Chukusakị 42
42
Josẹf Owuapụ Mịnapụ Ma Ijipt Mun Ịpịamgba Fẹ-ẹmumẹ
1Jekọb ḅe, ọ̀ naamẹ na ịpịamgba Ijipt ḅie omi-ẹ, ọ̀ nwọse oria owuapụ awọma ḅẹmẹ, “Cheye gose ọ́ gbọrịye sọ mịẹka? 2À naamẹ na Ijipt ḅie ịpịamgba omi-ẹ, ómine anịju mun se kele ịpịamgba fẹḅo mịẹse wa ḅuruḅaa ḅie sime fịẹka ḅara.” 3Anịẹrẹchị Josẹf ḅe na gbọrị-ḍaḅọ-yi-oyi-owuapụ-mịnapụ ma Ijipt mun ịpịamgba fẹ-ẹmumẹ, 4ọkụma Jekọb ḅe Josẹf ḅe na-gbọrị-nyeingiḅọ na ḍaḅọ na yi Bẹnjamin ḅe ori ò se sẹịnkẹ, anịatịḅị ọ̀ ḅalafamẹ ye ọ̀ laḅịa-etuḅo.
5Jekọb owuapụ awọma na jịn apụ na mun ịpịamgba fẹ-ẹmunmẹ, anịatịḅị ḅuruḅaa Kenan ḅie omi-ẹ. 6Josẹf ḅe Ijipt ama ḅie gọvịna ḅaraḅụ, ịpịamgba se tomonikiri-a-tomoni mamgba nyọnyọ ḅụ ḅoarịapụ ma dẹrịaḅẹ. Anịẹrẹchị Josẹf owuapụ mịnapụma ọ̀ tọrọkọ kpẹrẹkị se inia tọrụ ma se kiri iḅomẹ. 7Josẹf ḅe ò ḅo oria owuapụ mịnapụma ọrị sịkị ori ini nemimẹ, ọkụma ori ini nemika ḅara nwọse yemịẹmẹ. Ọ̀ kụrọ pụkọ ḅụ yese ini gbelamẹ, “Nde anga ó ḅo?”
“Kenan wa ḅomẹ fịye fẹ gose,” ini nwọ pẹkẹrẹmẹ.
8Josẹf ḅe ori oria mịnapụ owuapụma nemimẹ, nwọḅẹsọ, ini ò nemikẹ. 9Inia ḅụ ọ̀ kọn ḍawọ ma ọ̀ nwọse ḅiekoromamẹ se nwọ ḅẹmẹ, “Ómine ama ẹnyẹ apụ-ẹ; ó ḅo mịna ama ḅụ kụrọka pẹkẹrẹ ḍọkị nemi-ẹ ḅomẹ.”
10“Ẹn-ẹn, sẹnịḅọ,” ini nwọ pẹkẹrẹmẹ, “Mine ị́ya omoni ḅaraḅụḅo fịye fẹ-eḅo apụ-ẹ. 11Mine mgba gbọrị mịnapụ-ẹ. Mine ama ẹnyẹ apụkẹ, sẹnịḅọ, mine karakara à tomoni-ẹ.”
12Josẹf ḅe nwọse ini ḅẹmẹ, “Ẹn-ẹn! Ó ḅo mịna ama ḅụ kụrọka pẹkẹrẹ ḍọkị nemi-ẹ ḅomẹ.”
13Ini nwọ ḅẹmẹ, “Mine oyimaịn owuapụ fịnjị, sẹnịḅọ, gbọrị ḍaḅọ yi mịnapụ-ẹ, Kenan ama ḅie. Gbọrị owuḅọ fịsam, kalaḅọ ḅe mịọkụ ọ̀ mịna ḍaḅe na omi-ẹ.”
