Luka 22

Akwa lutwe ja Ayuda yaatwama Yesu punga

(Tala nawa Mat 26:1-5; Mar 14:1-2; Yoa 11:45-53)

1Chiwanyino cha Mbolo Yize Kuyishi Yitumbo, te akuvuluka ngwo, Kubalika, yichikundama. 2Mahako a lutwe a Zambi ni alongeshi a Shimbi yaafupafupa mana a kushiha Yesu, mumu te anevwila atu woma.

Yudase yatayiza kukunjika Yesu kuli akwa kole jenyi

(Tala nawa Mat 26:14-16; Mar 14:10-11)

3Hohene Sakwonga yanjila muli Yudase, umwe wa kuli tumbaji kumi ni aali, yoze te akuvuluka ngwo, Kakeriote. 4Mba Yudase yaya hanga ahanjike ni mahako a lutwe a Zambi ni makulwana ja tufunga twa zuwo lia Zambi#22:4 tufunga twa zuwo lia zambi: Alevi, milimo yo te kulujika ni kufunga zuwo lia Zambi. ngwe chize mahasa kwakunjika Yesu. 5No yaawahilila. Yaamulakenya kumwaha mbongo. 6Yudase yatayiza, yabutuka kufupa mana a kwakunjika Yesu muze mbunga keechi kunyingika.

Yesu yalia chiwanyino cha Kubalika (Pake)

(Tala nawa Mat 26:17-25; Mar 14:12-21; Yoa 13:21-30)

7Tangwa lia chiwanyino cha Mbolo Yize Kuyishi Yitumbo yilikundama, lize te chatamba kulambula milambu ya ana mapanga ya kwiwuluka Kubalika. 8Yesu yatuma Petulu ni Yoano ngwenyi: “Yeenu nutululikile yakulia ya kwiwuluka kubalika.” 9No yaamuhula ngwo: “Kulihi unazange tukululikile yo.” 10Neye yaamba ngwenyi: “Talenu! Shimbu lize mununjila mu limbo, munutakana ni mutu unambata mulondo wa meya. Mukaulenu. 11Kuze manjila, nulweza mwenya zuwo ngwenu: ‘Longeshi kanahula ngwenyi, chilihi chibatulo muze mungulila hamwe ni tumbaji twami yakulia ya kwiwuluka Kubalika?’ 12Neye manulweza zuwo lia kwilu, chibatulo chinene ni yuma yeswe yinasu mo. Mwenamo munutululikila yakulia.” 13No yaaya, yaawana yuma yeswe ngwe chize ambile Yesu, yaalulika yakulia ya kwiwuluka Kubalika.

Mesa ya Mwene Yesu

(Tala nawa Mat 26:26-30; Mar 14:22-26; 1 Kor 11:23-25)

14Muze ola hiyeza, Yesu yatwama ku mesa hamwe ni tunganda twenyi, 15yaamba ngwenyi: “Ni usona unji hingunazange kulia yakulia yino ya kwiwuluka Kubalika hamwe ni yenu shimbu kanda nguchimona lamba! 16Mumu ngunanwambulwila ngwami, chichi kuyilia nawa nichimwe ndoo ni muze ulumbunwiso wayo muukamweneka zwalala mu wanangana wa Zambi.” 17Mba yanda musenge, yasakwila Zambi, yamba ngwenyi: “Wenu, lisumwinenu wo hakachi kenu. 18Mumu ngunanwambulwila ngwami, chichi kanwa nawa vinyu yino ndoo ku tangwa lize Wanangana wa Zambi muukeza.” 19Mba yanda mbolo, yasakwila Zambi, yayibalula, mba yayaha tumbaji twenyi nikwamba ngwenyi: “Mbolo yino yili mujimba wami [uze ngunahane mumu hali yenu. Lingenu chino ni kungwiwuluka.” 20Muze haalia, Yesu yaaha nawa musenge chizechene, ngwenyi: “Musenge uno wa vinyu uli Usendo Waha wa Zambi wa manyinga jami waze anamwangana mumu hali yenu.]#22:20 Yisoneko yikwo yikulu kuyishi ni maliji wano.

21“Alioze Talenu! yoze unangukunjika kuli akwa kole jami hano hali ku mesa hamwe ni yami! 22Chamwenemwene Mwana Mutu#22:22 mwana mutu: tala 5:24. kumafwa ngwe chize Zambi hanachibatula, alioze lamba lienyi mutu yoze unamukunjika!” 23No yaabutuka kulihulahula ngwo: “Iya mukachi ketu malinga chino?”

