Ubutukilo 16
16
Hagare ni Ishmaele
1Sarai, pwo lia Abrama, te mumba kwenyi. Alioze yabwa ni ndungo yenyi wa pwo, jina lienyi Hagare, yoze te wakumulingila. Mwana pwo yoze te mukwa Egiptu. 2Mba Sarai yambila Abrama ngwenyi: “Unamono, Mwene Zambi kanguhele mwana niumwe. Yako ulimone kama ni ndungo yami yono, hanji matusemena kama mwana.” Abrama yachitayiza. 3Mba Sarai yakunjika Hagare kuli Abrama ha kubwa pwo lienyi. (Yuma yino yabwile muze te Abrama hatwama miaka kumi mu chifuchi cha Kanana.) 4Abrama yalimona ni Hagare, neye yaka ufumba. Muze Hagare halimona ngwenyi nguli ni ufumba, yabutuka kulelesa Sarai.
5Mba Sarai yambila Abrama ngwenyi: “Kulelesa chino anangulelesa Hagare, yena wachikoka. Yami mwene nakuhele yono ndungo yami. Chize kuze alinyingikine ngwenyi, nguli ni ufumba, hi keshi kungusa nawa vumbi. Chinalite Mwene Zambi atubatwile.”
6Abrama ngwenyi: “Kuheshi Chuma, yono kali ndungo ye, kali mu moko je. Kashika muulinga cheswe chize unazange.” Hohene Sarai yabutuka kuhungumiona Hagare, mba Hagare yachina kwenyi.
7Kanganda ka Mwene Zambi yatakana ni Hagare mu puya hehi ni shima lia meya lize lili mu jila ya kuya ku Shure#16:7 SHURE homa hehi ni njiza ya chifuchi cha Egiptu: Hagare te mukwa Egiptu (tala 16:1).. 8Yamuhula ngwenyi: “Hagare, ndungo ya Sarai, kulihi unakatuka? Kulihi unayi?”
Hagare ngwenyi: “Ngunachina kaka Sarai.”
9Mba kanganda ka Mwene Zambi ngwenyi: “Hiluka kuli kakenu ukamuzeyele.” 10Yamwamba ngwenyi: “Mungukokesa vungu lie, mutu niumwe makahasa kwaalula mumu ha unji wo. 11Muukasema mwana wa lunga, ukamuluka ngwe: Ishmaele#16:11 ISHMAELE mu hebreu linalumbunuka ngwo, “Zambi kangwivwa.”, mumu Mwene Zambi hevwa kulila che, 12Alioze mwe mwana yoze makabwa ngwe chimbulu wa mu yambu, makazwela ni atu eswe, atu no maakamuzwelesa. Kechi kutwama ni usoko wenyi, makabwa ha ukawenyi.”
13Hagare ngwenyi: “Ayenwe! Kuma hinamona Zambi, hindu nguchili ni mwono, nyi?” Mba yaluka Mwene Zambi, yoze te anahanjika nenyi, jina ngwenyi, “Zambi Yoze Wakumona.” 14Kashika shima lia meya lize, hakachi ka Kadeshe ni Berede, akulivuluka ngwo, “Shima lia Zambi wa Mwono Yoze Wakungumona.”
15Hagare yasema mwana wa lunga Abrama yamuluka jina ngwenyi, Ishmaele. 16Abrama te habwa ni miaka 86 muze asemene Ishmaele.
Currently Selected:
Ubutukilo 16: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
