Mak 14
14
Ini Ḅia Jizọs Ḅe Pịrị Ḅẹrẹ Mị
(Mat 26.1-5; Luk 22.1-2; Jọn 11.45-53)
1Mịọkụ mama ḍin kọnmẹ Saḅaḅọrọ pịkị Suka Fịturu Alalị mị ḅo la. Tịḅịnị agbamịẹapụma na Oloko ḍieapụma na ḅọkọ ḍọkịaḅẹ ḅọịma Jizọs Ḅe kun se Ọ̀ ḅaaḅịa ẹrẹchị. 2“Wa alalị mị fịarị sịkị ḅụ anị mịẹ ẹkẹ,” ini nwọ ḅẹmẹ, “tomonima ḅofa ama fiemaye mịẹ.”
Bẹtani Ḅie Ini Pulo Se Jizọs Ḅe Tịḅị Saramẹ
(Mat 26.6-13; Jọn 12.1-8)
3Jizọs Ḅe Saịmọn ḅụkan obi kọnḅọ ḅe warị simearị sịkị, Bẹtani ḅie, Ò yefịarịogbo, anị gbọrị eremeniḅọ alabasta nwọ chịn olo ololo na sọḅoye-ẹ, opuma yela kụnụ olo-ẹ iḅi nad nwọ chịn ye ini nwọse mịẹ olo-ẹ. Árị ololo mị ḅaa se kụnụ olo mị se Jizọs Ḅe tịḅị saramẹ. 4Anị anịnyọ sime dapụ ḅụosọmẹ, se nwọse jịnḅọ jịnḅọ ḅẹmẹ, “Nde á gose mị olo mị papa nwọ igweinmarịye? 5Ini ineda mgbọkụ anị seni seleḅa pẹkẹrẹ-a jieasi dẹrịḅịa, se igbiki mị se ḍie igwein apụma pịrịḅịa!” Se ini kụrọma á ḍiki ịganịmẹ.
6Ọkụma Jizọs Ḅe nwọ ḅẹmẹ, “Ómine á wẹrịso! Nde ó gose á ḅụfụkamarịye? Árị iḅi pịkị ḅụgbẹịnye nwọ mịẹ ị̀ pịrịsam. 7Sịkịmamgba igwein apụma ini ómine na omi-ẹ, ó ḅisịkị ḅisịkị ómine ineda ḅarachụa ini pịrịḅịa. Ọkụma ị̀rị̀ ọ́ sịkịmamgba ị̀ nyanaḅo ẹkẹ. 8Árị ineda mịẹḅịaye á nwọ mịẹsam; á kụnụ olo se ị̀ya oju saramẹ, se iḅi sịkị se anị karakarama ḍipi sịkị mị wẹrịmaḅẹ. 9Mịọkụ, à kọkọmaye ḍuko ọ́ pịrịaḅẹ na ini Iḅi Ọkwẹịn mị ḍukoḅịa nyọ layelaye, bebe tomonikiri mị kelema koro ḅụ, á se ḅiekoromaḅụ á mịẹye mị ini anị ḍuko gbasoḅịa.”
Judas Ḅe Jizọs Ḅe Se Ịbafị Mị Ḅerenimẹ
(Mat 26.14-16; Luk 22.3-6)
10Anịsịkị Judas Ịskarịọt, oyimaịn ọḅụḍukoapụ fịnjịma ḅie gbọrịḅọ ḅe pakaso tịḅịnị agbamịẹapụma damamunmẹ, Jizọs Ḅe se ịbafịḅịa ẹrẹchị. 11Inia ḅie opuma ḅẹlẹmẹ ò ḍukoḅịaye naaḅịa ẹrẹchị, se igbiki ḅereni ọ̀ pịrịmẹ. Anị Judas ḅe sakị ẹmbẹ ḍọkịye-ẹ Jizọs Ḅe ḅọrọma ini pịrịḅịa ẹrẹchị.
