Matiyo 11

Minji-Sara Jọnị Oku-mẹnjịapụ Kẹ Jizọsị Fịrịmam

(Luk 7.18-35)

1Jizọsị mịna ịn mịẹ ḅẹ aị ma ḍuko ò Ḍukamẹnjị Oyi Maa apụ Finji ma pịrị fama tẹso, ò nwẹnị anịjụ so, tẹ mu anị na kpeki osi ama ma ḅụ ye-toluma tẹ pịkị Tamụnọ ẹkwẹn kọn.

2Minji-sara Jọnị ikoli-warị ḅio sime tẹ Kịrayịsị kọrịarị aị ma naa tẹso, ori ò ḍukamẹnjịapụ ma ḅụ kịnị fịrịma Jizọsị dama-mu tẹ ò gbelam. 3In Jizọsị gbelam, “Ḍuko wa pịrị, ị́yẹrị anie Jọnị ḅẹẹm ḅo ḅarị ḅọ ḅe mụnọọ wa paa jụmọ ḍiki ḅẹ?”

4Jizọsị nwẹnị pakịrị, “Ọ́ pịkịma so tẹ ọ́ nwẹn naarị aị ma na, ẹrịarị aị ma na ḅẹlẹma Jọnị pịrịị: 5#Ayị 35.5,6; Ayị 61.1tọrụngbọ-pụụntẹ-apụ inetẹ ye ẹrịarị, ekeliapụ inetẹ mẹnjịarị, sofịnị-obi-kọnapụ ma gwọọ fịafịarị; ḅeri-iningiapụ ye naarị, ịn fịtẹ-apụ saakịmarị fịị ḅụ, tẹ ịn pịkị Iḅi-oku mẹ ḍuko igoin-apụ pịrịarị. 6Ị̀ ḅụụ ḅụ ḅio-maaịn-tọn nyana-a apụ ma opu ḅioḅẹlẹ sime ịn pịrịm!”

7Jọnị ḍukamẹnjịapụ ma soarị ogbo, Jizọsị nwẹnị Jọnị gboloma ye ḍuko ò gbori-ikelema wararị tomina-ogbo-ogbo ma pịrị: “Ọmịnị ịkpa mẹ ḅio Jọnị dama-mu sakị ó ḍiki ḅẹ mu ye tiye? Fẹrụ fie ḅọlọlọmarị asịra mụnọọ? 8Ọmịnị ẹrị ḅẹ tẹ paka mu ye ḅọrọ tiye? Lọkọ-ḅịtẹ kapa ḅiri ḅọ mụnọọ? Anị ḅara kẹ ye ḅiri apụ ma amadapụ awarị ḅio mie kịnị ini ẹrị-ẹrị yee. 9Ó ḍuko ị̀ pịrịị, ó tiye ẹrị ḅẹ tẹ paka mu? Ịkịankoroḅọ mụnọọ? Inn, karakara-ḅara-ḅụ, kụma ọmịnị ẹrị ḅọ ịkịankoroḅọ nẹngị lamam. 10#Mal 3.1Kẹ gotẹ ọkọ ḅẹẹarị, Jọnị ḅe anie Fịafịa Ḍiri mẹ ḅụụ ḅụ ye ḍuko ḅọ ḅe: ‘Tamụnọ ḅẹẹm, arị ì oku-mẹnjịḅọ kẹ ị́ tọrọkọ tarị fịrịma tẹ ori etela finji ị́ pịrị ḅa.’ 11Ó nimi mịnẹ Minji-sara Jọnị ḅe, tomikiri anga tẹ tomḅọ goḅọ-goḅọ nẹngịm. Kụma Tamụnọ Ama-da mẹ ḅẹ atomi ma ḅụ iderima-tẹịn ḅọ sọ Jọnị nẹngịm. 12#Luk 16.16Jọnị saakị ọ̀ kẹ ḅo oku mẹ ḍuko ene ḅụ ḅo mịmgba la, Tamụnọ Ama-da mẹ kpọma kụrọnị amịẹaị da tẹ, tẹ kụrọ-kụrọ amịẹaị mịẹ apụ kụrọ ḅara ḅụ anị ọkị ḅẹ ḍọkịm. 13Ọkị ḅo Jọnị ḅo sakị la, ịkịankoro apụ mamgba na Mozizi Oloko mẹ na Tamụnọ Ama-da mẹ gbolomaye ḍuko tẹẹ; 14#Mal 4.5; Mat 17.10-13; Mak 9.11-13tẹ ọ́ nwẹnị ịna oku mẹ minini ḅarị ḅẹḅẹ, Jọnị anie Ịlayịja ḅe tẹ ḅo ḅẹ tẹ in ḍuko ḅọ ḅee. 15Ọkọẹrẹsị, ọ́ nwẹnị naa ḅẹ ḅii ḅẹḅẹ, ó pokii!

