Yilinga 1

Yesu yalakenya kwiza cha Mwiku wa Linanga

1Mukwetu Teofilu:#1:1 Teofilu: tala Lk 1:1.

Mu mukanda wami utangu,#1:1 MUKANDA wami utangu: Mukanda wa Luka. nasonekene yuma yeswe yize Yesu alingile ni alongesele, chize ku kabutu ka milimo yenyi, 2ndoo ku tangwa lize Zambi wamutambwile mwilu. Muze kanda achizezuka mwilu, ku tachi ja Mwiku wa Linanga, yaaha tumbaji waze atongwele Shimbi. 3Kulutwe lia kufwa chenyi, yaasolokela ni mwono ni yinyingi yinji matangwa makumi awana. Yaalongesa yikuma ya Wanangana wa Zambi. 4Muze haalikungulula, yaaha koki ngwenyi: “Kanda nukatuka mu Yerusaleme, alioze twaminyinenu chawana chize Tata alakenyene, chize nanulwezele. 5Yoano te kakupapachisa ni meya, alioze kulutwe lia matangwa akepe, mungukanupapachisa ni Mwiku wa Linanga.”

Yesu yazezuka mwilu

6Kashika muze tunganda alikungulwile ni Yesu, yaamuhula ngwo: “Mwene, haliabwila muuhilwisa Wanangana kuli Aisraele, nyi?” 7Yesu ngwenyi: “Hi cha yenu ko kunyingika miaka ni mashimbu waze Tata asele mu chiyulo chenyi mwene. 8Alioze munukatambula tachi muze Mwiku wa Linanga hiwanuhulumukina. Mba munukabwa yela jami mu Yerusaleme, ni mweswe mu Yudea ni Samaria,#1:8 YUDEA ni SAMARIA: yifuchi yaali ya mu Palestina. ni ndoo ku songo lia hashi.” 9Muze te hamba maliji wano, shimbu maachimutala, Zambi yamutambula mwilu, mba lelwa yilimusweka ku meso jo.

10Shimbu maachihulikila meso kwilu nee, muze te Yesu anazezuka, susumuku malunga aali yaamana hehi no, te kaanazala mahina atoma. 11Yaamba ngwo: “Yenu malunga a ku Galilea, yika nunamanyina hano ni kuhulikila meso kwilu? Yono Yesu, hanutambula yo mwilu, makahiluka nawa chizechene ngwe hinwamumona nikuya mwilu.”

Tumbaji yaatongola yoze masalakana Yudase

12Hohene tumbaji yaakatuka ku mulundu wa Olive#1:12 mulundu WA OLIVE: ku chivumbuko cha Yerusaleme musali lia chitwetwe Kidrone. nikuhiluka ku Yerusaleme, hi kusuku ko, ngwe kilometro yimuwika. 13Muze te haaheta mu limbo, yaanjila mu limwe zuwo, yaakanduka ku chibatulo cha kwilu, kwenako atwamine. Wano e abwile ko: Petulu, ni Yoano, ni Tiangu (Jake), ni Andre, ni Filipe, ni Toma, ni Bartolomeu, ni Mateu, ni Tiangu (Jake), mwana wa Alfeu, ni Simone, mukwa kuzanga utuswilo wa chifuchi chenyi, ni Yudase, mwana wa Tiangu (Jake). 14Wano eswe hamwe ni Maria, naye ya Yesu, ni mapwo akwo, ni anakwo ja Yesu yaanyongonona nikuwayila Zambi ni mbunge yimuwika.

15Ha matangwa waze, Petulu yamana hakachi ka akwa kufuliela. Ayo eswe te ngwe kulakaji ni makumi aali. Neye yamba ngwenyi: 16“Akwetu, chinalite chize maliji akamanunuke, waze Mukanda wa Zambi wambile shimbu kanda hakutwala kuli Yudase. Liji lize Mwiku wa Linanga wahanjikile kuli David, hakutwala kuli Yudase, kasongo ka waze ashihile Yesu. 17Yudase wabwile umwe wa kuli yetu, neye watambwile milimo hamwe ni yetu.”

18(Ni je mbongo jize amufwetele ku ungulungulu wenyi yalilanjila munda. Kwenako aholokelele hashi, mujimba wenyi yiumengunuka mukachi, ni mijingwa yenyi yeswe yiipusuka. 19Akwa Yerusaleme eswe yeevwa yuma yize. Kashika alukile munda uze mu liji lio#1:19 liji LIO: arame. ngwo, Akeldama, kulumbunuka ngwo Munda wa Manyinga.) 20“Mumu hichinasonewa mu Mukanda wa Miaso (Masamu) ngwo:

“Zuwo lienyi akalihichike,

mutu niumwe kanda akatwama mo.’

Hichinasonewa nawa ngwo:

‘Mukwo akatambule milimo yenyi.’

21-22“Kashika chinalite mutu umuwika kulibalakenya ni yetu, abwe chela cha uhindukilo wa Mwene Yesu. Chatamba kubwa umwe wa ku mbunga yetu, butu kuze Yoano apapachishile atu ndoo ku tangwa lize azundwile Yesu mukachi ketu.” 23No yaakatwisa atu aali: Josefe, yoze te akuvuluka ngwo, Barsaba (jina likwo Justu), ni mutu mukwo Mataya. 24Mba eswe hamuwika yaalemba Zambi ngwo: “Mwene, yena wakunyingika mbunge ja atu eswe. Tulweze kama hakachi ka wano aali yoze hiunatongola, 25hanga asalakane Yudase mu milimo yino ya unganda, muhela uze Yudase ahichikile ha kuya kuma kwenyi mwene.” 26Mba yaata chela. Yichiholokela hali Mataya. Mwenawo alwile hamwe ni tunganda twa Yesu kumi ni kashi.

Currently Selected:

Yilinga 1: CHK1970

Highlight

Copy