Tumbaji yalihamika ngwo: “Iya munene Wahiana?”

24Tumbaji yaabutuka kulihamika ngwo: “Iya munene Wahiana?” 25Yesu yaamba ngwenyi: “Mianangana ja hashi kaakuyula atu jo, ni e atu kaakwavuluka ngwo: ‘Tangia yibema.’ 26Alioze hi chocho ko ni yenu. Mumu yoze munene Wahiana hakachi kenu chamutamba kubwa ngwe kanuke, ni mukwa lutwe chamutamba kubwa ngwe mukwa kuvumbika. 27Iya munene Wahiana, yoze unatwama ku mesa hanji yoze unavumbika: Ngwami, yoze uli ku mesa, nyi? Alioze yami nguli mukachi kenu ngwe yoze unavumbika.

28“Hinunanyongonona hamwe ni yami mu yeseko yami. 29Ngwe Tata hanangusela Wanangana, chimuwika nawa ngunanusela Wanangana. 30Munukalia ni munukanwa ku mesa yami mu Wanangana wami. Munukatwama ha yitwamo ya mianangana ni kubatwila mavungu kumi ni aali a Israele.”

Yesu ngwenyi: “Yena Petulu muulikala yami.”

(Tala nawa Mat 26:31-35; Mar 14:27-31; Yoa 13:36-38)

31“Simone, Simone, tala! Sakwonga hanahula chiyulo cha kunusala mu musalo ngwe chize atu akusala tiriku. 32Alioze naliumbile hakutwala kuli yena, hanga kuuchi kahona ufulielo. Mba muze muukahiluka kuli yami, kolesa akwenu.” 33Petulu yamwamba ngwenyi: “Mwene, ngunalulika kuya chibwe ku zuwo lia lamba, chibwe ku kufwa hamwe ni yena!” 34Yesu ngwenyi: “Petulu, ngunakwambulwila, ngwami, musono, shimbu ndemba kanda achitambika, kumuulikala yami katatu, ngwe, kuwangunyingikine.”

Chibakumuna, ni tuku, ni mukwale

35Mba Yesu yaahula ngwenyi: “Muze nanutumine te kunushi chibakumuna, chibwe tuku, chibwe sapato, nwahonene chimwe Chuma, nyi?” Yaakumbulula ngwo: “Nichimwe.” 36Mba Yesu yaamba ngwenyi: “Alioze haliabwila yoze uli ni chibakumuna hanji tuku chamutamba kuyimbata, ni yoze keshi mukwale chamutamba kulanjisa chikuto chenyi ni kuulanda. 37Mumu ngunanwambulwila ngwami, chatamba chimanunuke chize Mukanda wa Zambi unambe hakutwala kuli yami, ngwo: ‘Yamwalula hamwe ni yivulumunyi.’ Mumu chize chasonewene ha chikuma cha yami chimanunuke.” 38Tumbaji yamwamba ngwo: “Mwene, tala mikwale yaali yino!” Yaakumbulula ngwenyi: “Chinalite!”

Yesu yalemba mu munda wa Getsemane

(Tala nawa Mat 26:36-46; Mar 14:32-42)

39Yesu yatuhuka yaya, nikulita ni ndako yenyi, ha mulundu wa Olive. #22:39 mulundu wa olive: tala 19:29. Tumbaji twenyi yaamukaula. 40Muze haheta ko, yaamba ngwenyi: “Lembenu hanga kunuchi kunjila mu cheseko.” 41Mba Yesu yasenya kulutwe ngwe kachipinji ka kukonga cha liwe, yasa makungunwa hashi, yalemba 42ngwenyi: “Tata, nyi unazange nguchize kama musenge uno wa lamba. Hindu kanda chibwa ngwe chize ngunazange yami, alioze ngwe yena unazange.” [ 43Mba kanganda ka mwilu yamusolokela ha kumukolesa. 44Yesu yabinda kuhiana nikulemba ni mbunge yeswe. Matukuta jenyi yaasotwoka hashi ngwe manyinga.]#22:44Yisoneko yikwo yikulu kuyishi ni maliji wano.

45Muze halemba, yakatuka, yeza kuli tumbaji, yaawana mu tulo mumu ha chinyengo. 46Yaamba ngwenyi: “Kuchi kevwe nuli mu tulo? Hindukenu, lembenu hanga kunuchi kunjila mu cheseko.”

