Luk 1
1
Ị̀ Ḅụ Yela Tiofịlọs
1Tọn-a apụ inia ịnyọ laḅara mịẹse mịna ogboku mịẹye ma nwọse ḍiri ḅie gịẹịnsam. 2Sakị mị ngịsị mayema ọrị se anịḅe oku mị ḍukopakụma apụma ḍuko ini pịrịye ma ini nwọ gịẹịnmẹ. 3Anịẹrẹchị, ị́ya osi nyanakiri mị se yechịn ḅụ, à tọrụkweinma ma ḅẹrẹ ma ḍawọnemisaye ẹrẹchị, arịḅe sakị mị ngịsị, à koromamẹ na anị iḅiḅịa àrị àrị se ọrụtọnma ḍiri ḅie gịẹịn ị́ pịrị. 4À mịn mị nwọ mịẹmẹ mịẹse ị́ ḅeinma kọkọmaye mị nwọ nemiḅịa ḅara, ini se ị́ ḍiesaye mamgba ḅụ.
Jọn Mengisaraḅọ Ḅe Yi Mị Ini Nwọ Ḍukopakụmamẹ
5Hẹrọd ḅe Judia mị ḅe amanyanaḅọ nwọ sọ sịkị mị ḅụ, gbọrị agbamịẹḅọ omi-ẹ, Zẹkaraya anị oria ẹrẹ-ẹ, Abaịja agbamịẹ mụmbụ ọrụ mị, ò sime nwọ pịrịmẹ. Tarọ ma árịa ẹrẹ anị Ẹlizabẹt, árị sọnị agbamịẹ furo ḅie ḅọ-ẹ. 6Ini mama apụ mamgba Tamụnọ Ḅe tọrọkọ iḅi ḍumo nwọ kọn apụ-ẹ, se ḅeinma Tamụnọ olokoma na ọ̀ tọnye ma na nwọ mịẹarị apụ-ẹ. 7Ini awọ yikẹ, anịatịḅị Ẹlizabẹt ma á furo pụnmẹ, se árị na Zẹkaraya ḅe na pịkị opuma olomusam.
8Gbọrị ene Zẹkaraya ḅe, agbamịẹḅọ ḅara ḅụ anị ḅo oria sịkị lasịkị Tamụnọ Ḅe tọrọkọ oria fịrị nwọ nwẹngịaḅẹ. 9Tamụnọ agbamịẹapụma ye mịẹmịẹ ḅara ḅụ, ini ịkịan wakị ḅụ ḅọrọ ọ̀ sẹlẹ pakụmaḅomẹ na ori ḅo agbamịẹ ẹbẹ mị ọgọnọ insẹnsị dọkịma agba mịẹ-ẹ. Anị ọ̀ Nyanaḅọ Ḅe Oputẹkẹwarị mị ḅie mun ye-ẹ. 10Insẹnsị mị dọkịmarị sịkị, tomonikpo mị nụngọ anga sime se tẹkẹaḅẹ. 11Insẹnsị dọkịma agbamịẹ ẹbẹ mị amaḅara anga ḅụ, Nyanaḅọ Ḅe enjẹlḅọ ḅe chịẹsime se ọ̀ ḅụ se ò ḍiemẹ. 12Zẹkaraya ḅe ori ọrị sịkị, anị ọ̀ ḅụgbiripuma, pịkị ọ̀ ḅalafamamẹ. 13Ọkụma enjẹlḅọ ḅe nwọse ọ̀ ḅẹmẹ, “Ḅalafama, Zẹkaraya! Tamụnọ Ḅe ori ị́ya tẹkẹ naasam, ị́ ta Ẹlizabẹt ma árị owutọkụ yi ị́ pịrịḅịa. Se Jọn ị́ nwọse ọ̀ chịnḅịa. 14Nde anị ị́ ḅieḅẹlẹma laḅịa ọkụ, nde anị pịkị tọn-a apụ ḅieḅẹlẹma laḅịa ọkụ ini ò yiḅịa sịkị! 15Nyanaḅọ Ḅe tọrụkuḅu ori opu ḅọ sọḅịa. Ori ngịsị iru anịkanịka kụrọ iruḅu ẹkẹ. Oria yi ḅụ sakị Fịafịa Tẹmẹ Ḅe ọ̀ ḅụ ḅeinḅịa, 16ọ̀ pịkị tọn-a Izrẹlapụ nwọ ọkị vinpịkị ḅo ini Nyana Tamụnọ Ḅe pịrịḅịa. 17Ọ̀ Nyanaḅọ Ḅe tọrọkọ ịsụnḅịa, ọ̀ kụrọ, pịkị ịnyọ nyanaḅịa, ịkịankoro Ịlaịja ḅe sime ọkụ. Ọ̀ pịkị ḍapụma na awọmẹnịma na nwọ ọkịḅo gbolomaḅịa; ọ̀ ḅịpịpokika apụma nwọ pịkị ḅo karakaraye mịẹapụ koroma mị ḅie chuḅịa; ọ̀ Nyanaḅọ Ḅe tomonima nwọ karakarama koroma ọ̀ pịrịḅịa.”
