Kịẹn-aḅịḅị 8

1 # Pks 25.31-40; 37.17-24 Mịọkụ KỊNỊNYANAḄỌ ḅe nwẹnị Mozizi ḅẹẹ, 2“Erọnị ḅẹẹ, ị̀ tọnjọ ma sịẹma sakị, sọnọma atọnjọ ma bele kẹ tọnjọ-sịẹmaye mẹ ḅẹ tọrọkọ mẹ pịrị ḅa.” 3Erọnị mị-ḅara mẹ mịẹm; ọ̀ tọnjọ-sịẹmaye mẹ ḅẹ atọnjọ ma sịẹmam anị bele kẹ tọnjọ-sịẹmaye mẹ pịrị ḅẹ ḅara, ḅụ KỊNỊNYANAḄỌ ḅe wẹrịtẹ tọn Mozizi pịrị ḅara mẹ. 4Mị-ḅara mịẹ ịn kẹ tọnjọ-sịẹmaye mẹ kọrị ḅara; golu mịẹ ini amana kẹ ḅakụ-ḅakụ anị tẹmẹ ye, anị ḅẹ suku ḅụ saakị mu anị ḅẹ ọgọnọ-jụ in tẹmẹ anị ḅirima afịlawa la, anị anie amana kẹ ḅakụ kọrịnama. Anị ḅẹ sime-ḅara mẹ tẹ KỊNỊNYANAḄỌ ḅe kẹ Mozizi ḍie tẹ ḅara mẹ mịẹ ọ̀ kẹ tọnjọ-sịẹmaye mẹ mịẹ ḅara.

Livayị furo-ḅẹ-apụ ma mịẹ tẹ in fịafịa ḅarị ḅara na in sikima wẹrị in mịẹ ḅẹ ye pịrị ḅarị ḅara na