14“À pa ḍukosa gbọrị ḅara mị-ẹ,” Josẹf ḅe nwọ pẹkẹrẹmẹ. “Ómine ama ẹnyẹ apụ-ẹ. 15Mị ini ómine elekima ḍikiḅịa ọkụ-ẹ: Amanyanaḅọ ḅe ẹrẹ ḅụ à yekarịfịmẹ na ngịsị mịanga ọ́ ḅụọ sin ẹkẹ ọ́mịna ḅie kalaḅọ ḅe ḅoka simeogbo. 16Ọ́mịna ḅie gbọrịḅọ mun ori ọkịḅo. Ómine kirikọn apụma à nwọ ọlọ koromaḅịa ọkị nweni ó ḍukoye mị ḅe karakara wa nwọ nemiḅịa sịkị la. Anịka ọkụma, ó nemi na, amanyanaḅọ ḅe ḍumo sịkị layelaye ómine ama ẹnyẹ apụ-ẹ.” 17Anịḅụ ori ini se tẹrẹ-a ḍin ikoli ḅie chumẹ.
18Tẹrẹ-a ḍin karama ene ḅụ, Josẹf ḅe nwọse ini ḅẹmẹ, “Ị̀rị̀ Tamụnọ ḍikiḅalafaḅọ-ẹ, àrị ọ́ wẹrịsoḅịa ó nemikase à ḍukoḅịa gbọrịye nwọ mịẹḅịa ọkụma. 19Se ḍiepakụma na ómine kọkọma tomoni-ẹ, ọ́mịna ḅie gbọrịḅọ mị àrị ó se koroma ikoliwarị ḅie simeḅịaye-ẹ; kirikọn apụma ini ineda fịye ma se mun ọ́mịna ḅuruḅaa furoma pịrịḅịa, anị ọ́ fẹ ịpịamgba ma. 20Mịẹka mịẹka ḅaraḅụ ọ́mịna numbireowu kalaḅọ ḅe ọ́ nwọse ḅo ị̀ pịrị. Mịn mị ḍiepakụmaḅịa na ọ́ kọkọmaye ḍuko aḅẹ, anị à ḅarị ọ́ ḅaa-ẹkẹ.”
Mịn mị ini ḅerenimẹ, 21se nwọse jụmḅọ jụmḅọ ḅẹmẹ, “Iin, mịọkụ wa se mịna numbireowu ḅe mịẹaye ma ḅe ḅụfụka mị wa ọrịarịye-ẹ; ọ̀ wa tẹkẹmẹ na wa ḅarachụa ọ̀ pịrị nwọḅẹ sịkị, ò ḅie sime opu ḅụfụka wa ọrịmẹ, ọkụma wa ò pokikẹ. Anịgose mịọkụ wa ḅo mị ḅụfụka ḅie sọmẹ.”
22Rubẹnị ḅe nwọ ḅẹmẹ, “À ḍuko ọ́ pịrịmẹ ó yese tọkụ ḅe lamama-ẹ, ọkụma ó poki ḍụkụkẹ. Mịọkụ tọkụ ḅe fị mị ḅe gbẹịnye wa nwọ ọrịaḅẹ.” 23Josẹf ḅe ini ḍukoarịye ọ̀ kaịnḅomẹ, ọkụma ini nemikẹ, anịatịḅị ọkwẹịn daḅọrọmaḅọ ḅụ mị ini ḅọrọ ọkwẹịn ọ̀ pịrịarịye-ẹ. 24Josẹf ḅe ori ini koroma so se mun owumẹ. Ori owuso sịkị ò vinpịkị ḅo ọkwẹịn ini pịrịmẹ, se ori inia ogboku Simiọnị ḅe ọkịpakụmaḅo se inia tọrọkọ ọ̀ fịnamẹ.
Josẹf Mịnapụ Ma vinpịkị Kenan Mun mẹ
25Josẹf ḅe kụrọ pịrịmẹ na ini ịpịamgba ma se oria mịnapụma akpa ma ḅeinma, pịkị ḅọḅọ akpa ḅie inia igbiki se chụa, pịkị ini se ateli nwẹngịḅịa fịaye na se ini pịrị. 26Mịnapụ ma ini fẹ ịpịamgba ma se inia yepụra asụnma ọgọnọ gbana ḅeinmamẹ, se sakị inia nwẹngị kọnmẹ. 27Ini mun ini mọnọḅịa nyọ nwọ lasịkị, inia ḅie gbọrịḅọ fịye se oria yepụra asụn ḅe pịrịḅịaye gose oria akpa finjimẹ se oria igbiki mị akpa ọgọnọ ọ̀ nwọ ọrịmẹ. 28“Ị̀ya igbiki mị ini pịkị se ị̀ pịrịsam,” ori oria mịnapụma chịnse nwọ ḅẹmẹ. “Mị anị-ẹ ị̀ya akpa ḅie!” Inia kuḅie ma lọkọmẹ, se ḅalafa ḅụ ini jụmḅọ jụmḅọ gbelamẹ, “Mị cheye Tamụnọ Ḅe ọ̀ nwọse wa mị-ẹ?”