Jizọs Ḅe Oria Ọḅụḍukoapụ Ma Na Saḅaḅọrọ Alalị Fịye Mị Fịmẹ
(Mat 26.17-25; Luk 22.7-14,21-23; Jọn 13.21-30)
12Suka Fịturu Alalị mị ḅe tatarị ene mị ḅụ, Saḅaḅọrọ Alalị Fịye mị ḅe ananama ini nwọ ḅaa ene mị, Jizọs Ḅe ọḅụḍukoapụma Ò gbelamẹ, “Nde ị́ ḅi na wa mun ị́ya Saḅaḅọrọ fịye mị karakarama ị́ pịrị nwọ ḅe nyọ?”
13Anịsịkị Jizọs Ḅe inia ḅie mama apụ fịrịma pakụma se nwọse ini ḅẹmẹ, “Ómine opuama mị ḅie mun, mengi ojongo pụra gbọrị owuḅọ ómine na ịrịaḅịa. Ómine ò ḍuko 14ọ̀ sọḅịa warị ḅie sọ, se nwọse warị mị nyanaḅọ ḅe ḅẹ: ‘Yeḍieḅọ ḅe nwọ ḅẹmẹ, Nde ị̀ya ḅie mị, ị̀ya ọḅụḍukoapụma na ị̀rị̀ na Saḅaḅọrọ fịye mị fịḅịa ḅie mị?’ 15Anịsịkị ò gbọrị opu ọgọnọ warị ḅie gbọrị ḅie se ó ḍieḅịa, ini anị tẹlịma pịkị anị ḅirima koroma waraḅẹ, anịnyọ ó yemamgba karakarama wa pịrịḅịa.”
16Ọḅụḍukoapụma paka opuama mị mun mẹ, se Jizọs Ḅe ḍuko ini pịrị ḅara mị mgba nwọ ḍọkị ọrịmẹ; se ini Saḅaḅọrọ fịye mị karakarama wẹrịmẹ.
17Saso sọ sịkị, Jizọs Ḅe oyimaịn ọḅụḍukoapụ fịnjịma na ḅomẹ. 18Ini dẹbụl ọgọnọ sime yefịarịogbo, Jizọs Ḅe nwọ ḅẹmẹ, “À ḍuko ọ́ pịrịaḅẹ na ọ́mịna ḅie gbọrịḅọ ị̀ se ịbafịḅịa, anị ị̀rị̀ na bọlị ḅie yefịarịḅọ.”
19Ọḅụḍukoapụma anị inia ḅụḅalaḅalamamẹ se gbọrịḅọ gbọrịḅọ sakị Ò gbelamẹ, “Pikipikiye ofori-ẹ, ị́ ị̀ ḅẹkẹ, anịka?”
20Jizọs Ḅe pẹkẹrẹmẹ, “Ómine oyimaịn apụ fịnjịma ḅie gbọrịḅọ-ẹ, ị̀rị̀ na gbọrị bọlị ḅie fịturu se suarịḅọ ḅe-ẹ. 21Tomoniḅọ Tọkụ Ḅe ọ̀ fịḅịa, Fịafịa ḍiri ma ḍuko na ọ̀ fịḅịa nwọ ḅẹ ḅara ḅụ; ọkụma anị ḅalafamaye sọ oriḅọ ḅe pịrịḅịa nwọ Tomoniḅọ Tọkụ Ḅe se ịbafịḅịa ḅọ ḅe! Anị mgbọkụ iḅitẹịn oriḅọ ḅe pịrịḅịa ini nemikase ngịsị ò yika ọkụma!”
Nyanaḅọ Ḅe Saso Fịye Mị
(Mat 26.26-30; Luk 22.14-20; 1 Kọr 11.23-25)
22Ini yefịarịogbo, Jizọs Ḅe fịturu ọkịmẹ, mịẹḅaka ḅẹ tẹkẹ kọn, anị pu, se anị seni Oria ọḅụḍukoapụma pịrịmẹ. Se nwọ ḅẹmẹ, “Ómine anị ọkị, mị ị̀ya oju mị-ẹ.”