18Zẹkaraya ḅe nwọse enjẹlḅọ ḅe ḅẹmẹ, “Nde à nemiḅịa ọkụ na mịn mị kọkọmaye-ẹ? Ị̀rị̀ àrị olomusam, ị̀ ta ma sọnị nwọ olomusa sịkị.”
19“Ị̀rị̀ Gebrịẹl ḅe-ẹ,” enjẹlḅọ ḅe nwọ pẹkẹrẹmẹ, “À Tamụnọ Ḅe tọrụkuḅu chịẹ waraḅẹ, ị̀ fịrịma na ọkwẹịn ị́ pịrị, pịkị mị iḅi ḅẹrẹ mị ḍuko ị́ pịrị nwọ ḅẹ ḅọ Ḅe. 20Ọkụma ị́ ị̀ya oku mị ḅerenikẹ, karakara sịkị ḅụ ḅo kọkọmaye sọḅịaye mị. Ị́ ḅerenikaye gose, ị́ ḅarị ineda ọkwẹịn ẹkẹ; ị́ gboinma simeḅịa ọkịmun à ḅereni ị́ pịrịye mị ḅo kọkọmaye sọḅịa ene mị laḅịa.”
21Mịn sịkị mị ḅụ tomonima Zẹkaraya ḅe nwọ koru simemẹ, inia ḅụḅalaḅalamẹ ò gose mị ḅara mị nwọse sime ḅọlọmaye Oputẹkẹwarị mị ḅie ḅụ. 22Ọ̀ pakaḅo sịkị, ori ineda ọkwẹịn ini pịrịkẹ, se ini nemimẹ na ori Oputẹkẹwarị mị ḅie ịkịan ọrịsam. Ineda gbọrị ọkwẹịn sọ kọnka ḅụ ori ọ̀ ḅarama se elekima mịẹ ini pịrịmẹ.
23Ori Oputẹkẹwarị ḅie fịrịnwẹngịḅịa sịkị mị ḅọrọ sịkị, Zẹkaraya ḅe vinpịkị so warị mun mẹ. 24Sịkị ḅo ḅọrọ sịkị, tarọ Ẹlizabẹt ma á furamẹ, se warị ḅie pakaka mun sọnọ-a akalụ lamẹ. 25Á nwọ ḅẹmẹ, “Mịọkụ anịa kuluma Nyanaḅọ Ḅe Ọ̀ ḅarachụa ị̀ pịrịsam, ori amaogbo ị̀ tọrụ ḅụgerere sinsam!”
Jizọs Ḅe Yi Mị Ini Nwọ Ḍukopakụmamẹ
26Ẹlizabẹt ma fura sonio karama akalụ ḅie Tamụnọ Ḅe Gebrịẹl, enjẹlḅọ ḅe se gbọrị Galili ama fịrịmamẹ, Nazarẹt ini nwọse chịn ama. 27Ori oku daḅo gbọrị eremeni tọkụ pịrịmẹ, Josẹf ḅe simeḅịa ẹrẹchị ọlọ ḅọ ma, ori amanyana Devid ḅe furo ḅọ-ẹ. Tọkụ ma ẹrẹ anị Meri. 28Enjẹlḅọ ḅe á damaḅo se nwọse á ḅẹmẹ, “Deinma ị́rị́ na sime! Nyanaḅọ Ḅe Ori ị́rị́ na omi-ẹ, Ọ̀ pịkị opuma ị́ ḅẹlẹmamẹ!”
