Luka 16

Chishima cha kaselo mukwa kukanyama

1Yesu yambila tumbaji twenyi ngwenyi: “Umwe pichi wabwile ni kaselo kenyi. Atu yaamwambulwila ngwo: ‘Kaselo yoze kakumwanga ubite we.’ 2Mwe mwata yamuhula ngwenyi: ‘Acho chika ngunevu hakutwala kuli yena? Ngulumbunwine uselo we, mumu kuuchi kuhasa kubwa nawa kaselo kami.’ 3Mwe kaselo yalihanjikisa ngwenyi: ‘Mwata wami kumanguchiza ku milimo. Kuchi mungulinga? Ngolo ja kulima Chishi najo, sonyi ngunevu ja kuunjila. 4Aha! Ngunanyingika chize mungulinga, hanga muze manguchiza ku milimo, atu akangutambule mu mazuwo jo.’ 5Mba yatambika umuwika umuwika waze abwile ni kongo kuli mwata wenyi, yahula mutangu ngwenyi: ‘Kongo lingahi uli nalio kuli mwata wami?’ 6Neye ngwenyi: ‘Kulakaji ja njongo ja maji.’ Mwe kaselo yamwamba ngwenyi: ‘Twama hashi. Soneka ngwe, makumi atano.’ 7Mba yahula mukwo ngwenyi: ‘Yena kongo lingahi uli nalio?’ Yakumbulula ngwenyi: ‘Kulakaji jitano ja tuku ja tiriku.’ Mwe kaselo ngwenyi: ‘Anda mukanda we. Soneka kulakaji jiwana.’ 8Mwata wa kaselo yoze wa uhenge yamuchichimieka mumu walingile ni ukanyame. Mumu akwa hashi hano kaakukanyama ha milonga mukachi ko kuhiana akwa pangu.”

9Yesu yaweza ho ngwenyi: “Yami ngunanwambe ngwami, lingilenu ni ubite wa hano hashi ha kubwa ni masepa, hanga muze kunushi ni chikala nawa cha ubite, akanutambule muma mwa miaka yeswe. 10Yoze mashishika ni chize chikepe, mashishika nawa ni chize chinene. Yoze mahengesa ni chize chikepe, mahengesa nawa ni chize chinene. 11Kevwe nyi kunwashishikile ni ubite wa hano hashi, iya manukunjika ubite wamwenemwene? 12Hanji, nyi kunwashishikile ni uze wa mbala, iya makanwaha uze wa yenwene?

13“Kavumbi niumwe mahasa kulingila miata aali, mumu mavutwokela umuwika ni mazanga mukwo, malihana kuli umuwika ni malelesa mukwo. Kunwahashile kulingila Zambi ni mbongo hamuwika.”

Maliji eka ni eka a Yesu

(Tala nawa Mat 11:12-13; 5:31-32; Mar 10:11-12)

14Afariseu#16:14 afariseu: tala 5:17. yeevwa maliji waze eswe, yaaseha Yesu, mumu te akuzanga ubite. 15Yesu yaamba ngwenyi: “Yenu nuli waze akulisambisa ku meso ja atu, alioze Zambi kananyingika mbunge jenu. Mumu yize akunyonga atu ngwo, yilemu, ku meso ja Zambi yili yamokomoko.

16“Shimbi ja Mose ni mikanda ya akwa munanyi a Zambi hiyinalinduluka ndoo ku tangwa lia Yoano Chipapachisa. Chize ku mwaka uze, atu kaakwambujola Sango Jibema ja wanangana wa Zambi. Mutu ni mutu kakunjila mo ni tachi. 17Chikalu lilu ni hashi kuhwa, alioze chikalu kuhiana Chihanda cha lusona wa Shimbi kuhwa.

18“Lunga yoze malakula pwo lienyi ni kumbata weka, malinga utanji. Ni yoze mambata pwo yoze lunga lienyi hamulakula, neye malingi utanji.”

Pichi ni Lazaru

19“Yikubwa umwe pichi te wakuzala mahina a lubula, a ubite unji. Tangwa ha tangwa te kakusehejela ha yiteleka yibema. 20Yikubwa nawa umwe chiswale, jina lienyi te Lazaru, mujimba wenyi weswe yiubwa wa yilonda ha yilonda. Atu te kaakumubombesa kulutwe lia chikolo cha pichi. 21Yazanga kulia yifwenyufwenyu yize te yakuholoka ku mesa ya pichi. Tuwa yeza ni kulesa yilonda yenyi. 22Mwe chiswale yafwa. Tunganda a mwilu yaamutwala, yaamusa hehi ni Abrahama mwilu. Pichi neye yafwa, yaamufunda. 23Pichi yabindabinda chinji muma mwa afu, yahetuka, yamona Abrahama kusuku ni Lazaru hehi nenyi. 24Mba yakololoka ngwenyi: ‘Kaka Abrahama! Nguvwile kama keke, utume Lazaru hanga achubike songo lia munwe wenyi mu meya akekemese kama limi liami, mumu ngunabinji chinji mu mulengi wa kahia kano!’ 25Alioze Abrahama ngwenyi: ‘Mwanami, iwuluka ngwe, yena watambwile yuma yibema ha matangwa ja mwono we, alioze Lazaru lamba linji amwene. Haliabwila kanamulembejeka hano, alioze yena uli mu ubinjilo. 26Chikwo nawa, mbongo yinene yili mukachi ketu, waze maazanga kubalika koko kuli yenu keechi kuhasa. Chibwe umwe wa koko kechi kuhasa kuzauka kuno kuli yetu.’ 27Pichi yamba ngwenyi: ‘Kaka ngunakulembe, utume kama Lazaru ku zuwo lia tata, 28kuli anakwetu atano. Aye hanga akaatoweze, kuchina ayo nawa maakeza muma muno mwa kubinda.’ 29Abrahama ngwenyi: ‘Anakwenu kaali ni mikanda ya Mose ni ya akwa munanyi a Zambi ha kwatoweza, aabanjike.’ 30Mwe pichi yamba ngwenyi: ‘Ka, kaka Abrahama! Alioze nyi umwe mahinduka ku kufwa, maya kuli ayo, mba maalumuka ku mbunge.’ 31Alioze Abrahama yamwamba ngwenyi: ‘Nyi kasolo kwivwa Mose ni akwa munanyi a Zambi, keechi kakunuka chibwe umwe mahinduka ku kufwa.’ ”

Currently Selected:

Luka 16: CHK1970

Highlight

Copy