23Anịsịkị ori ọmọngọ mị ọkịmẹ, mịẹḅaka se Tamụnọ Ḅe ḅẹ, se anị ḅọrọma ini pịrịmẹ; se inimgba anịa ḅie wẹrị ḅumẹ. 24Jizọs Ḅe nwọ ḅẹmẹ, “Mịn ị̀ya oju pulo mị-ẹ, ọsụn sara tọn-a apụ pịrịye mị, ị̀ya oju pulo mị mịn Tamụnọ ọḅọkụ mị mịẹkụrọmaye-ẹ. 25À ḍuko ọ́ pịrịaḅẹ, à ḅarị ngịsị mị iru mị ḅu ẹkẹ, ọkịmun à Tamụnọ Amanyanakiri mị ḅie ịwọ iru mị ḅuḅịa ene la.”
26Anịsịkị ini gbọrị nime chu se so Oliv Tụndụ mị nwọ mun mẹ.
Jizọs Ḅe Pita ḅe Ò Pikiḅịa Ịkịan nwọ Koromẹ
(Mat 26.31-35; Luk 22.31-34; Jọn 13.36-38)
27Jizọs Ḅe nwọse ini ḅẹmẹ, “Óminemgba ị̀ ḅụ mangị sikima se ị̀ koromasoḅịa, anịatịḅị Fịafịa ḍiri mị nwọ ḅẹmẹ, Tamụnọ Ḅe anana koruḅọ ḅe nwọ ḅaaḅịa, se anana mamgba galagalaḅịa. 28Ọkụma fị ḅụ ini ị̀ sịsẹmasam ḅẹḅẹ, àrị ọ́ tọrọkọ pẹlẹma Galili munḅịa.”
29Pita ḅe pẹkẹrẹmẹ, “Àrị ngịsị ị́ koromaso ẹkẹ, ísíapụ mamgba ọkọ mịẹ sọnị!”
30Jizọs Ḅe Pita ḅe ḅẹmẹ, “À ḍuko ị́ pịrịaḅẹ na mị ḍin ọḅọkọ ma maịn karama paịn ka simeogbo, tẹrẹ-a sịkị ị́ nwọse ị̀ pikiḅịa na ị́ ị̀ nemikẹ.”
31Pita ḅe kụrọma pẹkẹrẹtẹịn mẹ, “Àrị ngịsị ḅẹ ẹkẹ na àrị ị́ nemikẹ, àrị ị́rị́ na fịḅịa nwọ ḅẹ sọnị!”
Se ísí ọḅụḍukoapụ mamgba anị gbọrịye mị nwọ ḍukomẹ.
Jizọs Ḅe Gẹtsimẹnị Ḅie Tẹkẹmẹ
(Mat 26.36-46; Luk 22.39-46)
32Iniḅo Gẹtsimẹnị nwọ chịn nyọ mị lamẹ, Jizọs Ḅe nwọse Oria ọḅụḍukoapụma ḅẹmẹ, “Ọ́ mịọ sime à mun tẹkẹ.” 33Anịsịkị Ò Pita ḅe na, Jems ḅe na, pịkị Jọn ḅe na, ọkị ọ̀ ḅụ chụamẹ. Opu kururu na opu ḅụọyị na Oria ọgọnọ gbanamẹ, 34se Ọ̀ nwọse ini ḅẹmẹ, “Ị̀ kuḅiemgbọlụ sime kururu ḅaka so ọkụma, kalaye kẹngẹ kọnmẹ anị ị̀ kọsịmasam, mịọkụ fị mị ḅe oju akụ ḅụ àrị omi-ẹ. Ọ́ mịọ sime se koru.”
