Kịẹn-aḅịḅị Suku-saakị Ẹkwẹn
Suku-saakị Ẹkwẹn
Kịẹn-aḅịḅị nwẹn-sịn ḍiri mẹ Izirẹlịapụ ma ịlụkụ mẹ gbaarị ịn Sayịnayị Tụndụ mẹ koroma-so sakị kẹlẹ fa kụra amesi sakị mẹ ḅụ, nwenii ịn mu ama mẹ tẹ Tamụnọ kẹ ịn pịrị ḅẹ karịma ama mẹ ḅẹ ịrụa-saakịarị-anga mẹ ḅẹ agara mẹ lam. Ḍiri mẹ ẹrẹ mẹ ḅara kẹ ịlụkụ mẹ ḅẹ kụrọ nyana gbọrụ anga tọkịmarị, aniemẹ anie kịnị kịẹn mẹ tẹ Sayịnayị Tụndụ ḅụ Mozizi Izirẹlịapụ ma kịẹn tẹrẹmẹ ịn saakị so ye mẹ na, pịkị Mohabụ ḅụ, Jodanị mẹ ḅẹ ịrụa-saakịarị-anga ḅụ gbọrụ ḅụọ ḅọrọtẹ sakị pembe sakị ḅụ ọ̀ kịẹn ye mẹ na. Kịnị kịẹn maa asakị ma ogboku ḅụ Izirẹlịapụ ma so Kenanị ḅụ suku-jụ da pakịrị anga ḅẹ agara ḅụ Kadẹsị-Baniya mum, kụma anịjụ ḅụ ịn mẹnjị minini ama mẹ sọ-mu ḍụkụ-a. Ini anị ye-yọ mẹ ḅụ tọnwa kụra sime tẹso, ịn so Jodanị Tọrụ mẹ ḅẹ ịrụa-saakịarị-anga ḅẹ iri mẹ mum; tomi ma ḅẹ ja apụ koro sịẹ, tẹ kirikọn-apụ tọrụ mẹ saḅa-ḅọrọ tẹ so Kenanị sọ-mu ḅẹ ḅara kẹ ḅụụ-tẹlẹma anga mẹ.
Kịẹn-aḅịḅị nwẹn-sịn ḍiri mẹ gbọrụ atomi kụrọtẹ ḅiokpọ nyana-a tẹ tọrụsiẹrị kiri ḅụ ḅalafaarị atomi gbolomaye ḍukom; inima tẹ sịḅị-kụrọma Tamụnọ na, Mozizi, Tamụnọ tọnm tọrọkọ tarị ịn pịrị nwẹn ḅẹẹ tomḅọ ḅe na pịrị apụ ma. Miemẹ anie Tamụnọ nyana minini ḅụ ọ̀ tọrụ-pịkị ọḅụ ḍiki-a ḅara kẹ ori atomi ma ịnyọ nyana-a na, ḅịḅịpoki-a na ḅụ sọ ḍikiḍiki ḅara na, Mozizi jike-a ḅara kẹ sịẹ-kụrọ ḅara na ḅẹ ịlụkụ, ọ̀ nwẹnị ḅọrọ ja asakị ḅụụ dein nyana-a ḅara na, ḅụụ sịkị Tamụnọ na, ori atomi ma na pịrị sọ.
Ḍiri Mẹ Ḅio Simearị-aị
Izirẹlịapụ ma Sayịnayị Tụndụ koroma-so ḅẹ ḅụụ tẹlẹmam 1.1—9.23
a. Tarị kịnị kịẹn mẹ 1.1—4.49
b. Kịrị-kịrị Oloko na, tọn aị na 5.1—8.26
d. Maaịn karama Saḅa-ḅọrọ mẹ 9.1-23
Sayịnayị Tụndụ ḅụ so mu Mohabụ la 10.1—21.35
Mohabụ ḅụ mịẹ aị 22.1—32.42
Ijiputi ḅụ so mu Mohabụ la igoni mẹ ḅẹ kpụlụ ḅara 33.1-49
Tẹrẹmẹ Jodanị mẹ saḅa mẹ ḅẹ datụkụma ḍuko aị 33.50—36.13
Currently Selected:
Kịẹn-aḅịḅị Suku-saakị Ẹkwẹn: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria