Jọn 2
2
Kana Ḅie Ereya Mị
1Mama ḍin karama ene ḅụ ereya Kana ama mị ḅie kiri ọkịmẹ, anị Galili sẹ mị ḅie Jizọs nyengima anịanga ḅụ simemẹ, 2se Jizọs Ḅe na oria ọḅụḍukoapụma na ini ini chịnmẹ ereya mị ḅụ. 3Ini iru mamgba nwọ ḅu so sịkị, Jizọs nyengima nwọse ọ̀ ḅẹmẹ, “Ini ḅarị iru nyanakẹ.”
4“À mịẹḅịaye nwọ ḍuko ị̀ pịrịma,” Jizọs Ḅe nwọse á pẹkẹrẹmẹ. “Ị̀ya sịkị ma lakẹ.”
5Anịsịkị Jizọs nyengima ḍuko fịrịnwẹngịapụma pịrịmẹ, “Ori ọ́ ḅẹ mịẹ nwọḅẹ yelayelaye ómine anị mịẹ.”
6Juapụ inia Tamụnọ tẹkẹ-aḅara ḅe oloko nwọ nyanamẹ, ḅụ sịkịrị gbolomaye ḅụ, se anị mịẹḅịa ye gose sonio-a ḍụparị ojongo anịnyọ simemẹ, arịa ḅie gbọrịye gbọrịye ineda pa si na soi na pembe galọnị mengi ḅụ nwọ dekiḅịa. 7Jizọs Ḅe nwọse fịrịnwẹngịapụma ḅẹmẹ, “Ó mengi se mà ojongo ma ḅie chụa ḅeinma.” Ini àrị chụa ḅeinma mun ḅịpị ḅọkọ lamamẹ, 8ọ̀ pịkị anịsịkị ḍuko ini pịrịmẹ, “Mịọkụ ó mengi ḍu pakụmaḅo, se anị ọkịmun alalị mị tịḅịdaḅọ ḅe pịrị.” Ini mengi mị ọkịmun ọ̀ pịrịmẹ, 9anị mịọkụ pịkịḅo iru sọsaye mị ọ̀ nwọse ọ̀ ḅịpị lamamẹ. Mịn iru mị ḅo anga ò nemikẹ, (ọkụma, mengi mị ḍu pakụmaḅo fịrịnwẹngịapụma ini nemimẹ); anị ori ereyaḅọ ḅe chịnye-ẹ 10se nwọse ọ̀ ḅẹmẹ, “Tomoniḅọ goyegoye tatarị iḅitẹịn iru mị nwọse ḅoḅomẹ, anịsịkị anị iru mị igoniapụma tọrụ ḅaa so sịkị, ọ̀ papa iru mị nwọse ḅo ini pịrịḅịa. Ọkụma ị́rị́ iḅitẹịn iru mị nwọse wẹrịḅo mịọkụ lasam!”
11Galili ḅie Kana mị ḅie mị Jizọs Ḅe Oria tatarị ḅụgbiripuma fịrị mị nwọ nwẹngịye-ẹ, anịanga Ori Oria boma mị nwọ ḍiepakụmamẹ, se Oria ọḅụḍukoapụma Ò ḅerenimẹ.
12Mịn mị ḅọrọ sịkị, Jizọs Ḅe na nyọngọrọma na, Oria owuapụ mịnapụma na, pịkị Oria ọḅụḍukoapụma na so Kapanịọm mun mẹ, se boka ḍin seni anịnyọ simemẹ.
Jizọs Ḅe Oputẹkẹwarị Mị Mun mẹ
(Mat 21.12-13; Mak 11.15-17; Luk 19.45-46)
13Kalaye kọnmẹ Saḅaḅọrọ Alalị mị ḅo la, anị Jizọs Ḅe so Jerusalẹm mun ye-ẹ. 14Oputẹkẹwarị mị ḅie nama na, anana na, elesika na dẹrịarị owuapụ ọ̀ nwọ ọrịmẹ, pịkị igbiki ḍinmarịapụ na, inia dẹbụl ma angasịkị sime waraḅẹ. 15Anị ò ḍiki seni fomuye mịẹ, anị seni Oputẹkẹwarị mị ḅie sime namama depakụmaye-ẹ, ananama na, ísí namama na, igbiki ḍinmarịapụ dẹbụl ma pịkị iḅo, se inia igbiki ma galagalamamẹ 16pịkị tọn elesika ma dẹrịapụ ma pịrịmẹ, “Ọ́ mịanga àrị dekisin! Ómine ị̀ Ḍaḅe warị mị seni fẹ tuḅo nyọ mịẹ ma!” 17Oria ọḅụḍukoapụma se ḅiekoromamẹ na fịafịa ḍiri mị nwọ ḅẹmẹ, “À nyana ị́ya warị mị pịrị iḅi kuḅie mị, Yei Tamụnọ, ị̀ ḅie fịnị kọrị ọkụ kọrịmẹ.”
18Ju ḅẹrẹtọn apụma vinpịkị Ọ̀ damaḅo ḅẹrẹ seni Ò gbelamẹ, “Che ḅụgbiripumaye Ị́ ineda nwọ mịẹ ḅe, se ḍiepakụma na Ị́ kụrọ nyanamẹ se nwọ simeye mịẹ?”
19Jizọs Ḅe pẹkẹrẹmẹ, “Ọ́ mị Oputẹkẹwarị mị kan koroma, tẹrẹ-a ḍin ḅụ à pịkị anị nama chịẹmaḅịa.”
20“Tẹrẹ-a ḍin ḅụ Ị́ pịkị anị nama chịẹma ḅe?” ini nwọse Ò gbelamẹ. “Ineinfa kụra mesi oyi fịnjị anị nwọ ọkịmẹ se mị Oputẹkẹwarị mị nwọ nama!”
21Ọkụma Jizọs Ḅe ḅẹrẹ ḍukoarị Oputẹkẹwarị mị anị Oria oju mị-ẹ. 22Anị mịẹse ini fịḅụ Ọ̀ sịsẹma sịkị, Oria ọḅụḍukoapụma anị se ḅiekoromamẹ na mịn mị Ò ḍuko ḅọrọsam, se ini fịafịa ḍiri mị ḅerenimẹ, pịkị Jizọs Ḅe ḍukoye na.
Jizọs Ḅe Tomoniḅọ Ḅe Simeọkụ Nemimẹ
23Jizọs Ḅe Jerusalẹm ḅie simearị sịkị, Saḅaḅọrọ Alalị mị ḅie, tọn-a tomoni ò ḅerenimẹ ọ̀ nwẹngị ḅụgbiripuma fịrịma ini nwọ ọrị sịkị. 24Ọkụma Jizọs Ḅe ori ọ̀ ḅụ seni ini pịrịkẹ, anịatịḅị ori iḅiọkụma inimgba nemimẹ. 25Nweniḅọ gose tomoni gbolomaye ḍuko ọ̀ pịrịḅịaye ofori-ẹ, anịatịḅị ori inia kuḅiemgbọlụma ḅie simeye nwọ nemimẹ.
Currently Selected:
Jọn 2: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