16“Mịọkụ ye wẹrịtẹ simearị ḅara ḅụ, à ḅọrọ tiye kẹ mị sakị mẹ ḅẹ apụ ma tọnma ḅẹ? Ịn kịkarị ye anie ogumaḅiri ḅụ lẹgị wararị awọmẹ. Gbọrụ ogbo oloku osi apụ pịrị tẹ ḅẹẹarị, 17‘Wa ere-ịya akwa farị ọ́ pịrị tẹ, kụma ọ́ sẹkị ḍụkụ-a! Wa pịkị ḍụẹịn-owu-nume su ọ́ pịrị tẹ, kụma ọmịnị owu ḍụkụ-a!’ 18Jọnị ḅo sakị ò ḅuru-ịmọm, ọ̀ pịkị iru ḅuu-a, tẹ ọrụḅọ-ọrụḅọ ḅẹẹm, ‘Ḅieḅe oru ọ̀ sịḅị ḅio emi!’ 19Tomḅọ Tụḅọ ḅe ḅo sakị, ọ̀ fị-na-ḅuu-nam, tẹ ọrụḅọ-ọrụḅọ ḅẹẹm, ‘Ḅieḅe ḍikii! Ori anie fị-ye fị-ye pọkọ-ta-a ḅọ, pịkị iru ḅuu ḅọ, ama-igbigi da apụ na ama sịkịtẹ apụ na ikiaḅọ!’ Anị sime-ḅara, sime-ḅara sọ, Tamụnọ ye-nimi mẹ anị dogi-ḅo ḅarị ye ḅụ mie tomi anị ḅẹ karakara mẹ lekiri ḅarịye.”

Jizọsị Minini Ḍụkụ-a Ama Ma

(Luk 10.13-15)

20Jizọsị ịganị arị ḅio ḅụ ọ̀ ḅụụ-buama-aị mịẹ tẹịn tẹ paa ịna asi ḅụ pịkị-a ama ma ḅẹ apụ ma pịrịm. 21#Ayị 23.1-18; Izi 26.1—28.26; Jow 3.4-8; Emọ 1.9,10; Zẹk 9.2-4Ori mẹẹ, “Korazịnị, tẹkẹlẹ sime ị́ pịrịm! Bẹtịsayịda, ị́yẹrị sọ tẹkẹlẹ sime ị́ pịrịm. Ọmịna aḅio ḅụ kọrị tẹ ḅụụ-buama-aị ma nwẹnị Taya na Sayịdọnị na ḅio kọrịm namịna mimgbe tomi ma akpa ịnwaịn tẹ fọọn ḍuu ịna sịḅị sara tẹ ḍie-pakama tẹ mịnẹ ini ịna asi ḅụ pịkị tẹ. 22Ó nimi mịnẹ Ḅẹrẹkọn ene mẹ ḅụ Tamụnọ ọkụrụkụrụ nyana Taya na Sayịdọnị na ḅẹ atomi ma pịrị ọ́ nẹngị ḅa! 23#Ayị 14.13-15; Suk 19.24-28Tẹ Kepanọmụ, kịngẹ kụma í ḅiim ị́ ị́ ḅụụ saakị-gelema mu so la! Nimi mịnẹ ini ị́ kẹ gbin iderima-ḅo ḍuḅu ḅio suu ḅa. Í ḅio ḅụ kọrị tẹ ḅụụ-buama-aị nwẹnị Sọdọmụ ḅụ kọrịm namịna mimgbe anị fa-a tẹ sime ḅo mịmgba mẹ sọ la tẹ! 24#Mat 10.15; Luk 10.12Ọmịnị inetẹ nimi ḅa mịnẹ Ḅẹrẹkọn Ene mẹ ḅụ Tamụnọ ọkụrụkụrụ nyana Sọdọmụ pịrị ọ́ nẹngị ḅa!”

Ọmịnị Ị̀ Ḍọkụma-ḅo Tẹ Ịnyọ Sara-a

(Luk 10.21-22)

25Anị sakị mẹ ḅụ Jizọsị ḅẹẹm, “Ḍa, So na Kiri na Nyanaḅọ! Arị ịmịẹtẹ kẹ ị́ ḅẹẹm, ị́ mịna aị ma kẹ ye ḍawọ ḍịn-a apụ ma rẹ ḍie tẹ arị kẹ ye-nimi wararị tẹ ye ḍawọ ḍịn tẹ apụ ma ḅọịma ye mẹ ẹrẹsị. 26Ọkọọ, Ḍa, mị-ḅara mie ị́ ḅii ḅara, mịnẹ anị ọkọ pakaa!

27 # Jọn 3.35; Jọn 1.18; 10.15 “Ị̀ Ḍa ḅe ye mamgba saakị ị̀ pịrị tẹ. Tụḅọ ḅe nimi gbọrụḅọ-sọ ofori, Ḍaḅọ ḅe sikima, tẹ Ḍaḅọ ḅẹ nimi gbọrụḅọ-sọ ofori, Tụḅọ ḅe na, Tụḅọ ḅe sẹlẹ ọkị tẹ ọ̀ kẹ ḍie apụ na sikima.

28“Ọmịnị ị̀ ḍọkụma-ḅoo, ọmịnị-mgba tẹ iku ye dogi nwenii tẹ ịnyọ-pọkọta tẹ apụ tẹ arị ịnyọsara kẹ ọ́ pịrị ḅa. 29#Jer 6.16Ọmịnị ị̀ nama kpọ gboloma sịn mẹ ọkị apana ḅaa, tẹ ị̀ ḅụụ ye ḍawọọ, kẹ gotẹ ọkọ ḅẹẹarị, yẹrị ḅe anie dein tẹ ḅụụ iderimarị ḅioḅẹngbọ nyanaḅọ; anịsakị ọmịnị ịnyọsara ḍọkị-ẹrị ọmịna ḅụụ pịrị ḅa. 30Kẹ gotẹ ọkọ ḅẹẹarị, yẹrị kẹ ọ́ pịrị ḅarị maa nama kpọ gboloma sịn mẹ oju fụkama fụkama-a, anịsakị à kẹ ọ́ pịrị dogi ḅarị dogiye mẹ sọ feke-fekearị.”

Currently Selected:

Matiyo 11: KBTP

Highlight

Copy