Mateu 10

Tunganda kumi ni aali

(Tala nawa Mar 3:13-19; Luk 6:12-16)

1Yesu yatambika tumbaji twenyi kumi ni aali, yaaha chiyulo cha kutuhwisa nacho mwiku wa luchisa ni kuwuka milali yeswe ya misongo ni weji. 2Majina ja tunganda kumi ni aali wano: hatangu Simone (yoze te akuvuluka ngwo, Petulu) ni mwanakwo Andre, ni Tiangu (Jake) ni mwanakwo Yoano—ana ja Zebedeu; 3Filipe ni Bartolomeu; Tomase ni Mateu, mukwa kulambwisa lijimu; Tiangu (Jake), mwana wa Alfeu, ni Tadeu; 4Simone, mukwa kuzanga utuswilo wa chifuchi; ni Yadase Kakeriote, yoze wakunjikile Yesu kuli akwa kole jenyi.

Yesu yatuma tunganda kumi ni aali

(Tala nawa Mar 6:7-13; Luk 9:1-6)

5Yesu yatuma tunganda kumi ni aali ni Shimbi jino ngwenyi: “Kanda nuya mu yifuchi ya waze hi Ayuda ko, kanda nunjila mu membo ja Asamaria. 6Shinoho yeenu kuli mapanga akutoka a kuli Aisraele. 7Yeenu ni kwambujola ngwenu: ‘Wanangana wa mwilu hiwakundama!’ 8Wukenu mieji, hindwisenu afu, bemesenu akwa mbumba, tuhwisenu mwiku wa luchisa. Hinunatambula chawana, kashika hanenu chawana. 9Kanda numbata chibwe oru, hanji prata, chibwe mbongo mu miya yenu. 10Kanda numbata chibwe chibakumuna mu wenyi, hanji chikuto cha muchaali, chibwe sapato, hanji lukanda. Mumu mukwa milimo kanatela yakulia yenyi.

11“Muze munukaheta mu limwe limbo hanji mu chimwe chihunda, fupenu yoze mazanga kunuzumbula. Mba twamenu ku mahienyi ndoo munukakatuka kwe kuze. 12Muze munukanjila mu limwe zuwo, nukalimeneke. 13Nyi atu a mu zuwo lize maakanuzumbula, kumeneka chenu cha uhwimino chikasale muli ayo. Alioze nyi kaasolo kunuzumbula, kumeneka chenu cha uhwimino chikahiluke kuli yenu. 14Nyi zuwo limwe hanji chihunda chimwe maakanulituna, hanji keechi kanwivwa, katukenu ko, kukumunenu fufuta ya ku molu jenu. 15Chamwenemwene ngunanwambulwila ngwami, ha tangwa lia ubatwilo, lamba linji mulikabwa ha limbo lize kuhiana lize lia Sodome ni Gomora!”

Yihungumiona yize muyikeza kulutwe

(Tala nawa Mar 13:9-13; Luk 21:12-17)

16“Achivwenu! Ngunanutumu ngwe mapanga mukachi ka tungunga. Kanyamenu ngwe tupela, bemenu ngwe membe. 17Kanyamenu, mumu atu maakanukwata, maakanukunjika ku Mbunga ya Ngaji ja Ayuda, maakanulamba ni fimbo (shikote) mu mazuwo jo a kuwayila. 18Maakanukunjika ku meso ja akwa lutwe ni mianangana mumu hali yami, ha kwashindakenya Sango Jibema ni waze hi Ayuda ko. 19Muze maakanukunjika kuli ngaji, kanda nukalibikala hakutwala ku chize munukamba hanji ngwe kuchi munukahasa kuchamba. Maliji waze munukahanjika makanwaho ha shimbu lizeliene. 20Maliji waze hi a yenwene ko, alioze Mwiku wa Tatenu muukahanjika muli yenu.