35Ò kele sọma tọrọkọ mun, Ọ̀ ḅụ se chama kiri gbin se tẹkẹmẹ na, anị sarasaramẹ ḅẹḅẹ, ye ọ̀ mịn ḅụfụka sịkị mị ḅie sọma. 36Ọ̀ tẹkẹmẹ, “Ḍaḅọ,” “ị̀ Ḍa! Yemamgba ị́rị́ na sarasaramẹ. Ị̀ ọgọnọ mịn tọrụsiọrị ọmọngọ mị dekisin. Ọkụma ị̀rị̀ ḅiyekẹ, ọkụma ị́rị́ ḅiye mị-ẹ.”
37Anịsịkị Ò vinpịkị ḅo se tẹrẹ-a ọḅụḍukoapụma mọnọarị ọkụ nwọ ọrị, se nwọse Pita ḅe ḅẹmẹ, “Saịmọn, ị́ mọnọ-ao? Ị́ ineda gbọrị awa nwọse mọnọka ḅụ simeka?” 38Se Ọ̀ nwọse ini ḅẹmẹ, “Ó koru se tẹkẹ mịẹse ọ́ ḅịkị telima ḅie sọ ẹka ḅara. Tẹmẹ mị anị ḅereni waraḅẹ, ọkụma oju mịnị mị anị ịnyọ nyanakẹ.”
39Ọ̀ pịkị gbọrị sịkị se nwẹngị somun tẹkẹ se àrị gbọrị ọkwẹịnma kọnmẹ. 40Anịsịkị Ò vinpịkị ọḅụḍukoapụma damaḅo, se ini mọnọarị ọkụ ọrịmẹ; ini ineda inia tọrụmgbọlụma finjikẹ. Ini ḍuko Ọ̀ pịrịḅịaye sọnị ini nemikẹ.
41Ọ̀ tẹrẹ-a sịkị karama vinpịkị ḅo sịkị, Ọ̀ nwọse ini ḅẹmẹ, “Ọ́ pa mọnọ se ịnyọ sara-ao? Iḅisam! Sịkị mị ḅo lasam! Ḍiki, mịọkụ ini Tomoniḅọ Tọkụ Ḅe ḅọrọma siḅụ-ḅein apụma kụrọ mị pịrịsam. 42Ọ́ sịsẹ, ó ye wa so. Ḍiki, ị̀ se ịbafịarịḅọ ḅe ọ̀ mịọ omi-ẹ!”
Jizọs Ḅe Kun Mị
(Mat 26.47-56; Luk 22.47-53; Jọn 18.3-12)
43Jizọs Ḅe pa ọkwẹịn ini pịrịarịogbo, anị Judas, oyimaịn ọḅụḍukoapụ fịnjịma ḅie gbọrịḅọ ḅe ḅo laye-ẹ. Tomonikpo ọ̀ ḅụ sọ ḅomẹ, okola-agijima na imgbelema na ini na; tịḅịnị agbamịẹapụma na, Oloko ḍieapụma na, sẹnịapụma na ini fịrịmamẹ. 44Ịbafịḅọ ḅe, ori elekima se tomonikpo mị pịrịmẹ: “À ḅịpị nọnjụḅịa ḅọ ḅe anị ó ḅi ḅọ ḅe-ẹ. Ómine ò kun, se ó juju ḅụ ori ọlọ so.”
45Judas ḅe ḅo la kirikiri, ọ̀ sọ Jizọs Ḅe damamun se nwọ ḅẹmẹ, “Yeḍieḅọ!” se ọ̀ ḅịpị nọnjụmẹ. 46Anị ini Jizọs Ḅe kun se gagama ori ọlọye-ẹ. 47Ọkụma anịnyọ chịẹsime apụma ḅie gbọrị owuḅọ oria okola-agiji nwọ wọrọ se Gele Agbamịẹḅọ ḅe omoniḅọ ḅe gbogbo se, ò ḅeri pẹlẹsin mẹ. 48Anịsịkị Jizọs Ḅe pụkọ deki ọkwẹịn pakụma se nwọse ini ḅẹmẹ, “Ómine okola-agijima na imgbelema na nwọse pakaḅo ị̀ kun-e ḅo, oloko se yechịnka ḅọ mịẹ ọkụ? 49Ene mamgba à kọkọ ómine na Oputẹkẹwarị mị ḅie yeḍiesime, se ómine ị̀ kunkẹ. Ọkụma Fịafịa ḍiri ma kọkọmaye anị nwọ sọḅịa.”
