Chukusakị 35

Tamụnọ Ḅe Bẹtẹl Ḅie Jekọb Ḅe Ḅẹlẹmamẹ

1Tamụnọ Ḅe nwọse Jekọb ḅe ḅẹmẹ, “Mị kirikiri so mun Bẹtẹl ḅie anga. Anịanga gbọrị agbamịẹ ẹbẹ pike ị̀ pịrị, ị́ mbire, Isọ ḅe gose ị́ mangịsoarị sịkị, Ị̀rị̀ anị ị̀ ḅụ se ị́ ḍie Tamụnọ Ḅe-ẹ.”

2Anịgose Jekọb ḅe nwọse ò furo mị na pịkị ori na sime jịn apụma na ḅẹmẹ, “Ọ́ nyana jịn sẹ oru ma ọ́ nwọ wẹrịso; se ómine ọ́ ḅụ ma mịẹfịafịama se fịafịa ḅụchụaye chụa. 3Wa mịanga wẹrịso se so Bẹtẹl munḅịa, anịanga anị àrị agbamịẹ ẹbẹ pike, ị̀ya ḅụfụka ḅie ị̀ ḍikiḍiki pịkị à munyọ munyọ ị̀rị̀ na sime Tamụnọ Ḅe pịrịḅịa.” 4Anịgose inia ḅara sime jịn sẹ-a oru mamgba na ḅerichụaye ma na ini nwọse Jekọb ḅe pịrịmẹ. Ori àrị se Shẹkẹm na kpeki gbọrị kuru eje chuku kiri ḅie ḍipimẹ.

5Jekọb ḅe na oria awọma na, ini so àrị sịkị, opu ḅalafa ini na kpeki amama ḅụ sọmẹ, anịgose ini ini ḍukokẹ. 6Jekọb ḅe ori oria tomoni mamgba na mun Lụz mị lamẹ, anị mịọkụ ini Kenan ama ḅie Bẹtẹl nwọse nemi nyọ mị. 7Anịanga ori agbamịẹ ẹbẹ pikemẹ, se anịse Bẹtẹl Tamụnọ Ḅe korumẹ, anịatịḅị ò numbireowu ḅe gose mangịsoarị sịkị Tamụnọ Ḅe ọ̀ ḅụ se ò ḍiemẹ anịnyọ ḅụ. 8Debora, Ribeka awọma ḍikiḍikiarịḅọ ma anịanga á fịmẹ se ini á se kuru eje mị chuku, Bẹtẹl mị ḅụ chuku daọrụ ḅụ ḍipimẹ. Anịgose ini nwọse anị chịnmẹ “Owuwu Kuru Eje.”

9Jekọb ḅe Mẹsopotemịa ḅie soḅo sịkị Tamụnọ Ḅe pịkị ọ̀ ḅụ se ò ḍie se ọ̀ ḅẹlẹmamẹ. 10Tamụnọ Ḅe nwọse ọ̀ ḅẹmẹ, “Ị́ya ẹrẹ anị Jekọb, ọkụma mịọkụ ọkị tọrọkọ mun Izrẹl anị ị́ fịḅịaye-ẹ.” Anịọkụma Tamụnọ Ḅe mị Izrẹl se ọ̀ chịnye-ẹ. 11Tamụnọ Ḅe pịkị nwọse ọ̀ ḅẹmẹ, “Ị̀rị̀ anị Kụrọmamgba Nyana Tamụnọ Ḅe-ẹ. Tọn-a awọ nyana. Tọn-a sẹ ị́ furo ḅie pakaḅoḅịa, ị́ opuḍaḅọ sọ amanyanapụ pịrịḅịa. 12À se Ebraham ḅe na Aịzịk ḅe na pịrị ama mị à pịkị nwọse ị́rị́ na ị́ya ọḅụju pakaḅoḅịa apụma na pịrịḅịa.” 13Anịsịkị Tamụnọ Ḅe ọ̀ wẹrịsomẹ. 14Anịanga Tamụnọ Ḅe ọkwẹịn ọ̀ pịrị nyọ mị ḅụ, Jekọb ḅe ye se ḅiekoromaḅịa ḍụparị nwọ chịẹma se iru na oliv pulo na se anịa ọgọnọ sara se osiḅụ wẹrịmẹ. 15Ọ̀ nwọse nyọ mị chịnmẹ Bẹtẹl.