29Kenan ḅie iniḅo inia ḍa Jekọb ḅe lasịkị, inia ḅụ pakaye mamgba ini nwọ ḍuko ọ̀ pịrịmẹ. 30“Ijipt gọvịna ḅe kụrọ pụkọ ḅụ ọkwẹịn wa pịrịmẹ pịkị nwọse wa ḅẹmẹ na wa mun oria ama-ẹnyẹ-emunmẹ. 31‘Mine ama ẹnyẹ apụkẹ,’ wa nwọse ọ̀ pẹkẹrẹmẹ, ‘mine kọkọma tomoni-ẹ. 32Mine mgba oyimaịn mịnapụ fịnjị, gbọrị ḍaḅọ yi owuapụ awọ-ẹ. Gbọrị mịnaḅọ owuḅọ fịsam, anịsịkị kọnjụ ḅe ọ̀ mịna ḍaḅe na Kenan ḅie omi-ẹ.’ 33Nweniḅọ ḅe nwọ pẹkẹrẹmẹ, ‘Mị à se ómine karakara tomoni-ẹ nwọ ḍọkịḅoḅịa ọkụ-ẹ: Ọ́mịna ḅie gbọrịḅọ ị̀rị̀ na simeḅịa; kirikọn apụma ịpịamgba ma ọkịmun ọ́mịna ḅuruḅarị furoma nwọ pịrịḅịa. 34Se ó so mun ọ́mịna numbireowu, kalaḅọ ḅe nwọse ḅo ị̀ pịrị. Anịsịkị mị à nemiḅịaye-ẹ na ómine ama-ẹnyẹ-apụkẹ, ọkụma karakara tomoni-ẹ: àrị ọ́mịna numbireowu ḅe seni pịkịma ọ́ pịrịḅịa, anịsịkị ómine ineda mịanga sime tuḅokọnḅịa.’”
35Iniḅo inia akpa ma sara sịkị ḅọḅọ mịna igbiki mị ọrịmẹ. Ini inia igbiki ma ọrị sịkị ini na inia ḍa Jekọb ḅe na ḅala opuma famẹ. 36Inia ḍaḅe nwọse ini ḅẹmẹ, “Ó ḅi na ị̀ya awọ mamgba à nwọ fama? Josẹf ḅe ọ̀ fa ḅọrọsam; Simiọnị ḅe sọ pịkị fa ḅọrọsam; mịọkụ ọ́ pịkị Bẹnjamin ḅe ọkịḅịa ẹrẹchị ḍọkị aḅẹ. Ị̀rị̀ mị pa tọrụsiọrịarịye-ẹ!”
37Rubẹnị ḅe nwọse ḍawu ḅe ḅẹmẹ, “À nemikase Bẹnjamin ḅe se vinpịkị ḅo ị́ pịrịkẹ ḅẹḅẹ, ị́ ineda ị̀ya mama owuapụ awọma ḅaaḅịa. Ò se ị̀ ḅara chụa, à pịkị ò se ḅo ị́ pịrịḅịa.”
38Ọkụma Jekọb ḅe nwọ ḅẹmẹ, “Ị̀ya tọkụ ḅe ori ineda ị́rị́ na mun-ẹkẹ; numbireowu ḅe ọ̀ fịsam, ori kẹngẹ mị kọnye-ẹ. Sosi ye pịkị ateliogbo ọ̀ laḅịa. Ị̀rị̀ olomuḅọ-ẹ, àrị ò se ị́ pịrị ọkụma, anị dekiḅo ị̀ pịrịḅịa kururu mị ineda ị̀ ḅaaḅịa.”
Currently Selected:
Chukusakị 42: OBTP
Highlight
Share
Copy

Want to have your highlights saved across all your devices? Sign up or sign in
The Bible Society of Nigeria