50Anịsịkị ọḅụḍukoapụ mamgba ò koroma mangị somẹ. 51Gbọrị asẹmẹnịḅọ, lọkọ ḅịtẹ kẹngẹ nwọse ọ̀ ḅụ gbẹịn se, Jizọs Ḅe ḍukosimemẹ. Ini ò kun ḍọkịmẹ, 52ọkụma ọ̀ papaḅụsin se mangị, lọkọ ḅịtẹ mị wẹrịso se somẹ.
Ini Jizọs Ḅe Se Ḅẹrẹchiri Mị Ḅomẹ
(Mat 26.57-68; Luk 22.54-55,63-71; Jọn 18.13-14,19-24)
53Anịeso, ini Jizọs Ḅe se Gele Agbamịẹḅọ ḅe warị mun mẹ, tịḅịnị agbamịẹapụma na sẹnịapụma na, pịkị Oloko ḍieapụma na koḅirima sime nyọ mị. 54Pita ḅe ọ̀ sasama ḅụ ini ḍuko, se Gele Agbamịẹḅọ ḅe warị mị ḅe odo mị ḅie sọ mun mẹ. Anịnyọ ọ̀ nyọ koruapụma na kpọnjị simemẹ, fịnị mị anga sịkị fịnị temi simemẹ, ọ̀ ḅụ nwana nwanamaḅịa ẹrẹchị. 55Tịḅịnị agbamịẹapụma na bebe ḅẹrẹchiri mị mgba na onyechịẹ, ḅẹrẹ se Jizọs Ḅe pụnụmaḅịa apụ ḍọkịmẹ, ọ̀ ḅaaḅịa ẹrẹchị, ọkụma ini ineda gbọrịḅọ sọnị ḍọkịḅokẹ. 56Tọn-a onyechịẹapụ iruokọn Jizọs Ḅe pụnụmamẹ, ọkụma inia ḅịpịogbosọkẹ ini ḍukoarị ḅẹrẹ ma ḅụ.
57Anịsịkị, da owuapụ sịsẹ se mị iruo mị kọn Jizọs Ḅe pụnụmamẹ: 58“Wa naamẹ ò ḍuko sịkị na, ‘À tomoni nama sa Oputẹkẹwarị mị nwọ suma gbinḅịa, se tẹrẹ-a ḍin ḅọrọ sịkị, tomoni namaka gbọrịye à nwọ nama chịẹmaḅịa.’” 59Anị simeọkụ simeọkụ sọnị, ini ineda ḅịpịogbosọ nyanakẹ inia ḍukoaye ma ḅụ.
60Inimgba tọrụkuḅu ḅụ, Gele Agbamịẹḅọ ḅe ọ̀ sịsẹ se ḅẹrẹ se Jizọs Ḅe gbelamẹ, “Ị́ pẹkẹrẹḅịpị nyana se ini se ị́ pụnụma ọkwẹịn mị pịrịka?”
61Ọkụma Jizọs Ḅe Ò gboinma simemẹ, se Ọ̀ pịkị gbọrị ọkwẹịn kẹngẹ sọnị kọnkẹ. Se Gele Agbamịẹḅọ ḅe pịkị ḅẹrẹ se Jizọs Ḅe gbelamẹ, “Mẹsaya Ḅe ị́rị́, Ḅẹlẹmasa Tamụnọ Tọkụ Ḅe?”
