Luka 23
23
Yesu ku meso ja Herode
(Tala nawa Mat 27:1-2, 11-14; Mar 15:1-5; Yoa 18:28-38)
1Mbunga yeswe yaakatuka, yaatwala Yesu ku meso ja Pilatu,#23:1 PILATU: tala 3:1. 2yaabutuka kumusuma ngwo: “Tunakawana lunga yono nikubinjisa atu jetu, ngwenyi: ‘Kanda nulambula mwanangana wa Aroma lijimu.’ Ni kakulipwisa iye mwene Kristu, mwanangana.” 3Pilatu yamuhula ngwenyi: “Mwe mwanangana wa Ayuda yena, nyi ka?” Yesu ngwenyi: “Kuwamba.” 4Mba Pilatu yambila mahako a lutwe a Zambi ni mbunga ngwenyi: “Chawanyine chitela nichimwe cha kuhishila mutu yono.” 5Alioze yaashindakenya kuhiana ngwo: “Kakuvundula atu ni longeso lienyi! Hanabutuka mu chifuchi cha Galilea,#23:5 GALILEA: tala 1:26. hanabalika mu chifuchi cheswe cha Yudea, ni haliabwila haneza ndoo kuno.”
Yesu ku meso ja Herode
6Muze Pilatu hevwa maliji wano, yahula ngwenyi: “Mutu yono Kagalilea, nyi?” 7Muze hevwa ngwo, Yesu kali wa ku chifuchi cha Herode,#23:7 HERODE: Herode Antipase, tala 3:1. yamutuma kuli Herode yoze te uli ku Yerusaleme ha matangwa waze. 8Herode yawahilila kuhiana kumona Yesu, mumu hanevu hakutwala kuli iye, ni yazanga kulu kumumona. Yatala tala kumona chimwe chilayi. 9Yamuhula yihula yinji, alioze Yesu kakumbulwile nichimwe. 10Mahako a lutwe ni alongeshi a Shimbi yaakatukila Yesu nikumusuma chikolo. 11Herode ni tujita twenyi yaamukekuna, yaamulelesa, yaamujika hina lia lubula, yaamuhilwisa maha Pilatu. 12Tangwa lizeliene Herode ni Pilatu yaalikata. Hatangu te abwile akwa kole.
Pilatu yakunjika Yesu ku kufwa
(Tala nawa Mat 27:15-26; Mar 15:6-15; Yoa 18:39—19:16)
13Pilatu yakungulula mahako a lutwe a Zambi, ni akwa kuyula, ni atu, 14yaamba ngwenyi: “Nwangunehenanga mutu yono ngwenu, kakuvundula atu. Alioze namuhulanga ku meso jenu. Chawanyine chitela nichimwe chize nunamusumina nacho. 15Chibwe Herode ka, mumu katutuminanga ye. Mutu yono kalingile nichimwe cha kutela kufwa. 16Mungumulambisa fimbo (shikote), mba mungumutusula.” [ 17Ha chiwanyino cheswe cha Kubalika, Pilatu te chamutamba kwatuswila umwe funge.#23:17 Yisoneko yikwo yikulu kuyishi ni maliji wano.] 18Alioze mbunga yaakololoka ngwo: “Mushihe! Tutuswile Baraba!” 19(Baraba te haanamuse mu zuwo lia lamba ha Vunda jize jabwile mu limbo, ni mumu washihile atu.) 20Pilatu yazanga kutusula Yesu, kashika yahanjika nawa ku mbunga. 21Alioze ayo yaakololoka ngwo: “Muhachile ha kulusu! Muhachile ha kulusu!” 22Pilatu yaakumbulula chisuho cha muchitatu nikwamba ngwenyi: “Chibi chika kevwe anakalinga? Chamuwanyine ni chitela chimwe cha kutela kufwa! Mungumulambisa ni fimbo (shikote), mba mungumutusula.” 23Alioze yaakololoka kuhiana ngwo: “Muhachile ha kulusu, muhachile ha kulusu.” Yaakumba ni maliji jo. 24Pilatu yatayiza, yabatwila Yesu, 25yatusula mutu yoze echile, yoze asele mu zuwo lia lamba mumu ha Vunda ni ha kushiha atu, yaakunjikila Yesu amulinge chize azangile.
Tujita yaahata Yesu ha kulusu
(Tala nawa Mat 27:32-44; Mar 15:21-32; Yoa 19:17-27)
26Muze te anatwala Yesu, yaatakana ni umwe mutu wa ku Sirene#23:26 SIRENE: lie limbo lia wanangana mu chifuchi cha Libia ku norde mu Afrika., jina lienyi Simone, te ku minda anakatuka. Tujita yamukwata ni tachi, yaamutwika kulusu ayimbate kunyima lia Yesu.
