Yoano 3

Yesu ni Nikodemu

1Yikubwa umwe mutu jina lienyi te Nikodemu, wa ku mbunga ya Afariseu, #3:1 AFARISEU: tala 1:24. umwe mukwa kuyula wa Ayuda. 2Mwenawo yeza kuli Yesu te ufuku, yamwamba ngwenyi: “Longeshi, tunanyingika ngwetu, Zambi hanakutumu ha kulongesa, mumu mutu niumwe mahasa kulinga yilayi yize wakulinga yena, shina Zambi abwe hamwe nenyi.” 3Yesu ngwenyi: “Chamwenemwene ngunakwambulwila ngwami, niumwe mahasa kumona Wanangana wa Zambi, shina masemuka kwilu.” 4Nikodemu yamuhula ngwenyi: “Ngwe kuchi mutu, nyi habwa kulu mukulwana, mahasa kuhiluka mu jimo lia naye akasemuke cha muchaali?” 5Yesu ngwenyi: “Chamwenemwene ngunakwambulwila ngwami, niumwe mahasa kunjila mu Wanangana wa Zambi, shina masemuka ku meya ni ku Mwiku wa Linanga. 6Chize chakusemuka kuli mutu, chili cha uutu; chize chakusemuka kuli mwiku, chili cha mwiku. 7Kanda ulishimwoka ha chize hinakwamba ngwami, yenu eswe chanutamba kusemuka kwilu. 8Fuji yakuhehukila kuze yinazange. Ni yena wakwivwa zungo liayo, alioze kuushi kunyingika kuze yineza ni kuze yinayi. Chimuwika ni yoze wakusemuka ku Mwiku wa Linanga.” 9Nikodemu yamuhula ngwenyi: “Ngwe kuchi muchihasa kubwa?” 10Yesu ngwenyi: “Yena uli longeshi munene wa Aisraele, hindu kuwanyingikine yuma yino, nyi? 11Chamwenemwene ngunakwambulwila ngwami, twakuhanjika yize twanyingika, ni twakwambujola yize twamwene, hindu yenu kunushi kutayiza shindakenyo yetu. 12Kunushi kungufuliela muze nakuhanjika ni yenu hakutwala ku yuma ya hashi, mba ngwe kuchi munungufuliela nyi munguhanjika ni yenu hakutwala ku yuma ya mwilu? 13Niumwe hanazezuka mwilu shina Mwana Mutu#3:13 mwana mutu: tala 1:51. yoze hanahulumuka kwilu.”

14Ngwe chize Mose wazundwile kapela wa utale ha mutondo mu puya, chimuwika nawa chatamba kuzundula Mwana Mutu,#3:14 kuzundula mwana mutu: maliji wano kaanalumbununa yeswe yaali, kuhata chenyi ha kulusu ni kuzezuka chenyi mwilu, tala 12:32-33. 15hanga mweswawo mamufuliela akabwe ni mwono wa miaka yeswe. 16Mumu Zambi yazanga akwa hashi kuhiana. Kashika yatuma mwe Mwanenyi umuwika, hanga mweswawo mamufuliela kechi kafwa, alioze akabwe ni mwono wa miaka yeswe. 17Mumu Zambi katumine ko Mwanenyi akahise akwa hashi, alioze akaalamwine.

18Yoze wakufuliela mwe Mwana kechi kahia, alioze yoze keshi kufuliela hahia kulu, mumu kafulielele ko mwe Mwana umuwika wa Zambi. 19Uno we uhiso: pangu hilineza hano hashi, alioze atu yaazanga milima kuhiana pangu, mumu akulinga yibi. 20Mweswawo wakulinga yibi kakuvutwokela pangu, keshi kwiza ku pangu, mumu kali ni woma ngwenyi, yitanga yenyi yibi muyisoloka. 21Alioze yoze wakulinga umwenemwene kakwiza ku pangu hanga yitanga yenyi yikasoloke ngwo, hanayilingi ha kwononokena Zambi.

Yesu ni Yoano Chipapachisa

22Kulutwe lia yuma yino, Yesu yaya hamwe ni tumbaji twenyi ku chifuchi cha Yudea, yatwama ko shimbu limwe hamwe no, yapapachisa atu. 23Yoano neye yapapachisa atu ku Enone hakamwihi ni Salimi, mumu kuze kwabwile meya anji. Atu te kaakwiza kuli iye, mba yaapapachisa. 24(Ha matangwa waze te kanda achisa Yoano mu zuwo lia lamba.)

25Mba tumbaji akwo a Yoano yaabutuka kuhamika ni Kayuda umuwika hakutwala ku ndako ya kusana cha kuwayila cho. 26No yaaya kuli Yoano ni kumwamba ngwo: “Longeshi, unewuluka mutu yoze wabwile hamwe ni yena musali lia Yordau, te wakutulweza sango jenyi. Haliabwila kakupapachisa atu, ni eswe kaakuya kuli iye.” 27Yoano yakumbulula ngwenyi: “Mutu niumwe mahasa kubwa ni chimwe Chuma, nyi kamuhele cho kwilu. 28Yenwene nuli yela ja maliji waze nambile ngwami: ‘Yami hi nguli ko Chilamwina yoze Zambi alakenyene alioze Zambi hanangutumu kulutwe lienyi.’ 29Nandungi kali wa sandungi, alioze chijinjikili cha sandungi kakumana hakamwihi ni sandungi ni kumwivwa. Kakuwahilila ha kwivwa liji lienyi. Chenacho nawa uwahililo wami haliabwila hiwamanunuka. 30Chatamba kumulemesa, alioze yami chatamba kungukehesa.”

Yoze uneza kwilu

31Yoze unakatuka kwilu kali helu lia eswe. Yoze unakatuka hashi kali mukwa hashi, ni kakuhanjika yuma ya hashi. Yoze unakatuka kwilu kanahiana eswe, 32kakushindakenya yize amwene ni yize evwile, alioze niumwe wakutayiza shindakenyo yenyi. 33Yoze wakutayiza sango jenyi kanase chinyingi ngwenyi, Zambi kali umwenemwene. 34Yoze atumine Zambi kakuhanjika maliji a Zambi, mumu Zambi keshi kuhana Mwiku wenyi ni njongo. 35Mwe Tata kakuzanga Mwanenyi, ni hanakunjika chiyulo cheswe mu kwoko lenyi. 36Yoze wakufuliela mwe Mwana, mwono wa miaka yeswe ali nawo. Yoze keshi kwononokena Mwana, kechi kamona mwono, alioze Zambi kakumuvwila ufwatulo.

Currently Selected:

Yoano 3: CHK1970

Highlight

Copy