5KỊNỊNYANAḄỌ ḅe nwẹnị Mozizi ḅẹẹ, 6“Izirẹlịapụ ma ogbo-ḅio ḅụ Livayị furo-ḅẹ-apụ ma ọkịị, tẹ in mịẹ in fịafịa, 7anịsakị kẹ in mịẹ tẹ in fịafịa mẹ mị-ḅara mịẹ ị́ kẹ in mịẹ ḅarị ḅara, ye bẹkẹlẹma sin minji mẹ kẹ ịna ọgọnọ ḅụ ini asanaa, tẹ yee in sịḅị sẹịn ogie kẹ mu ịna oju ḅụ inume sime anga mamgba sẹịn welewelema, tẹ minji ḅiri tẹ ịna oju sịkịrị tẹ pilema-a ḅara kẹ fịafịa. 8Anịtẹso yee ini mgbọlụ agba mịẹ asambịrịma gbọrụ owi-nambulo na, anị ḅẹ olivu pulo kẹ pikiritẹ iḅiọkụ gbẹẹtẹ iḅi fịlawa na ọkị ḅa; anịsakị pịkị sime si sin pịrị jen asambịrịma gbọrụ owi-nambulo ọkị ḅa. 9Ị́ nwẹnị Livayị furo-ḅẹ-apụ ma ọkị-ḅo Kobiri Akpụrụ-warị mẹ tọrọkọ sịẹma ḅa, tẹ Izirẹlị ḅẹ bebe tomina-ogbo mẹmgba sịn ḅo kobiri ḅa. 10Ị́ Livayị furo-ḅẹ-apụ ma kẹ KỊNỊNYANAḄỌ ḅe pịrị tẹso, Izirẹlịapụ ma nwẹnị ịna ḅara kẹ Livayị furo-ḅẹ-apụ ma ọgọnọ gbana ḅa, 11tẹ Erọnị nwẹnị Izirẹlịapụ ma ḅụụ ḅụ Livayị furo-ḅẹ-apụ ma sikima ḅelema tẹ kẹ karakara ịmịẹtẹ ḅẹẹ KỊNỊNYANAḄỌ ḅe tọrọkọ ḅụ, mịẹtẹ KỊNỊNYANAḄỌ ḅe fịrị mẹ mẹnjị mẹ ịna nye sọ ḅarị ḅara. 12Anịtẹso Livayị furo-ḅẹ-apụ ma ịna aḅara kẹ owi-nambulo ma sịḅị ọgọnọ ḅụ gbana ḅa; tẹ nwẹnị ịna ḅụụ gberie kẹ si sin agba mịẹ ḅa, osi ye ḅe kẹ dọkịma-agba mịẹ KỊNỊNYANAḄỌ ḅe pịrị tẹ si-wẹrịso pịrị ḅẹrẹ fama Livayị furo-ḅẹ-apụ ma pịrị ḅarị ḅara. 13Ị́ Livayị furo-ḅẹ-apụ ma kẹ karakara ịmịẹtẹ kẹ KỊNỊNYANAḄỌ ḅe ḅẹẹ ḅa, tẹ mịẹtẹ in fịrị mẹnjị Erọnị na, ori owiapụ-awọmẹ na pịrị ḅa. 14Mị-ḅara mịẹ ị́ kẹ Izirẹlịapụ ma ogbo-ḅio ḅụ Livayị furo-ḅẹ-apụ ma sikima ḅelema ḅarị ḅara, anịsakị Livayị furo-ḅẹ-apụ ma ìnye sọ ḅa. 15Ị́ in mịẹtẹ in fịafịa, tẹ ị́ ịn kẹ karakara ịmịẹtẹ mẹ ḅẹẹ fama tẹ aniemẹ ḅọrọ tẹso, Livayị furo-ḅẹ-apụ ma nwẹnị saakị Kobiri Akpụrụ-warị mẹ ḅụ fịrị mẹnjị ḅụ sọ ḅa. 16Kẹ gotẹ ọkọ ḅẹẹarị, Izirẹlịapụ mamgba ḅụ tarị iyi tẹ furo finji apụ ma nakara, arị ini ọkị ị̀ ḅụụ pịrị tẹ. 17#Pks 13.2Kẹ gotẹ ọkọ ḅẹẹarị, anị ene mẹ tẹ arị Ijiputi ama mẹ ḅio tarị iyi apụ mamgba ḅaa fama ene mẹ ḅụ mịẹ arị Izirẹlịapụ ma ogbo-ḅio ḅụ tomi na, nama na ḅụ tarị iyi apụ mamgba mịẹ fịafịama sikima ị̀ ḅụụ pịrị ye, in sime ị̀ pịrịm; 18anịsakị Izirẹlịapụ ma ogbo-ḅio ḅụ tarị iyi apụ mamgba nakara, à Livayị furo-ḅẹ-apụ ma ọkị tẹẹ. 19À ḍiepịrịye ḅara ḅụ Livayị furo-ḅẹ-apụ ma kẹ Erọnị na, ori owiapụ-awọmẹ na pịrị tẹ Izirẹlịapụ ma ogbo-ḅio ḅụ; in fịrị mẹnjị Izirẹlịapụ ma pịrị ḅarị ḅara Kobiri Akpụrụ-warị mẹ ḅụ, tẹ si-wẹrịso pịrị ḅẹrẹ fama Izirẹlịapụ ma ogbo-ḅio paka ḅịa ḅara Izirẹlịapụ ma sọma ḅo fịafịa yọ mẹ kpeki ye paka-paka” 20Mị-ḅara mẹ mịẹ Mozizi na, Erọnị na, Izirẹlị ḅẹ tomina-ogbo mẹmgba na kẹ Livayị furo-ḅẹ-apụ ma mịẹ ḅara; Livayị furo-ḅẹ-apụ ma gbolomaye mẹmgba tẹ KỊNỊNYANAḄỌ ḅe wẹrịtẹ tọn Mozizi pịrị ḅara mẹ Izirẹlịapụ ma ini in mịẹm. 21Livayị furo-ḅẹ-apụ ma nwẹnị si ḅụ ịna aḅụụ mịẹ fịafịama, tẹ minji kẹ ịna akapa sịkịrị, tẹ Erọnị nwẹnị KỊNỊNYANAḄỌ ḅe tọrọkọ ḅụ ịn kẹ karakara ịmịẹtẹ ḅẹẹ, tẹ Erọnị, kẹ in mịẹ fịafịama ḅẹ ẹrẹsị si-wẹrịso pịrị ḅẹrẹ fama in pịrịm. 22Anie mẹ ḅọrọ tẹso, Livayị furo-ḅẹ-apụ ma fịrị mẹnjị Erọnị na, ori owiapụ-awọmẹ na pịrị ḅụ Kobiri Akpụrụ-warị mẹ ḅio sọ-mum. KỊNỊNYANAḄỌ ḅe wẹrịtẹ tọn Mozizi pịrị ḅara, anị ḅara mịẹ ịn kẹ in mịẹ ḅara. 23KỊNỊNYANAḄỌ ḅe nwẹnị Mozizi ḅẹẹ, 24“Mịẹ mẹ anie Livayị furo-ḅẹ-apụ ma gboloma ye: si sọnọ akụra finji sịḅị ḅụ ḅọrọtẹ apụ ḅụ sakị iwo, in so Kobiri Akpụrụ-warị mẹ ḅẹ kọrịnama ḅụ mu fịrị mẹnjị ḅa; 25anịsakị ịna sịḅị kụra amesi oyi finji ḅụ, in kọrịnama mẹ ḅẹ fịrị mẹnjị mẹ ḅụ ḅụụ nụnụ-ọkị tẹ ḅarị jen-maaịn kẹ fịrị mẹnjị ḅịa, 26kụma in Kobiri Akpụrụ-warị mẹ ḍikiḍiki ḅara mẹ kẹ ḅarasụa ịna mịnapụ ma pịrị ḅa, tẹ ini ḅarị fịrị mẹnjị ḅịa. Mị-ḅara mịẹ ọ́ kẹ Livayị furo-ḅẹ-apụ ma mịẹ ḅarị ḅara sime in pịrị akọrịnama kẹ in pịrị ḅụ.”

Currently Selected:

Kịẹn-aḅịḅị 8: KBTP

Highlight

Copy