29Enjẹlḅọ ḅe oku mị kpọma Meri ma ḅụḅalaḅalamamẹ, oria ọkwẹịnma fiearịye sọnị pịkị á ḅụgbiripumamẹ. 30Enjẹlḅọ ḅe nwọse á ḅẹmẹ, “Ḅalafama, Meri; anịatịḅị Tamụnọ Ḅe Ori ị́ ḍikiḅụgereresam. 31Ị́ furaḅịa, se gbọrị owutọkụ nwọ yiḅịa, pịkị Jizọs nwọse ọ̀ chịnḅịa. 32Ori opu ḅọ sọḅịa se Geletẹịn Tamụnọ Ḅe Tọkụ ini nwọse Ọ̀ chịnḅịa. Tamụnọ Nyanaḅọ Ḅe Ò se Amanyanaḅọ mịẹḅịa, Oria ḅieju-ḍaḅọ Devid ḅe sime ọkụ mị, 33Ọ̀ pịkị Jekọb furo mị ḅe amanyanaḅọ nwọ sọ gbasoḅịa; Oria amanyanakiri mị kuluma nyana ẹkẹ!”
34Meri ma nwọse enjẹlḅọ ḅe ḅẹmẹ, “Ị̀rị̀ ma owuḅọ nemika eremenitọkụ-ẹ. Nde anịọkụma mịn mị ineda mịẹḅịa ọkụ?”
35Enjẹlḅọ ḅe pẹkẹrẹmẹ, “Fịafịa Tẹmẹ Ḅe ḅo ị́ya ọgọnọ gbanaḅịa, Tamụnọ Ḅe kụrọ mị pịkị ị́ ọgọnọ simeḅịa. Mịn mị ẹrẹchị Tamụnọ Tọkụ ini nwọse Osiḅụ sime Tọkụ ḅe chịnḅịa. 36Ị́rị́ na pakụma Ẹlizabẹt ma nwọse ḅiekoroma. Ini nwọ ḅẹmẹ, na árị ineda awọ yi ẹkẹ ọkụma árị na mịnaḅụ na sonio akalụ sime á ḅụ omi-ẹ, árị opuma olomusam nwọ ḅẹ sọnị. 37Anịatịḅị Tamụnọ Ḅe ori ineda mịẹ ẹkaye ofori-ẹ.”
38“Nyanaḅọ Ḅe ị̀rị̀ oria fịrịnwẹngịḅọ-ẹ,” Meri ma nwọ ḅẹmẹ, “ye anị ị́ ḍuko ọkụ mị nwọ paka ị̀ pịrị.” Se enjẹlḅọ ḅe á koroma somẹ.
Meri Ma Mun Ẹlizabẹt Ma Lamẹ
39Anị mị ḅo ḅọrọ kirikiri, Meri ma á ḅụkarakarama se be paka Judia sẹ mị ḅie sime chịngị mị ḅie gbọrị ama nwọ mun mẹ. 40Zẹkaraya ḅe warị á nwọ mun se, Ẹlizabẹt ma kerenimẹ. 41Ẹlizabẹt ma á Meri ma kereni ḅịpị mị nwọ naa sịkị, á furo ḅie sime tọkụ mị á ḅie ḅụ jikemẹ. Ẹlizabẹt ma Fịafịa Tẹmẹ Ḅe á ḅụ ḅeinmẹ 42se á gele pụkọ ḅụ nwọ ḅẹmẹ, “Eremeni mamgba ḅụ ị́rị́ ḅẹlẹma sime pịrịtẹịnḅọ-ẹ, ḅẹlẹma pịkị sime ị́ yiḅịa tọkụ mị pịrịmẹ! 43Nde nwọ sime opuye gose paka ị̀ pịrịye na ị̀ Nyanaḅọ Ḅe nyengima ḅo ị̀ lamẹ? 44Anịatịḅị àrị ị́ya kereni pụkọ mị naa kirikiri ị̀ furo ḅie sime tọkụ mị ḅieḅẹlẹ ḅụ ḍosimẹ. 45Ị́ ḅieḅẹlẹ ọkụ ḍiki, na ị́ ḅerenimẹ na Nyanaḅọ Ḅe oku mị ḅo kọkọmaye nwọ sọḅịa!”