27Mbunga yinene ya atu amukawile. Mukachi ko mapwo te analili mbimbi ni kulilambalamba ha matulo. 28Yesu yatewuluka kuli ayo, ngwenyi: “Yenu amama a mu Yerusaleme, kanda nungulila yami, shinoho lililenu yenwene ni ana jenu. 29Mumu matangwa maakeza muze maakamba ngwo: ‘Kawaha miumba, waze kasemene ni kamwishine nilimwe tangwa!’ 30Mba atu maakambila milundu ngwo: ‘Tuuzukilenu!’ ni mikandu ngwo: ‘Tuswekenu!’ 31Mumu nyi maalinga chocho ha mutondo wa wisu, kuchi muchikabwa ha mutondo umu?”
32Tujita yaatwala nawa malunga akwo aali, yingulungulu, hanga ashihe hamwe ni Yesu. 33Muze haaheta kuma kuze akuvuluka ngwo: “Balanga lia Mutwe,” yaahachila ko Yesu ha kulusu, yaahata nawa yingulungulu aali ha makulusu, umuwika ku chindume, mukwo ku chimeso. 34Yesu yalemba ngwenyi: “Tata, akonekene kama, mumu kaanyingikine chize analingi.” No yalitetela mahina jenyi ni kuta chela. 35Atu yaamana nikutala. Miata ja Ayuda yaamukekuna ngwo: “Hanalamwina atu akwo, alilamwine mwene, nyi kali Chilamwina yoze Zambi alakenyene, yoze atongwele Zambi!” 36Tujita no yamukekuna, yaakundama nikumwaha vinaigre, 37yaamba ngwo: “Nyi mwe mwanangana wa Ayuda yena, lilamwine yena mwene!” 38Helu lienyi hasonewene ngwo: “Yono mwe Mwanangana wa Ayuda.”
39Umwe wa kuli yingulungulu waze ahachiwile ha makulusu yamusaula ngwenyi: “Mwe Chilamwina yoze Zambi alakenyene yena, nyi? Lilamwina yena mwene ni yetu nawa!” 40Alioze chingulungulu mukwo yamukanjisa ngwenyi: “Yena kuushi kuvwila Zambi woma, nyi? Yetu tuli nenyi mu ubatwilo umuwika, 41ni ubatwilo wetu unatute, mumu tunatambula yize yinalite ni yitanga yetu. Alioze awu kalingile chibi nichimwe.” 42Mba yambila Yesu ngwenyi: “Yesu, Ungwiwuluka kama muze muukeza mu Wanangana we!” 43Neye ngwenyi: “Chamwenemwene ngunakwambulwila ngwami, musono uno kumuubwa hamwe ni yami muma mwa uwahililo.”
Kufwa cha Yesu
(Tala nawa Mat 27:45-56; Mar 15:33-41; Yoa 19:28-30)
44-45Tangwa ngwe ha muchima, chifuchi cheswe yichibwa ni milima bwii, yiisala ndoo ola jitatu. Mba chikalakala cha hina lia mu zuwo lia Zambi yichibulika mukachi. 46Yesu yakololoka chikolo ngwenyi: “Tata ngunakunjika mwono wami mu moko je!” Muze te hamba maliji wano, yasutula mwono wenyi. 47Mwata wa tujita, muze hamona yize yabwile, yachichimieka Zambi, ngwenyi: “Chamwenemwene mutu yono mukwa ululi!” 48Mbunga jeswe waze alikungulwile ni kutala, muze haachimona, yaahiluka nikulambalamba ha mabambo. 49Masepa ja Yesu eswe, ni mapwo waze te akumukaula chize ku Galilea#23:49 GALILEA: tala 1:26. yaamana kusuku, yaamona yize yeswe.
Kufunda cha Yesu
50-51Yikubwa umwe lunga, jina lienyi Josefe, wa ku Arimatea#23:50-51 arimatea: limwe limbo kilometre 35 ku norde ku chitokelo cha Yerusaleme., limwe limbo lia Ayuda. Mutu mubema ni mukwa ululi, te kakutwaminyina kwiza cha wanangana wa Zambi. Neye wa ku Mbunga ya Ngaji ja Ayuda,#23:50-51 Mbunga ya ngaji ja Ayuda: tala 22:66. alioze katayijile ko ubatwilo wo ni yize alingile. 52Neye yaya maha Pilatu#23:52 Pilatu: tala 3:1. nikumwita mujimba wa Yesu. 53Mba yausunwisa ha kulusu, yauvunga mu hina litoma, yausa mu fuka liakutota mu liwe, fuka lize te kanda achifunda mo mutu niumwe. 54Lienalio lie tangwa lia muchitano lia semane, tangwa lia kuhwima te himulibutuka.
55Mapwo waze akawile Yesu chize ku chifuchi cha Galilea, yeeza hamwe ni Josefe ni kutala fuka, yaamona chize afunjile Yesu. 56Mba yaahiluka ku mahio, yaalulieka maji ni yuma ya vumba libema mu kuwayisa mujimba wenyi.
Ha tangwa lia kuhwima yaanama nikulita ni Shimbi.
Currently Selected:
Luka 23: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
