Ubutukilo 3
3
Mutu yavulumuna
1Hakachi ka tushitu eswe waze atangile Mwene Zambi, kapela yabwa mukwa kukanyama kuhiana. Neye yahula pwo ngwenyi: “Kuma chamwenemwene Zambi kanakamba ngwenyi, kanda nulia ku mitondo ya mu munda, nyi?”
2Pwo yamukumbulula ngwenyi: “Tunahase kulia mihuko ya ku mitondo yeswe ya mu munda, 3shina mihuko ya mutondo uze uli mukachi ka munda kutwahashile kuyilia. Mumu Zambi yatwamba ngwenyi: ‘Kanda nulia mihuko ya mutondo uze, chibwe kuyikwata ka. Nyi ka, kumunufwa.’ ”
4Kapela ngwenyi: “Mahuza, kunuchi kufwa kwenu. 5Zambi kanakamba chino mumu kananyingika ngwenyi, nyi nwayilia, meso jenu maalaula, kuchina mununyingika yibema ni yibi ngwe iye Zambi.”
6Pwo yamona ngwenyi, mutondo uze unabeme, ni mihuko yawo nawa yinabeme ha kulia. Yanyonga nawa ngwenyi, chili chibema ha kubwa ni mana. Kashika yahela ko mihuko, yalia. Mba yahana Chihanda kuli lunga lienyi, lunga neye yalia. 7Muze haalia shimbu lizeliene meso jo yaalaula, mba yaanyingika ngwo, kuma uselesele tuli. Kashika yaanuka mafwo a mukuyu, yaatenga mahina, yaazala.
8Ha chingoloshi yeevwa Mwene Zambi kaneza ni kwenda mu munda, ngi ngi ngi! Mba lunga ni pwo yaaswama mushi lia mitondo. 9Mwene Zambi yahula lunga ngwenyi: “Kuli uli?”
10Lunga ngwenyi: “Te ngunakwivu muze unende mu munda, yingwivwa woma. Kashika naswama, mumu nguli uselesele.”
11Zambi yamuhula ngwenyi: “Iya yoze wakulwezanga ngwenyi, uli uselesele? Hiwalia muhuko wa mutondo uze nakukanjishile ngwami, kanda uyilia, nyi?”
12Lunga ngwenyi: “Pwo yoze wanguhele kubwa nenyi mwe wangwahanga, kashika nalianga.”
13Mba Mwene Zambi yahula pwo ngwenyi: “Mumu yika walinganga chino?”
Pwo ngwenyi: “Kapela wangwonganga kashika nalianga.”
Zambi yaabatwila hanga amone lamba
Zambi yaabatwila hanga amone lamba
14Mba Mwene Zambi yambila kapela ngwenyi:
“Ha chize hiwalinga, kuwashingiwa kuhiana yimuna yeswe
ni tushitu eswe a mu yambu.
Shingo lie lino, chize musono ndoo ku miaka yeswe
muwendela ha jimo lie, muubwa ni kulia mavu.
15Yena kapela ni pwo munukabwa akwa kole.
Vungu lie ni vungu lia pwo mulikabwa akwa kole.
Mulikafupa mana akukushihila ku mutwe,
ni yena muukafupa mana
akumusumina ku kashi jino.”
16Mba yambila pwo ngwenyi:
“Yibikalo yinji muukabwa nayo
muze muukabwa ni ufumba,
ni yikola yinji ha kusema.
Hindu muukevwila lunga lie usona,
neye makakuyula.”
17Yambila nawa Samutu ngwenyi:
“Wabanjikanga mukwenu pwo
ha kulia mihuko ya mutondo
uze nakukanjishile ngwami, mavu kaashingiwa.
Ha matangwa eswe a mwono we muukahondangana ni kulima,
mba ukabwe ni yakulia.
18Hashi muhakusokela mikalale ni mbimbo.
Muukalia yilimalima.
19Matukuta anji muukasapangana,
muukahondangana ha kulima hashi
ndoo muukahiluka ku mavu kuze nakuchijile.
Ku mavu wakatukile
kwenako muukahiluka nawa.”
20Mba Samutu#3:20 SAMUTU… NAMUTU mu hebreu ni mu ulumbunwiso weka ni weka ngwo: Adam ni Eve. yaluka pwo lienyi ngwenyi, Namutu#3:20 SAMUTU… NAMUTU mu hebreu ni mu ulumbunwiso weka ni weka ngwo: Adam ni Eve., mumu iye naye ya atu eswe. 21Hohene Mwene Zambi yanda makubu ja tushitu, yaanukina Samutu ni pwo lienyi, yaajika.
Mwene Zambi yahanga Samutu ni Namutu mu munda
22Mba Mwene Zambi yamba ngwenyi: “Haliabwila mutu habwa ngwe yetu mumu hanyingika yibema ni yibi. Kuchamutambile kulia mihuko ya mutondo uze wakuhana mwono, kuchina makabwa ni mwono wa miaka yeswe.” 23Kashika Mwene Zambi yahanga mutu mu munda wa Edene, hanga akalime e mavu kuze amuchijile. 24Mba ku sali lia chivumbuko lia munda wa Edene, yasa ko akwa mwono a mwilu ni mukwale wa mulengi wa kahia wakutalikisa ku majila eswe, ha kujika jila ya ku mutondo uze wakuhana mwono.
Currently Selected:
Ubutukilo 3: CHK1970
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.