Meri Ma Chu Tokoni Nime Mị
46Meri ma nwọ ḅẹmẹ,
“Ị̀ kuḅiemgbọlụ mị Nyanaḅọ Ḅe tokonimẹ;
47ị̀ tẹmẹ mị ḅieḅẹlẹmẹ ị̀ Tamụnọ ị̀ya Ḍụaḅọrọmaḅọ Ḅe gose,
48anịatịḅị ori ị̀ se ḅiekoromasam, oria iderima fịrịnwẹngịḅọ ma!
Mịọkụ ọkị tọrọkọ mun tomoni mamgba nwọse ị̀ chịnḅịa ḅieḅẹlẹ,
49anị Tamụnọ Ḅe mịẹ ị̀ pịrịsa opuaye ma gose,
Oria ẹrẹ mị fịafịamẹ;
50Ò ḍikiḅụgerere nyana Ò ḍikiḅalafa apụma pịrịpịrịmẹ,
gbọrị ḅụọ ḅụ ọkịmun jịn ḅụọ la.
51Ori Oria kụrọ nyana ḅara kọngọ mị nwọ ịsụn pakụmamẹ se opuaye mịẹ apụma nwọ galagalamamẹ ini tọn ye mamgba na.
52Ọ̀ kụrọ nyana opu amanyanapụma nwọ iderima kiri koromamẹ inia amanyana ngada ma ọgọnọ ḅụ,
se iderima kiri ḅụ sime apụma nwọ deki gololomamẹ.
53Ori Iḅiaye se ḅuru pụkọ tarị apụma ḅụlọ ḅeinmasam,
se papa ḅara ḅụ ngọ kọn apụma desinsam.
54Ò ḅereni mịna ḅieju-aḍapụma pịrịye mị Ọ̀ nwọ kokomẹ,
se ḅo ḅarachụa Oria fịrịnwẹngịḅọ Izrẹl ḅe pịrịsam.
55Ò ḅiekoroma ḍikiḅụgerere nwọ ḍiepakụma Ebraham ḅe pịrịsam,
pịkịna ò furoapụ mamgba nwọ pịrị gbasomẹ!”
56Meri ma tẹrẹ-a akalụ pembemaye nwọse Ẹlizabẹt ma na simemẹ, anịsịkị vinpịkị so warị mun mẹ.
Jọn Mengisaraḅọ Ḅe Yi Mị
57Ẹlizabẹt ma ḅe yi sịkị mị ḅo lamẹ, se árị owutọkụ nwọ yimẹ. 58Árị na palịa angapụma na árị na pakụmapụma na Tamụnọ Ḅe se árị na anga iḅi ḅara mị nwọ naamẹ, se inimgba á ḅụ sọ ḅieḅẹlẹmẹ.
59Tọkụ ḅe ḅo gbọrị wiki nwọ lasịkị ini ọ̀ ḅụpẹlẹḅịa ẹrẹchị ḅomẹ, Zẹkaraya ini nwọse ọ̀ chịn-ẹ tọnmẹ, ḍawu agogo ḅara ḅụ. 60Ọkụma nyọngọrọma nwọ ḅẹmẹ, “Ẹn-ẹn! Jọn mị ó se ọ̀ chịnḅịaye-ẹ.”
61Ini nwọse á ḅẹmẹ, “Ómine na pakụmapụma ḅụ ọkọ sime ẹrẹ fịḅọ ofori-ẹ!” 62Anịsịkị ini elekima mịẹ ḍawu ḅe pịrịmẹ, ò gbelaḅẹ ọ̀ ḅụḅẹlẹ se ini se tọkụ ḅe chịnḅịa ẹrẹ.
