Ubutukilo 36

Vungu lia Esau

(Tala nawa 1 San 1:34-37)

1Atu wano kaali vungu lia Esau, hanji Edome. 2Esau yambata mapwo a yilambala a mu chifuchi cha Kanana. E mapwo wano: Ada, mwana wa Elone, wa ku vungu lia Hite, ni Oholibama, mwana wa Ana, mujikulu wa Zibeone, wa ku vungu lia Hive, 3ni Basemate, mwana wa Ishmaele, ndumbu ya Nebayote. 4Ada yasema Elifaze, Basemate yasema Rewele, 5Ohilibama yasema Yeushe ni Yalame ni Kora. Wano eswe kaali ana malunga waze Esau asemene mu chifuchi cha Kanana.

6Esau yanda mapwo jenyi, ni ana jenyi a malunga ni a mapwo, ni atu eswe a mu zuwo lienyi, ni yimuna yenyi, ni yuma yeswe yize abichile mu chifuchi cha Kanana, yahichika mwanakwo Yakoba, mba yaya ku chifuchi chikwo. 7Yakatuka ko mumu chifuchi chize atwamine ni Yakoba te chikepe, ni yimuna yo yinji yahiana. 8Ha chino Esau (hanji Edome) yaya ni kutunga mu milundu ya Seire.

9Atu wano kaali vungu lia Esau, kashakulu ka akwa Edome, waze te atwama mu milundu ya Seire. 10-13Ada, pwo lia Esau yasema Elifaze. Mwe Elifaze te kali ni ana wano atano a malunga: Temane, ni Omare, ni Zefo, ni Gatame, ni Kenaze. Pwo mukwo wa Elifaze, Timna, yasema Amaleke.

Pwo lia Esau mukwo, Basemate, yasema mwana umuwika wa lunga, Rewele. Mwe Rewele yasema ana wano awana a malunga: Nahate, ni Zera, ni Shama, ni Miza.

14Pwo lia Esau mukwo, Oholibama, mwana wa Ana, mujikulu wa Zibeone, yasema ana wano atatu a malunga: Yeushe, ni Yalame, ni Kora.

15Wano e mavungu ja Esau (Edome). Elifaze, mwanenyi mutangu te kashakulu ka mavungu wano: Temane, ni Omare, ni Zefo, ni Kenaze, 16ni Kora, ni Gatame, ni Amaleke. Wano eswe kaali a ku vungu lia Ada, pwo lia Esau.

17Rewele, mwana wa Esau, te mwe kashakulu ka mavungu wano: Nahate, ni Zera, ni Shama, ni Miza. Wano eswe kaali a ku vungu lia Basemate, pwo lia Esau.

18Mavungu waze Esau asemene ni pwo lienyi Oholibama wano: Yeushe, ni Yalame, ni Kora. 19Atu wano eswe te kaali vungu lia Esau (Edome).

Vungu lia Seire

(Tala nawa 1 San 1:38-42)

20-21Ana wano a malunga a Seire, mukwa Hori, kaabwile atu atangu mu chifuchi cha Edome: Lotane, ni Shobale, ni Zibeone, ni Ana, ni Dishone, ni Ezere, ni Dishane.

22Lotane te mwe kashakulu ka mavungu ja Hori ni Hemane. (Timna te ndumbwa Lotane.)

23Shobale te mwe kashakulu ka majimo wano: Alvane, ni Manahate, ni Ebale, ni Shefo, ni Oname.

24Zibeone te kali ni ana a malunga aali, Aya ni Ana. (Ana yono mwe wamwene shima lia meya lia kahia mu puya, muze te akufunga yimuna ya tato Zibeone.) 25-26Ana te mwe tato ya Dioshone, kashakulu ka majimo wano: Hemdane, ni Eshbane, ni Itrane, ni Cherane. Ana te kali nawa ni mwana wa pwo Oholibama.

27Ezere te mwe kashakulu ka majimo wano: Bilhane, ni Zavane, ni Akane.

28Dishane te mwe kashakulu ka majimo ja Uze ni Arane.

29-30Atu wano te kaali a ku mavungu ja Hori mu chifuchi cha Seire (Edome): Lotane, ni Shobale, ni Zibeone, ni Ana, ni Dishone, ni Ezere, ni Dishane.

Mianangana a mu chifuchi cha Edome

(Tala nawa 1 San 1:43-54)

31-39Atu wano e mianangana waze ayulile mu chifuchi cha Edome muze te Aisraele kanda achibwa ni mwanangana:

Bela, mwana wa Beore, wa ku chihunda cha Dinhaba,

Yobaba mwana wa Zera wa ku limbo lia Bozra,

Hushame wa ku chifuchi cha Temane,

Hadade mwana wa Bedade wa ku limbo lia Avite (yoze wakumbile Amidiane mu jita mu chifuchi cha Moabe),

Samla wa ku chihunda cha Masreka,

Shaule wa ku limbo lia Rehobote ku lwiji,

Bal Hanane mwana wa Akbore

Hadade wa ku limbo lia Pau (Jina lia pwo lienyi te Mehetabele, mwana wa Metrede, mujikulu wa Mezahabe.)

40-43Esau te mwe kashakulu ka mavungu wano a mu chifuchi cha Edome: Timna, ni Alva, ni Yetete, ni Oholibama, ni Ela, ni Pinone, ni Kenaze, ni Temane, ni Mibzare, ni Magdiele, ni Irame. Wano te mianangana mu chifuchi cha Edome ni kulita ni yifuchi yo muze te akutwama.

Currently Selected:

Ubutukilo 36: CHK1970

Highlight

Copy