Chukusakị 39
39
Josẹf Ḅe Na Pọtifa Ta Ma Na
1Mịọkụ Ishmẹl apụma ini Josẹf ḅe se Ijipt mun se ò se Pọtifa ḅe dẹrịmẹ, amanyanaḅọ warị koruapụma ḅie tịḅịnịḅọ ḅe. 2Nyanaḅọ Ḅe ò Josẹf ḅe na omi-ẹ, pịkị mịẹse ọ̀ tọrọkọ mun mẹ. Ijipt ama mị ḅie ọ̀ nyanaḅọ ḅe warị ḅie ori angamẹ, 3ọ̀ nyanaḅọ ḅe ori ọrịmẹ na Nyanaḅọ Ḅe ò Josẹf ḅe na omi-ẹ, pịkị ọ̀ ḅara se lamaye layelaye mịẹse anị lolomẹ. 4Pọtifa ḅe oria mịẹye ọ̀ ḅụḅẹlẹmẹ, se pịkị ò se ò ḅiekoruḅọ nwọ mịẹmẹ; anịẹrẹchị oria warị mị na ọ̀ nyanaye layelaye ḅụ ori ò se tịḅịnịḅọ mịẹmẹ. 5Anịsịkị ọkị tọrọkọ mun, Josẹf ḅe gose Nyanaḅọ Ḅe Ijiptḅọ ḅe warị mgba na, warịḅie na, pịkị oria ozuma ḅie na, ọ̀ nyanaye layelaye nwọ ḅẹlẹmamẹ. 6Pọtifa ḅe ọ̀ nyanaye layelaye ọ̀ nwọ saḅama Josẹf ḅe pịrịmẹ na ò ḍikiḍiki, anịgose ò gbọrịye sọ kpekimakẹ, ọ̀ fịḅịa fịye sikima.
Josẹf ḅe ori mgba ọ̀ karamakaramamẹ, ọ̀ pịkị ḍikitọrụgbẹịnmẹ, 7sịkị kele ḅọrọ sịkị, Josẹf ḅe ọ̀ nyanaḅọ ḅe ta ma árị ò ḅimẹ ori árị na ḅọlọlọ mọnọye ọgọnọ mọnọ. 8Ò ḅerenikẹ se ọ̀ nwọse á ḅẹmẹ, “Ḍiki, ị̀ nyanaḅọ ḅe, warị ḅie simeye goyegoye ọ̀ ḅarị tọrụ se ḍikikẹ, anịatịḅị àrị omi-ẹ gose. Ọ̀ nyanaye layelaye ọ̀ nwọse ị̀ ḅarachụasam. 9Warị ḅie ọ̀ nyana kụrọ layelaye mị ị̀rị̀sọ nyanaye-ẹ, ò se ị̀ ḅọịmaye ofori-ẹ ị́rị́ sikima. Anịọkụma nde àrị ị́rị́ na nwọ sime ḅụsininimaye nwọ mịẹse Tamụnọ Ḅe ḅụ si ḅọ sọḅịa ọkụ?” 10Ene ḅa ene ḅa ene, árị ọ̀ ḅụfụkamaḅẹ nwọḅẹ sọ, ori árị na gboloma ḍụkụkẹ.
11Ọkụma gbọrị ene, fịrịnwẹngịapụma ḅụ gbọrịḅọ sọ ofori sịkị ḅụ, Josẹf ḅe ò mun oria fịrịnwẹngịarịogbo. 12Árị oria koroḅụchụaye mị ọlọ se ọ̀ ḅẹmẹ, “Ḅo ị̀rị̀ na ḅọlọlọ.” Ọkụma ọ̀ mangị nụngọ pakamẹ, oria koroḅụchụaye mị á ḅara ḅie nwọ wẹrị so ḅụ. 13Á ḅo ọrịmẹ na oria ḅụchụaye mị ọ̀ ḅarasin se mangị nụngọ pakamẹ nwọ ḅẹsịkị, 14árị árịa fịrịnwẹngịapụma chịnse nwọ ḅẹmẹ, “Ọ́ mịn mị ḍiki! Ị̀ de ḅe ọkị mị warị ḅo Hibruḅọ ḅe ọ̀ wa wọlọ aḅẹ. Ori ị̀ya jukuru ḅie sọḅo se kụrọḅara se ị̀rị̀ na gboloma-ẹtọnmẹ, ọkụma àrị ị̀ya ịnyọ laḅara nwọse olokumẹ. 15Àrị oloku ọkụ ọ̀ nwọ ọrị sịkị, ọ̀ mangị nụngọ pakamẹ, oria koroḅụchụaye mị wẹrịso ị̀ya anga sịkị koromamẹ.”
16Á ḅụchụaye mị se wẹrị Josẹf ḅe ọ̀ nyanaḅọ ḅe warịḅo sịkị lamẹ. 17Anị á ḅo anị gbọrị ḅẹrẹ mị ḍuko ọ̀ pịrịye-ẹ. “Ḅe ị́ ọkịḅo Hibru omoniḅọ ḅe ị̀ya jukuru ḅie sọḅo se ị̀ wọlọmẹ. 18Ọkụma àrị oloku sịkị ọ̀ mangị nụngọ pakamẹ oria koroḅụchụaye mị wẹrịso ị̀ya anga sịkị koromamẹ.”
19Josẹf ḅe ọ̀ nyanaḅọ ḅe anị opuma oḅuosọmẹ 20ọ̀ mịẹse ini Josẹf ḅe kun se ò seni amanyanaḅọ ḅe ikoliapụma ikoliwarị ḅie koromamẹ, anịanga anị ò simeye-ẹ. 21Ọkụma Nyanaḅọ Ḅe ò Josẹf ḅe na omi-ẹ, ọ̀ pịkị ọ̀ ḅẹlẹmamẹ, anịgose ikoliapụma ḍikiḍikiarịḅọ ḅe ori ọ̀ tarịmẹ. 22Ò Josẹf ḅe se ísí ikoliapụ mamgba ḅụ tịḅịnịḅọ nwọ mịẹmẹ, pịkị mịẹse ikoliwarị ḅie mịẹye layelaye Josẹf ḅe tọrụ se anịaḅụ wẹrịmẹ. 23Ikoliwarị ḍikiḍikiarịḅọ ḅe Josẹf ḅe mịẹye layelaye ò ḍikiḍikikẹ anịatịḅị Nyanaḅọ Ḅe ò Josẹf ḅe na omi-ẹ, ọ̀ pịkị mịẹse ọ̀ mịẹye layelaye ori na iḅimẹ.
Currently Selected:
Chukusakị 39: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