63Zẹkaraya ḅe inia ḅara ò se ḍiri gịẹịnḅịaye nwọ ḅimẹ, se gịẹịnmẹ, “Oria ẹrẹ anị Jọn.” Inimgba ḅụgbiripumẹ! 64Anị gbọrị sịkị mị ḅụ Zẹkaraya ḅe ineda pịkị ọkwẹịnmẹ, se ọ̀ sakị Tamụnọ Ḅe tokonimẹ. 65Ori na palịa angapụ mamgba ḅalafamẹ, se mayema gboloma ḅẹrẹ mị wasama Judia chịngị ọgọnọ sẹ mị mgba kelemamẹ. 66Anị naa ḅọ goyegoye anị se koroma ḅụ chu se nwọ gbelamẹ, “Nde nde sime ḅọ ḅe tọkụ ḅe nwọ sọ ḅe?” Anịatịḅị anị ḅelemẹ na Nyanaḅọ Ḅe kụrọ mị ori na omi-ẹ.
Zẹkaraya Ḅe Koro Ịkịan Mị
67Jọn ḍa Zẹkaraya ḅe Tamụnọ Tẹmẹ Ḅe ò ḅie ḅeinmẹ, se ori ịkịankoro se nwọ ḅẹmẹ:
68“Ó ye wa Nyanaḅọ Ḅe tokoni, Izrẹl Tamụnọ Ḅe!
Ò ḅo ḅarachụa oria tomonima pịrị-ẹ ḅomẹ, se ini mịẹse ini inia tịḅị nyanasam.
69Ori opu Ḍụaḅọrọmaḅọ se wa pịrịsam,
oria fịrịnwẹngịḅọ Devid furo ḅie pakaḅo ḅọ ḅe.
70Ḅọlọsa sịkị ngịsị ori oria fịafịa ịkịankoroapụma ḅụ ḅọrọ mị ye mị ḅereni wa pịrịmẹ
71na ò mine na tarakapụma ḅara ḅie wa ḍụaḅịa,
pịkị wa ḍikiḅieḅuarị apụma kụrọ ḅụ na.
72Ọ̀ nwọ ḅẹmẹ, ọ̀ mịna ḅieju-aḍapụma ḅụ ḍikiḅụgerere ḍiepakụmaḅịa,
se oria fịafịa ọḅọkụ mị se ḅiekoromaḅịa.
73-74Ọ̀ kụrọma yekarịfị mịna ḅieju-ḍaḅọ Ebraham ḅe pịrịmẹ,
ò ḅerenimẹ na ò mine na tarakapụma ḅara ḅie wa ḍụaḅọrọmaḅịa,
se ḅereni wa pịrịmẹ na wa ḅalafaka ḅara ḅụ fịrịnwẹngị ọ̀ pịrị,
75ọ̀ tọrọkọ wa fịafịa se pịkị karakaraḅịa
mịna ḍumo ene mamgba ḅụ.
76“Ị́rị́, ị̀ya tọkụ ḅe, ini nwọse ị́ chịnḅịa Geletẹịn Tamụnọ Ḅe ịkịankoroḅọ.
Ị́ tatarị Nyanaḅọ Ḅe tọrọkọ da munḅịa
oria ateli mị karakarama Ọ̀ pịrịḅịa ẹrẹchị,
77ḍuko Oria tomonima pịrịḅịa na ini ḍụaḅọrọma nyanaḅịa
inia sima ḅụ ḅarasin ini pịrị ḅụ.
78Mịna Tamụnọ Ḅe ò ḍikiḅụgerere nyanamẹ ọ̀ pịkị deinmẹ.
Ọ̀ mịẹse ḍụaḅọrọma ene mị ḅịa ḅo wa saramaḅịa
79se soḅie wẹrị ḅịaḅo, fị mị kanakana tẹmẹ mị chuku ḅie sime apụ mamgba saramaḅịa,
se mịna nwẹngịaḅụọ ma dagbụkụkụma deinma ateli mị ḅie chuḅịa.”
80Tọkụ ḅe ojumịnị ḅụ na tẹmẹ ḅụ na sẹnị ḅo tomoniḅọ sọmẹ. Onwun ele mị ḅie ori angamẹ, ọkịmun ori ọ̀ ḅụ se ḅelema Izrẹlapụma ḍie ene lamẹ.
Currently Selected:
Luk 1: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
