Mateu 17

Mujimba wa Yesu yiwalumuka

(Tala nawa Mar 9:2-13; Luk 9:28-36)

1Muze matangwa asambano haabalika, Yesu yatwala hamwe nenyi Petulu, ni asongo ni mutu Tiangu (Jake) ni Yoano, yaakandwisa ha mulundu usuku, haze yaabwa ukawo. 2Mba kusoloka chenyi yichalumuka ku meso jo; meso jenyi yaahenya ngwe tangwa; mahina jenyi yaabwa atoma ngwe Pangu. 3Hohene Mose ni Eliya yaasoloka, te pande anate ni Yesu. 4Petulu yambila Yesu ngwenyi: “Mwene, chinawaha tubwe kuno. Nyi unazange, mungutunga yikulika yitatu, cha yena, ni cha Mose, ni cha Eliya.” 5Shimbu te machihanjika, lelwa lia kubeyima yiliaazulamina. Yeevwa liji mu lelwa ngwo: “Yono mwe Mwanami yoze nakuzanga kuhiana, nakuwahilila nenyi. Mwivwenu!” 6Tumbaji, ha kwivwa liji lino, yeevwa woma unji, yaafulamana. 7Yesu yaakundama, yaasa moko, yaamba ngwenyi: “Katukenu, kanda nwivwa woma!” 8No yaahetuka, kaamwene mutu niumwe shina Yesu wika.

9Muze te anapalumuka ha mulundu, Yesu yaaha koki ngwenyi: “Kanda nwambulwila niumwe yize hinwamona ndoo Zambi makahindwisa Mwana Mutu#17:9 MWANA MUTU: tala 8:20. ku kufwa.” 10Mba tumbaji yaahula Yesu ngwo: “Kuchi mba alongeshi a Simbi akwamba ngwo: ‘Chatamba Eliya kwiza hatangu’?” 11Yesu ngwenyi: “Chenacho, Eliya chamutamba kwiza hatangu ni kululika yuma yeswe. 12Alioze nguna nwambulwila ngwami, Eliya haneza kulu. Atu kamunyingikine ko. Haanamulingi chize cheswe azangile. Chenacho ni mwe Mwana Mutu maakamuhungumiona.”

13Mba tumbaji yaanyingika ngwo, kuma te kanahanjika no hakutwala kuli Yoano Chipapachisa.

Yesu yatuhwisa mwiku wa luchisa muli mwana

(Tala nawa Mar 9:14-29; Luk 9:37-43a)

14Muze haaheta ku mbunga, umwe mutu yakundama kuli Yesu, yaliondela ku meso jenyi ngwenyi: 15“Mwene, muvwile kama mwanami wa lunga keke. Yikola ya chikonya akwete. Kakubinda chinji; kanji akulimbwokela ha kahia ni mu meya. 16Namunehanga kuli tumbaji twe, alioze kaahashile kumuwuka.” 17Yesu ngwenyi: “Mhmm! Ayenu, akwa kuyambashana, kunwabihia! Ndoo mwiji muka Changutamba kubwa hamwe ni yenu? Ndoo mwiji muka Changutamba kulihumikiza ni yenu? Ngunehenenu mwe mwana!” 18Yesu yakalukila mwiku wa luchisa. Yiutuhuka muli mwana. Mwe mwana yahinduka shimbu lizeliene.

19Hohene tumbaji yaakundama kuli Yesu ku tenga. Yaamuhula ngwo: “Kuchi te yetu kutwahashile kutuhwisa mwiku uze?” 20Yesu ngwenyi: “Mumu ufulielo wenu ukepe. Chamwenemwene ngunanwambulwila ngwami, nyi nuli ni ufulielo ngwe lunona wa mostarde, kachi munwamba ku mulundu uno ngwenu: ‘Tutuluka, ulimbile akuze,’ newo muututuluka. Nichimwe kunuchi kachisa kenu! [ 21Alioze mwiku ngwe uno kuushi kutuhuka shina ha kulemba ni kulitwamina kulia ha kuwayile Zambi.]”#17:21 Yisoneko yikulu yikwo kiyishi ni maliji wano.

Yesu yambulula nawa kufwa chenyi ni uhindukila wenyi

(Tala nawa Mar 9:30-32; Luk 9:43b-45)

22Muze tumbaji twa Yesu haalikungulula hamuwika mu Galilea, Yesu yaamba ngwenyi: “Maakakunjika Mwana Mutu ku moko ja atu 23waze maakamushiha. Mba ha tangwa lia muchitatu Zambi makamuhindwisa.” Tumbaji weevwa chinyengo chinji.

Kulambwisa lijimu lia zuwo lia Zambi

24Muze Yesu ni tumbaji twenyi haaheta ku Kafarnaume,#17:24 kafarnaume: tala 8:5. akwa kulambwisa lijimu lia zuwo lia Zambi lia Ayuda yaakundama kuli Petulu nikumuhula ngwo: “Longeshi yenu keshi kulambula lijimu lia zuwo lia Zambi, nyi?” 25Petulu ngwenyi: “Ewa, kakulambula.” Muze Petulu hanjila mu zuwo, Yesu yahanga kumuhula ngwenyi: “Kuchi Unanyongo Simone, aya akulambula lijimu hanji milambu kuli mianangana a hano hashi, enyembo a mu chifuchi, hanji yikambala?” 26Petulu ngwenyi: “Yilambala.” Yesu ngwenyi: “Nyi chocho, enyembo kuchatambile kulambula. 27Alioze kanda tutalingisa atu wano. Kashika, yako ku chitende, konga lowa mu meya. Yishi yoze muulianga kukwata, muubakula mu kanwa, muuwana mo lumbongo yoze unalite kulambula lijimu hali yami ni yena. Mwande, ulambule lijimu lietu.”

Currently Selected:

Mateu 17: CHK1970

Highlight

Copy