Yudase yakunjika Yesu

(Tala nawa Mat 26:47-56; Mar 14:43-50; Yoa 18:3-11)

47Shimbu te Yesu machihanjika, mbunga yaaheta. Yudase, umwe wa kuli tumbaji kumi ni aali, yaatwala, yakundama kuli Yesu mu kumumbeja. 48Alioze Yesu yamwamba ngwenyi: “Yudase, unakunjika Mwana Mutu ni mbeju, nyi?” 49Muze tumbaji twa Yesu amwene yize muyibwa, yaamuhula ngwo: “Mwene, tulambe ni mikwale yetu, nyi?” 50Umuwika hakachi ko yalamba kavumbi ka mwata wa mahako, yamubatula litwi lia chindume. 51Alioze Yesu yamba ngwenyi: “Kalenu! Echenu, kunahu!” Mba yakwata litwi lia lunga yoze, yamuwuka.

52Mba Yesu yambila mahako a lutwe, ni makulwana ja tufunga twa zuwo lia Zambi#22:52 tufunga twa zuwo lia zambi: tala 22:4 ni makulwana waze ejile ni kumukwata ngwenyi: “Nuneza ni mikwale ni kanda ni kungukwata ngwe nguli muhuza, nyi? 53Tangwa ha tangwa nabwile hamwe ni yenu mu zuwo lia Zambi, hindu kunwangukwachile ko, alioze ola yino yili ni yenu ni ya tachi ja milima.”

Petulu yalikala Yesu

(Tala nawa Mat 26:57-58, 69-75; Mar 14:53-54, 66-72; Yoa 18:12-18, 25-27)

54No yaakwata Yesu, yaamutwala maha mwata wa mahako. Petulu yakaula kanonajila kapinji kasuku. 55Atu te haawika kahia mu yiize. Petulu neye yatwama mukachi ka waze te anoto kahia. 56Umwe mwana pwo, te ngamba, yamumona kanoto kahia, yamutala nee, ngwenyi: “Lunga yono nawa kabwanga hamwe nenyi.” 57Alioze Petulu yalikala ngwenyi: “Yena pwo, chamunyingikine kwami!” 58Ha shimbu likepe, umwe lunga yamumona, yamba ngwenyi: “Ni yena nawa uli wa kuli ayo!” Alioze Petulu ngwenyi: “Yena lunga, hi yami ko!” 59Ha shimbu lia ola yimuwika, mukwo yashindakenya ni hamu ngwenyi: “Chamwenemwene, lunga yono kabwanga hamwe nenyi, mumu kali Kagalilea!” 60Alioze Petulu yakumbulula ngwenyi: “Yena lunga, Chanyingikine chize unambe!” Ha shimbu lizeliene, muze te machihanjika, ndemba yatambika. 61Mwene yatewuluka, yatala Petulu nee. Mba Petulu yewuluka liji lize amwambile Mwene ngwenyi: “Shimbu ndemba kanda achitambika musono uno, kumuulikala yami katatu ngwe: ‘Chamunyingikine kwami.’ ” 62Hohene Petulu yatuhuka, yalila kuhiana.

Tufunga yaakekuna Yesu, yaamulamba

(Tala nawa Mat 26:67-68; Mar 14:65)

63Tufunga yaakekuna Yesu, yaamulamba, 64yaamufuka ku meso nikumuhula ngwo: “Tumbula, iya wakulamba?” 65Yaamushililika ni maliji akwo anji.

Yesu ku meso ja Mbunga ya Ngaji ja Ayuda

(Tala nawa Mat 26:59-66; Mar 14:55-64; Yoa 18:19-24)

66Muze hikwacha, makulwana ja Ayuda ni mahako a lutwe a Zambi ni alongeshi a Shimbi yaalikungulula, yaatwala Yesu ku meso ja Mbunga yo ya Ngaji, 67yaamuhula ngwo: “Mwe Chilamwina yoze Zambi alakenyene yena, nyi ka? Twambulwile.” Neye yaakumbulula ngwenyi: “Nyi nanwambulwila, kunuchi kungufuliela nichimwe. 68Ni kachi nanuhula chimwe chihula, kunuchi kungukumbulula. 69Alioze chize ku haliabwila Mwana Mutu#22:69 mwana mutu: tala 5:24. makatwama ku chindume cha Zambi Mukwa Ndundo Jeswe.” 70Eswe yaamuhula ngwo: “Kuma, mwe Mwana Zambi yena, nyi ka?” Neye yaakumbulula ngwenyi: “Chochene nwamba.” 71Hohene yaamba ngwo: “Mba kuchi tunafupu nawa yela akwo? Hitwalivwila yetwene kuhanjika chenyi!”

Currently Selected:

Luka 22: CHK1970

Highlight

Copy