Mateu 9

Yesu yawuka mukwa kalepa

(Tala nawa Mar 2:1-12; Luk 5:17-26)

1Yesu yanjila mu wato, yazauka chitende, yaheta ku limbo kuze akolelele. 2Kuma amwe yaamunehena mukwa kalepa, te kanabombo ha muhela. Muze hamona ufulielo wo, Yesu yambila mukwa kalepa ngwenyi: “Mwanami, hamuka, milonga ye hiyakonekenewa.” 3Amwe alongeshi a Shimbi yaalihanjekesa mu mbunge jo ngwo: “Mutu yono kanasaula Zambi!” 4Yesu nikunyingika manyonga jo, yaahula ngwenyi: “Kuchi kevwe nuli ni manyonga abi ngwe wano? 5Chashi chika, shina kwamba ngwami: ‘Milonga ye hiyakonekenewa,’ hanji kwamba ngwami: ‘Katuka, wende’? 6Alioze ngunazange nunyingike ngwenu, Mwana Mutu#9:6 mwana mutu: tala 8:20 chiyulo akwete hano hashi cha kukonekena milonga.” Mba yambila mukwa kalepa ngwenyi: “Katuka, anda muhela we, yako ku mahie!”

7Mwe mutu yakatuka yaya ku mahienyi. 8Muze mbunga achimwene, yevwa woma unji, yaalemesa Zambi ha kuhana chiyulo chibwa haha kuli atu.

Yesu yatambika Mateu

(Tala nawa Mar 2:13-17; Luk 5:27-32)

9Yesu yakatuka ko. Muze te anabalika, yamona Mateu, te kanatwama mu zuwo lia kulambwishila lijimu. Yesu yamwamba ngwenyi: “Ngukaule.” Mateu yakatuka, yamukaula.

10Muze te Yesu anali mu zuwo lia Mateu, akwa kulambwisa lijimu ni akwa lufuma mubi anji yaalikungulula ku mesa hamwe ni Yesu ni tumbaji twenyi. 11Afariseu#9:11 afariseu: tala 3:7 yaachimona. Mba yaahula tumbaji twenyi ngwo: “Kuchi kevwe Longeshi yenu anali hamwe ni akwa kulambwisa lijimu ni akwa lufuma mubi?” 12Yesu yachivwa, yaamba ngwenyi: “Ahinduka keeshi kufupa mbuki, alioze shina waze akuyiza e akumufupa. 13Yeenu nulilongese ulumbunwiso wa maliji wano a mu Mukanda wa Zambi, ngwo: ‘Chishi kuzanga atu akungulambula milambu ya tushitu, alioze ngunazange alivwile keke.’ Mumu chejile mu kutambika akwa ululi, alioze akwa lufuma mubi.”

Chihula hakutwala ku kulitwamina kulia

(Tala nawa Mar 2:18-22; Luk 5:33-39)

14Mba tumbaji twa Yoano Chipapachisa yakundama kuli Yesu nikumuhula ngwo: “Kuchi yetu ni Afariseu twakulitwamina kulia kanji mukuwayila Zambi, alioze tumbaji twe keeshi kuchilinga?” 15Yesu yaakumbulula ngwenyi: “Masepa ja sandungi maahasa kunenganyana shimbu sandungi uchili hamwe no, nyi? Ka! Alioze tangwa mulikeza muze maakachiza sandungi, mba maakalitwamina kulia.

16“Mutu niumwe manuka hina likulu ni chando chaha, mumu, nyi machilinga, chando chaha muchitanuna hina likulu, ni chituwa machibwa chinene kuhiana chitangu. 17Atu keeshi kulonga vinyu yaha mu tuku jikulu ja malambu. Nyi maachilinga tuku mujifwa, vinyu muyimwangana, ni je tuku mujibihia. Alioze kaakulonga vinyu yaha mu tuku jaha, mba yeswe yaali muyilinduluka kanawa.”

