Ubutukilo 15
15
Zambi yakolesa Usendo ni Abrama
1Mwabwa muze Mwene Zambi yalweza Abrama mu Usolwelo ngwenyi: “Abrama, kanda wivwa woma, yami nguli lukebwe we. Mungukwaha chawana chinene kuhiana.”
2Alioze Abrama yakumbulula nyi: “Mwene Zambi, Chawana chika muchingukwasa? Chishi mwana, ni Eliezere wa ku Damasku makaswana ubite wami. 3Kuwanguhele mwana niumwe, nyi nafwa kwami, umwe ndungo manguhinga.”
4Abrama yevwa nawa maliji a Mwene Zambi ngwenyi: “Ndungo yono kechi kakuhinga, alioze mwana yoze muukasema yena mwene, mwe makakuhinga.” 5Mba Mwene Zambi yamutwala haze, ngwenyi: “Tala kwilu. Alula matangonoshi, nyi muuhasa. Vungu lie mulikabwa ni atu anji ngwe matongonoshi wano.”
6Abrama yafuliela Mwene Zambi, kashika yamwalwila cho ha ululi.
7Mba Mwene Zambi yambila Abrama ngwenyi: “Nguli Mwene Zambi, nakuchijile ku limbo lia Ure mu chifuchi cha Babilonia ha kukwaha chifuchi chino cha chihinga.”
8Alioze Abrama ngwenyi: “Ngwe kuchi mungunyingika ngwami, munguchihinga?”
9Mwene Zambi ngwenyi: “Ngunehene ngombe wa chihwo, ni pembe wa chihwo, ni kuji a panga, eswe a miaka yitatu. Neha nawa katele ni mwana liembe.” 10Abrama yamunehena yimuna yize yeswe, Mba chimuna ni chimuna yachibula yihanda yaali, yaayisa mikala yaali. Alioze tujila kaabwilile ko. 11Yihungu yeeza ha kulia yifwo yize, alioze Abrama yaahanga.
12Muze tangwa himulinjila Abrama te himaya tulo anji. Yabutuka kuchikima, yevwa woma unji. 13Mba Mwene Zambi yamwamba ngwenyi: “Nyingika ngwe, vungu lie maakabwa njize mu chifuchi cha mbala, maakabwa ndungo. E atu jako maakaamwesa lamba miaka 400. 14Alioze yami mungukamwesa lamba atu waze maakaabita. Vungu lie muze maakatuhuka mu chifuchi chize, maakaya ni ubite unji. 15Alioze yena muukafwa ni ushinakaji wa tachi, mba maakakufunda. 16Chisemuko che cha muchiwana maakahiluka nawa ku chifuchi cho, mumu chichi kahuma akwa Amore ndoo muze uvulumwino wo muukoka, mba mungukaamwesa lamba.”
17Muze tangwa hilianjila, hikwabwa ufuku, susumuku chishichishi cha kahia chinakakumuka mu lutengo ni soka lia kulekwoka yilibalika hakachi ka yifwo. 18Ha shimbu lizeliene Zambi yakolesa Usendo ni Abrama ngwenyi: “Ngunalakenya kuhana chifuchi chino cheswe ku vungu lie, chize ku lwiji ku njiza ya chifuchi cha Egiptu ndoo ku lwiji Ufrateze, 19yifuchi ya atu wano eswe: Akene, ni Akenize, ni Akademone, 20ni Ahite, ni Aperize, ni Arafaime, 21ni Aamore, ni Akanana, ni Agirgashe, ni Ajebuse.”
Currently Selected:
Ubutukilo 15: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