21“Asongo ni mutu maakalikunjika ku kufwa. Atata maakalingila nawa ana jo chizechene. Ana maakakatukila yisemi jo ni kwashiha. 22Atu eswe maakanuvutwokela mumu ha jina liami. Alioze yoze makanyongonona ndoo ku songo kumakamulamwina. 23Muze maakanuhungumiona mu limbo limwe, chinyinenu ku likwo. Chamwenemwene ngunanwambulwila ngwami, kunuchi kamanununa kwendangana mu membo eswe a Israele ndoo mwe Mwana Mutu makeza.

24“Kambaji keshi kuhiana longeshi yenyi, chibwe kavumbi keshi kuhiana mwata wenyi. 25Chinatambe kambaji kubwa ngwe longeshi yenyi muze halilongesa, ni kavumbi ngwe mwata wenyi muze hahasa. Nyi haanavuluka Mwenya zuwo ngwo: ‘Belzebu#10:25 BELZEBU: jina likwo lia Sakwonga, mwe mukwa lutwe wa mwiku wa luchisa.,’ ni waze a mu zuwo lienyi kumaakaavuluka majina abi kuhiana.”

Yoze chatamba kuvwila woma

(Tala nawa Luk 12:2-7)

26“Kanda nuvwila atu woma. Chize cheswe chaswamanyine, makachisolola; ni chize cha kuhengeka, makachinyingikisa. 27Chize ngunanwambulwila mu milima, chambujolenu mu pangu. Chize nunevu ku tenga, Chambululenu ha mafulumba ja mazuwo. 28Kanda nuvwila woma waze maashiha mujimba wika, hindu kaahashile kushiha mwono wamwenemwene. Shinoho muvwilenu woma Zambi yoze mahasa kwonona yeswe yaali, mujimba ni mwono wamwenemwene, ni kuyimbila mu kahia. 29Atu keeshi kulanjisa tutujila twaali ni kalumbongo kamuwika, nyi? Hindu niumwe wa kuli ayo mahasa kuholoka, nyi Tatenu kachitayijile ko. 30Alioze hakutwala kuli yenu, chibwe je kambu ja ku mitwe yenu hanajalula jeswe. 31Kashika, kanda nwivwa woma, mumu ulemu wenu unahiana wa tutujila tunji!”

Kutayiza hanji kulikala Yesu Kristu

(Tala nawa Luk 12:8-9)

32“Yoze mangutayiza ku meso ja atu, ni yami nawa mungumutayiza ku meso ja Tata wa mwilu. 33Alioze yoze mangulikala ku meso ja atu, ni yami nawa mungulikala ye ku meso ja Tata wa mwilu.”

Hi uhwimino ko alioze mukwale

(Tala nawa Luk 12:51-53; 14:26-27)

34“Kanda nunyonga ngwenu, nejile ni kuneha uhwimino hashi. Chejile ni kuneha uhwimino, alioze mukwale. 35Nejile ni kuhandununa mwana ni tato, mwana pwo ni naye, tembwa mwana ni naye weno. 36Akwa kole ja mutu maakabwa akwa zuwo lienyi mwene.

37“Yoze mazanga tato hanji naye kuhiana yami, kangutelele ko. Yoze mazanga mwanenyi wa lunga hanji wa pwo kuhiana yami, kangutelele ko. 38Yoze keshi kuzundula kulusu yenyi ni keshi kungukaula, kangutelele ko. 39Yoze meseka kufunga mwono wenyi, makautokesa. Alioze yoze matokesa mwono wenyi mumu hali yami, makauwana nawa.”

Yawana

(Tala nawa Mar 9:41)

40“Yoze manutambula, mangutambula yami. Yoze mangutambula, matambula yoze wangutumine. 41Yoze matambula mukwa munanyi wa Zambi mumu kali mukwa munanyi, makatambula chawana chize mukwa munanyi makatambula. Yoze matambula mukwa ululi mumu kali mukwa ululi, makatambula chawana chize mukwa ululi makalambula. 42Chamwenemwene ngunanwambulwila ngwami, yoze mahana chibwe musenge ukepe wa meya a kekema kuli umwe wa tumbaji twami wano alelu ahiana, mumu kali kambaji kami, makalambula chawana chenyi.”

Currently Selected:

Mateu 10: CHK1970

Highlight

Copy