Mwana pwo wa mukwa kuyula ni pwo yoze wakwachile ku hina lia Yesu

(Tala nawa Mar 5:21-43; Luk 8:40-56)

18Shimbu te Yesu machihanjika no, umwe mukwa kuyula yeza, yaliumba ha makungunwa ku meso ja Yesu, ngwenyi: “Mwanami wa pwo haliabwila lume afwa, alioze tweya kama umuse kwoko, kumahinduka.” 19Yesu yakatuka, yamukaula hamwe ni tumbaji twenyi.

20Umwe pwo, yoze wamwene lamba ni musongo wa kuhita manyinga miaka kumi ni yaali, yakundama kunyima lia Yesu, yakwata ku songo lia hina lienyi, 21yalihanjekesa ngwenyi. “Nyi nakwata lume ku hina lienyi, munguhinduka.”

22Yesu yatewuluka, yamumona, yamba ngwenyi: “Mwanami, hamuka! Ufulielo we hiwakuwuka.” Shimbu lizeliene mwe pwo yahinduka.

23Muze Yesu hanjila mu zuwo lia mukwa kuyula, yamona akwa kwimba yisanji ni mbunga ya atu te analinyachinga, 24yamba ngwenyi: “Tuhukenu! Mwana pwo kafwile ko, alioze mu tulo ali.” No yaamuseha. 25Muze hatuhwisa mbunga, Yesu yanjila mu chibatulo kuze abwile mwana pwo, yamukwata ku kwoko. Mwe mwana pwo yakatuka. 26Sango yijimwangana mu chifuchi chize cheswe.

Yesu yawuka tupuputa aali

27Yesu yakatuka ko. Muze te anabalika, tupuputa aali yaamukaula nikukololoka ngwo: “Mwana wa David,#9:27 mwana WA David: jina likwo lia Chilamwina yoze Zambi alakenyene, yoze makahinga mwanangana David. tuvwile kama keke!” 28Muze Yesu hanjila mu zuwo, tupuputa yaamukundama. Yesu yaahula ngwenyi: “Nunafuliela ngwenu, ngunahase kulinga chino, nyi?” Yaamukumbulula ngwo: “Ewa, Mwene!” 29Mba Yesu yaakwata ku meso nikwamba ngwenyi: “Chibwe kuli yenu nikulita ni ufulielo wenu!” 30Meso jo yaalaula. Yesu yaaha koki chikolo ngwenyi: “Mutu niumwe kanda achinyingika!” 31Alioze yaaya kwo, yaafumanyisa lufuma wenyi mu chifuchi chize cheswe.

Yesu yawuka kanaye

32Shimbu te Yesu machituhuka, atu yaamenehena kanaye yoze kahashile kuhanjika mumu te mwiku wa luchisa akwete. 33Muze Yesu hatuhwisa mwiku uze wa luchisa, kanaye yabutuka kuhanjika. Mbunga yaalishimwoka kuhiana nikwamba ngwo: “Kutwachimwene nilimwe tangwa mu Israele!” 34Alioze Afariseu yaamba ngwo: “Mwata wa mwiku wa luchisa unamwehe tachi ja kutuhwisa najo mwiku uze.”

Yesu yevwila mbunga keke

35Yesu yendangana mu membo eswe ni mu yihunda yeswe, yambujola Sango Jibema ja Wanangana mu mazuwo jo a kuwayila, yawuka milali yeswe ya misongo ni weji. 36Muze amwene mbunga jize, yeevwila keke, mumu atu waze te kaanalungajala ni kuhonga ngwe mapanga waze keeshi kafunga. 37Mba yambila tumbaji twenyi ngwenyi: “Mihuko yinji yili ko, alioze akwa kuyihela kaali akepe. 38Liumbenu kuli Mwenya mihuko hanga akatume akwa milimo ni kuhela mihuko yenyi.”

Currently Selected:

Mateu 9: CHK1970

Highlight

Copy