Rechẹl Ma Fị Mị

16Jekọb ḅe na ò furo mị na Bẹtẹl wẹrịsomẹ, se ini ḅo kele Ẹfrat ḅụ wẹrị sikima sịkị, anị ḅo Rechẹl ma yiḅịa sịkị lamẹ, árịa yi mị kụrọmẹ. 17Arịa yi mị ḅo ngịsị ḅarị mịẹḅịa ḅara oforika sịkị, ịrịa maịnmaḅọ ma nwọse á ḅẹmẹ, “Ḅalafama, Rechẹl mị pịkị jịn owutọkụ-ẹ.” 18Ọkụma á fị aḅẹ, árị árịa kuluma ịnyọ mị jineso sịkị, á nwọse tọkụ ḅe chịnmẹ Bẹnonaị, ọkụma ḍawu ḅe nwọse ọ̀ chịnmẹ Bẹnjamin.

19Rechẹl ma fị sịkị, Ẹfrat mun-arị ateli aka anị ini á ḍipiye-ẹ, mịọkụ Bẹtlihẹm ini nwọse anị nyọ mị chịnmẹ. 20Jekọb ḅe anịanga á se ḅiekoromaḅịa ḍụparị nwọ chịẹmamẹ, mịmgba sọ anị pa Rechẹl iḍupu elekima nwọ sọ waraḅẹ. 21Jekọb ḅe ọ̀ pịkị nwẹngị tọrọkọ mun Ida ini nwọse chịn sokopi warị mị na ḍikia-ḍikia nyọ mị ḅe ísí pẹkẹrẹ oria ikowarị namamẹ.

Jekọb Owuapụ Awọ Ma

(1 Ama 2.1-2)

22Jekọb ḅe anịanga ḅụ anga àrị sịkị, Rubẹnị ḅe ọ̀ ḍawu ḅe oria ịgwa eremeni ma ḅụ gbọrịḅọ Bilha ma na gbolomamẹ, Jekọb ḅe mị ye mị naa sịkị anị opuma ori ịganịmamẹ.

Jekọb ḅe oyimaịn owuapụ awọ fịnjị ọ̀ nwọ yi mẹ. 23Lia owuapụ awọma anị Rubẹnị (Jekọb owuapụ awọma ḅie sẹnịḅọ ḅe), Simiọnị ḅe na, Livaị ḅe na, Juda ḅe na, Ịsaka ḅe na, pịkị Zẹbụlọnị ḅe na-ẹ. 24Rechẹl owuapụ awọma anị Josẹf ḅe na, pịkị Bẹnjamin ḅe na-ẹ. 25Rechẹl omoniḅọ, Bilha owuapụ awọma anị Danị ḅe na, pịkị Naftalaị ḅe na-ẹ. 26Lia omoniḅọ, Zilpa owuapụ awọma anị Gadị ḅe na, pịkị Asha ḅe na-ẹ. Mịna owuapụ awọma Mẹsopotemịa ḅie mị ini ini yiye-ẹ.

Aịzịk Ḅe Fị Mị

27Jekọb ḅe ḍawu Aịzịk ḅe damamunmẹ, Mamre Hibrọn na kpeki nyọ mị, anị Ebraham ḅe na Aịzịk ḅe na anga nyọ mị-ẹ 28Aịzịk ḅe ò kụra eseniasi lamẹ 29olomu la na iḅiọkụ ọ̀ nwọ lamẹ; se ọ̀ fịmẹ; oria awọ Isọ ḅe na Jekọb ḅe na ò ḍipimẹ.

Currently Selected:

Chukusakị 35: OBTP

Highlight

Copy