ngwenyi: ‘Nyi umwe lunga hafwa, alioze hahichika pwo keshi mwana, mwanakwo chamutamba kumbata pwo yoze hanga asemene yayo ana.’ 20Yikubwa asongo ni atu shimbiali. Mutangu yambata pwo. Mwe lunga yafwa, kahichikile ko mwana. 21Mba chihata chenyi yamumbata. Neye yafwa, kahichikile ko mwana. Mba wa muchitatu chizechene. 22Chenacho nawaeswe shimbiali: yaamumbata, yaafwafwa, kaahichikile ko ana. Hakusula mwe pwo neye yafwa. 23Ha tangwa lia uhindukilo wa afu, makabwa pwo liaya? Mumu eswe shimbiali yaamumbata.”

24Yesu ngwenyi: “Nwakubinda. Nunanyingika ha chikuma chika, nyi? Mumu kunwanyingikine Mukanda wa Zambi, chibwe ndundo ja Zambi. 25Muze atu maakahinduka ku kufwa, malunga ni mapwo keechi kalimbata ni keechi kalihangisa malo, alioze maakabwa ngwe tunganda a mwilu. 26Alioze hakutwala ku uhindukilo wa afu, yenu kanda nuchitanga kama nilimwe tangwa mu mukanda wa Mose, hakutwala ku chibuta chize chawemene, nyi? Kuze Zambi ambilile Mose ngwenyi: ‘Nguli kwami Zambi ya Abrahama, ni ya Isake, ni ya Yakoba,’ 27Kulumbunuka ngwo, Zambi kali Zambi ya akwa mwono hi Zambi ya afu ko. Nunapianguka chikolo.”

Shimbi yilemu yahiana

(Tala nawa Mat 22:34-40; Luk 10:25-28)

28Umwe longeshi ya Shimbi yevwa kulihamika cho. Muze amwene ngwenyi, Yesu haakumbulula kanawa, yamuhula ngwenyi: “Shimbi yika yilemu yahiana mukachi ka Shimbi jeswe?” 29Yesu ngwenyi: “Shimbi yitangu yino ngwo: ‘Achivwenu yenu Aisraele, Mwene Zambi yetu, mwe Mwene umuwika. 30Zanga Mwene Zambi ye ni mbunge ye yeswe, ni mwono we weswe, ni manyonga je eswe, ni ngolo je jeswe.’ 31Shimbi ya muchaali yino ngwo: ‘Zanga mwenyembo we ngwe chize wakulizanga yena mwene.’ Kukushi Shimbi yikwo yahiana jino jaali.” 32Longeshi ya Shimbi yambila Yesu ngwenyi: “Che nacho, Longeshi, chize hiwamba chamwenemwene ngwe, Mwene mwe Zambi wika, kukushi Zambi mukwo shina iye. 33Kashika mutu azange Zambi ni mbunge yenyi yeswe, ni manyonga jenyi eswe, ni ngolo jenyi jeswe, ni azange mwenyembo wenyi ngwe chize akulizanga iye mwene. Kuzanga ngwe chino chinahiana milambu ya tushitu waze akwocha ha chilumbilo, ni milambu yeswe yikwo.” 34Muze Yesu amwene ngwe chize wakumbulwile ni mana, yamwamba ngwenyi: “Yena kuushi kusuku ni Wanangana wa Zambi.”

Chize ku tangwa lize niumwe wahamukine kumuhula nawa chihula.

Chihula hakutwala kuli David ni Chilamwina yoze Zambi alakenyene

(Tala nawa Mat 22:41-46; Luk 20:41-44)

35Yesu, muze te analongesa mu zuwo lia Zambi lia Ayuda, yahula atu ngwenyi: “Ngwe kuchi alongeshi a Shimbi maahasa kwamba ngwo: ‘Chilamwina yoze Zambi alakenyene kali mwana wa David’? 36Mumu David iye mwene hanahanjika ni tachi ja Mwiku wa Linanga ngwenyi:

‘Mwene Zambi hanambila Mwene wami ngwenyi:

Twama ku chindume chami

ndoo mungukasa akwa kole je kushi lia molu je.’

37David iye mwene kakumuvuluka ngwenyi: ‘Mwene wami.’ Mba ngwe kuchi Chilamwina yoze Zambi alakenyene mahasa kubwa mwanenyi?”

Yesu yatungununa alongeshi a Shimbi

(Tala nawa Mat 23:1-36; Luk 20:45-47)

Atu anji yaawahilila ha kwivwa Yesu. 38Mu longeso lienyi yamba ngwenyi: “Kanyaminenu alongeshi a Shimbi, waze akuzanga kwendangana ni mahina a lubula, waze akuzanga atu kwameneka mu yitanda, 39waze akuzanga yitwamo ya kulutwe mu mazuwo a kuwayila, ni mihela ya vumbi mu yiwanyino. 40Kaakwiya yuma ya mu mazuwo ja mapwo waze te haanafwisa malunga. Ha ulembekese wo kaakulemba Chipinji chisuku. Lamba liahiana maakamona!”

Mulambu wa twamishi

(Tala nawa Luk 21:1-4)

41Yesu yatwama hakamwihi ni mushete wa chawana cha mu zuwo lia Zambi lia Ayuda, yatala chize mbunga asele mo mbongo. Pichi anji asele mo mbongo jinji. 42Umwe pwo, yoze te hanafwisa lunga, yeza, yasa mo tumbongo twali, twenatwo twa ndando yikepe. 43Yesu yatambika tumbaji twenyi, yaamba ngwenyi: “Chamwenemwene ngunanwambulwila ngwami, twamishi yono chiswale, hasa mo kuhiana akwo eswe. 44Mumu waze akwo haasa mo nikulita ni ubite wo unji Wahiana, alioze iye, mu uswale wenyi, hahana yize yeswe abwanga nayo ha yakulia yenyi.”

Currently Selected:

Marku 12: CHK1970

Highlight

Copy