62Jizọs Ḅe Pẹkẹrẹmẹ, “Ị̀rị̀-ẹ, ọ́ pịkị Tomoniḅọ Tọkụ Ḅe ọrịḅịa ọ̀ Kụrọmamgba Nyanaḅọ Ḅe amaḅara anga sime, se soḅie soḅuno ma na ḅoarị ọkụ mị na!”
63Gele Agbamịẹḅọ ḅe oria ḅụchụayema jine kan se nwọ ḅẹmẹ, “Jịn onyechịẹapụ ḅarị mịna ḅụpalịmakẹ! 64Ómine oria Tamụnọ fiesima mị naasam. Ọ́mịna ḅẹrẹ pẹlẹḅịpị cheye?”
Inimgba ini ḅẹrẹsi kọn Ọ̀ pịrịmẹ: na Ọ̀ fị gbẹịnmẹ. 65Inia ḅụ dapụ sakị fụla se Jizọs Ḅe saramẹ, se ini ye seni ọ̀ tọrụ fịna se Ọ̀ ḅakụmẹ. Ini nwọ ḅẹmẹ, “Mgba mgba, tụḅọ ị́ ḅakụ!” Se nyọ koruapụma Ori ọkị se Ọ̀ ḅụrọmẹ.
Pita Ḅe Jizọs Ḅe Pikimẹ
(Mat 26.69-75; Luk 22.56-62; Jọn 18.15-18,25-27)
66Fịrịnwẹngị Gele Agbamịẹḅọ ḅe pịrịarị eremeni awọma ḅie gbọrịḅọ sọḅo sịkị, Pita ḅe ọ̀ pa ḅẹrẹkọn odo mị ḅie omi-ẹ. 67Á Pita ḅe ọrị sịkị, ọ̀ fịnịtemiaḅẹ, á kweinma ò ḍiki se nwọ ḅẹmẹ, “Ị́rị́ sọnị Jizọs Nazarẹtḅọ Ḅe ḅụ ḅọ-ẹ.”
68Ọkụma, ori anị piki se nwọ pẹkẹrẹmẹ. “À nemikẹ…ị́ ḍukoarịye tịḅị à kaịnḅokẹ,” se ọ̀ nwẹngị pakaso nyọ mị mun mẹ. Anị gbọrị sịkị ḅụ ọḅọkọ paịnmẹ.
69Fịrịnwẹngị eremeni tọkụ ma árị anịnyọ ori ọrịmẹ se sakị á kọn ḅọrọsa ọkwẹịn mị ḍuko anịnyọ chịẹsimeapụma pịrịmẹ na, “Ori inia ḅie ḅọ-ẹ!” 70Ọkụma Pita ḅe ọ̀ pa pịkị anị pikimẹ.
Ḅọlọka sịkị ḅụ, chịẹsimeapụma pịkị anị ḍuko Pita ḅe ọgọnọ gbanamẹ, “Ị́ ineda piki ẹkẹ, ị́rị́ inia ḅie ḅọ-ẹ, anịatịḅị ị́rị́ sọnị Galili ḅọ-ẹ.”
71Anị Pita ḅe nwọ ḅẹye-ẹ, “À yekarịfịmẹ, na à kọkọmaye mị ḍukoaḅẹ! Ye Tamụnọ Ḅe ḅụfụka se ị̀ pịrị, à ḍukoarịye mị kọkọmaye kẹ ḅẹḅẹ! Ọ́ ḅẹrẹ ḅẹarịḅọ ḅe àrị ò nemikẹ!”
72Anị gbọrị sịkị ḅụ, maịn karama ọḅọkọ paịnmẹ, se Pita ḅe Jizọs Ḅe mị ḅara mị nwọse ọkwẹịn ọ̀ pịrịmẹ nwọ ḅẹ ọkụ mị se ḅiekoromamẹ na, “Ọḅọkọ ma mama sịkị se paịnka simeogbo ị́ tẹrẹ-a sịkị se ị̀ pikiḅịa na ị́ nemikẹ.” Se ọ̀ kpọma akụ ḅara se owumẹ.
Currently Selected:
Mak 14: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
